ބ. އޭދަފުށީގައި އިމާރާތްކުރާ މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) ކެމްޕަހުގެ ބިންގާ އަޅައިފިއެވެ.
އެ ރަށުގައި އިއްޔެ ބޭއްވި އެ ރަސްމިއްޔާތު ޝަރަފުވެރިކޮށްދެއްވީ މަތީ ތައުލީމާއި ބެހޭ ވަޒީރު ޑރ. އަލީ ހައިދަރު އަހްމަދެވެ.
މަތީ ތަޢުލީމާބެހޭ ވުޒާރާއިން މަޢުލޫމާތު ދޭ ގޮތުގައި، މިއީ އަތޮޅުތެރޭގައި މަތީ ތަޢުލީމާއި ތަމްރީނުގެ ފުރުޞަތުތައް ފުޅާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ގެންގުޅުއްވާ ހަރުދަނާ ސިޔާސަތުގެ ދަށުން ކުރިއަށްގެންދާ މުހިންމު މަޝްރޫޢެކެވެ. މި މަޝްރޫޢަކީ ދައުލަތުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ބަޖެޓް ކުރެވިގެން ކުރިއަށްދާ މަސައްކަތެކެވެ.
އޭދަފުށީގައި ޤާއިމްކުރާ މި ކެމްޕަހުގެ އިމާރާތް ކުރުމުގެ މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއެވެ.
އޭދަފުށީގައި ޤާއިމްކުރާ މި ކެމްޕަހުގެ އިމާރާތް ކުރުމުގެ ދަށުން، އެކަޑެމިކް، އިދާރީ، އަދި ރެސިޑެންޝަލް ފެސިލިޓީތަކެއް ހިމެނޭ ގޮތަށް މަލްޓި ބްލޮކް ޔުނިވަސިޓީ ކެމްޕަހެއް ފުރިހަމައަށް ޑިޒައިންކޮށް އިމާރަތްކުރާނެއެވެ. މި މަޝްރޫއުއަކީ، 80.79 މިލިއަން ރުފިޔާއަށް 720 ދުވަސްތެރޭ ނިންމަން އެމްޓީސީސީއާ ހަވާލުކޮށްފައިވާ މަޝްރޫއެކެވެ.
އޭދަފުއްޓަކީ 3,500 މީހުންގެ އާބާދީއެއް އޮންނަ އެ އަތޮޅުގެ ވެރިކަން ކުރާ ރަށެވެ. އެމްއެންޔޫގެ ކެމްޕަހެއް އޭދަފުށީގައި ގާއިމުކުރެވިގެން ދިއުމުން، ބ. އަތޮޅުގައި ދިރިއުޅޭ ދަރިވަރުންނަށް އެ އަތޮޅުގައި ތިބެގެން މަތީ ތައުލީމު އުނގެނުމުގެ ފުރަސަތު ލިބޭނެއެވެ. މިއާއެކު، މަތީ ތައުލީމަށް ކުރަންޖެހޭ ހަރަދު ކުޑަވެ، ތައުލީމީ ދާއިރާއިން އޭދަފުއްޓަށާއި އަދި މުޅި ބ. އަތޮޅަށްވެސް ބޮޑެތި ލުއިފަސޭހަތަކަކާއި ގިނަ ފައިދާތަކެއް ލިބޭނެކަމަށް ގަބޫލްކުރާ ކަމަށް އެމްޓީސީސީން ވިދާޅުވެއެވެ.