ބޭސް ލިބުމުގައި ކުރިމަތިވެފައިވާ ދަތިތައް ހައްލު ކުރުމަށް ކުރެވޭ މަސައްކަތުގެ ތެރެއިން މިދިޔަ އަހަރު މުޅިން އަލަށް 363 ބޭހެއް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ރަޖިސްޓްރީކޮށްފައިވާ ކަމަށް އެ އިދާރާއިން ބުނެފި އެވެ.
އެމްއެފްޑީއޭ އިން އާންމުކުރި ތަފާސް ހިސާބުތަކުން ދައްކާގޮތުން މިދިޔަ އަހަރުގެ ނިޔަލަށް ރާއްޖެ އަށް ޑޮކްޓަރީ ބޭހުގެ ގޮތުގައި 363 ބޭހެއް ރަޖިސްޓްރީ ކޮށްފައިވާ ކަމަށެވެ. އެގޮތުން ރިޖެކްޓް ކުރި ބޭހުގެ ގޮތުގައި 231 ބޭހެއް ހިމެނޭ ކަމަށާއި، ޑޮކްޓަރީ ބޭސް ވިއްކުމުގެ ހުއްދަދީފައިވާ މިންވަރު ޖުމްލަ މުޅި ރާއްޖޭގައި 89 ކަމަށެވެ.
ޑޮކްޓަރީ ބޭސް ވިއްކުމުގެ ހުއްދަ ދީފައިވާ މިންވަރަށް ބަލާއިރު، މިދިޔައަހަރު ޖުމްލަ 594 ބޭހެއް ރަޖިސްޓްރީކުރުމަށް ހުށަހެޅި އޭގެ ތެރެއިން 363 ބޭހެއް ރާއްޖޭގައި ހުއްދަކުރާ ބޭހުގެ ލިސްޓުގައި ހިމަނާފައިވާ ކަމަށް އެމްއެފްޑީއޭ އިން ބުންޏެވެ.
ހެލްތު މިނިސްޓްރީން މަޢުލޫމާތު ދިން ގޮތުގައި، ވޭތުވެދިޔަ އަހަރު ބޭހުގެ ތާށިކަން ކުރިމަތިވުމާ ގުޅިގެން އެކަން ހައްލުކުރުމަށް ވަނީ ޚާއްޞަ އިސްކަމެއް ދީފަ ކަމަށެވެ. މިހާތަނަށް 445 ބޭސްފިހާރަ އެއް ހިންގަމުންދާކަމަށް ހެލްތު މިނިސްޓްރީން ވަނީ ބުނެފައެވެ. އަދި މީގެ ތެރެއިން 270 ބޭސްފިހާރައަކީ އަތޮޅުތެރޭގައި ހިންގާ ފާމަސީތަކަށް ކަމަށާއި، މާލޭގައި ހިންގަނީ 175 ފާމަސީއެއް ހިމެނޭ ކަމަށެވެ.
ފާއިތުވި އަހަރު އެކި މައްސަލަތަކާ ގުޅިގެން 33 ބޭސްފިހާރައެއްގެ ހުއްދަ ބާތިލުކޮށް އަލަށް 20 ބޭސްފިހާރައަކަށް ވަނީ ހުއްދަ ދީފަ ކަމަށްވެސް އެމްއެފްޑިއޭއިން ވަނީ ބުނެފައެވެ.