މިއަދު ދިވެހިރާއްޖެއަށް 2 މިލިއަންވަނަ ފަތުރުވެރިޔާ އައިސްފައިވާ ކަމީ ފަތުރުވެރިކަމުގެ ސިނާއަތުން ހާމަކޮށްފިއެވެ. މި އަހަރުގެ ފަތުރުވެރިކަމުގެ ލަނޑުދަނޑި ހާސިލުކުރެވުނުކަން ފާހަގަކޮށް، މި ކާމިޔާބީގައި ބައިވެރިވި ހުރިހާ ފަރާތްތަކަށް ސަރުކާރުންނާއި ފަތުރުވެރިކަމުގެ ދާއިރާއިން ވަނީ ތަހުނިޔާ އަރިސްކޮށްފައެވެ.
މި ކާމިޔާބީ ފާހަގަކުރުމުގެ ގޮތުން، ފަތުރުވެރިކަމުގެ ސިނާއަތުގެ ހުރިހާ ބައިވެރިންނަށް، ރިސޯޓްތަކާއި ގެސްޓްހައުސްތަކާއި ސަފާރީތަކާއި ޓްރެވަލް އެޖެންސީތަކާއި، މި ދާއިރާގައި މަސައްކަތްކުރާ ކޮންމެ ފަރުދަކަށް ހިތުގެ އިހުލާސްތެރިކަމާއެކު ތަހުނިޔާ ވަނީ ދަންނަވާފައެވެ. މިއީ ރާއްޖޭގެ ފަތުރުވެރިކަމުގެ ދާއިރާ އާ ހަރުފަތަކަށް ގެންގޮސްދިން މުހިންމު ކާމިޔާބީއެކެވެ.
ދިވެހިރާއްޖެއަކީ ދުނިޔޭގެ ފެންވަރުގައި މަޝްހޫރު ފަތުރުވެރިކަމުގެ މަންޒިލެއްގެ ގޮތުގައި ދެމި އޮތުމަށް މިކާމިޔާބީން އިތުރު ބާރެއް ލިބިގެންދާނެ ބާރެއްކަމަށާއި، މި ކާމިޔާބީ ހާސިލްކުރެވުނީ ދިވެހި ސަރުކާރުންނާއި އަމިއްލަ ކުންފުނިތަކާއި އަދި ދިވެހި ރައްޔިތުންގެ ގުޅިގެން ކުރި ބުރަ މަސައްކަތުންނެވެ. އެހެންކަމުން މި މުހިއްމު މަރުހަލާ ހާސިލްކުރެވުމުގެ ސަބަބުން، ރާއްޖޭގެ އިގްތިސާދަށް އޭގެ ފައިދާ ކުރާނެ ކަމަށް ވެސް ވަނީ ފާހަގަކޮށްފައެވެ.
2025 ވަނަ އަހަރުގެ 2 މިލިއަން ވަނަ ފަތުރުވެރިޔާ މިސް ބެތަނީ ސާރާ ކާރސްވެލް އެވެ. ދިވެހިރާއްޖެއަށް ވަޑައިގަތުމުން، އެކަމަނާއަށް ވަރަށް ހޫނު މަރުހަބާއެއް ވަނީ ދަންނަވާފައެވެ ރާއްޖޭގެ ފަތުރުވެރިކަމާ ބެހޭ ވުޒާރާއާއި، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ) އިން ވަނީ މިސް ކާރސްވެލް އަށް ހޫނު މަރުހަބާއެއް ދަންނަވައި، އެކަމަނާގެ ދަތުރުގައި ދިވެހިންގެ ހަޤީޤީ ހޫނު މެހެމާންދާރީ ތަޖުރިބާ ކުރެއްވުމަށް އުއްމީދުކުރާކަން ފާހަގަކޮށްފައެވެ.
މިއީ ރާއްޖޭގެ އިޤްތިޞާދަށް ވަރަށް މުހިންމު ކާމިޔާބީއެއްކަމަށާއި، ފަތުރުވެރިކަމަކީ ރާއްޖޭގެ މައިގަނޑު އާމްދަނީގެ މަސްދަރަށް ވާއިރު، މި އަދަދު މިހާ އަވަހަށް ހަމަވުމަކީ ރާއްޖޭގެ ފަތުރުވެރިކަން ދުނިޔޭގައި ބާރަށް ކުރިއަރަމުންދާކަން ދައްކުވައިދޭ ކަމެއް ކަމަށްވެސް ފާހަގަކޮށްފަ ވެއެވެ، މި ކާމިޔާބީއަކީ ރާއްޖޭގެ ފަތުރުވެރިކަން އިޝްތިހާރުކުރުމަށް ކުރެވޭ މަސައްކަތްތަކުގެ ނަތީޖާ ކަމަށް މާހިރުން ދެކޭކަމަށެވެ. ދިވެހިރާއްޖޭގެ ރީތިކަމާއި، ސާފު މޫދާއި، ރައްޓެހި މީހުންނަކީ ދުނިޔޭގެ އެކި ކަންކޮޅުތަކުން ފަތުރުވެރިން ދިވެހިރާއްޖެއަށް ގެނުވާ މައިގަނޑު ސަބަބު ކަމަށް ވެސް މިނިސްޓްރީބން ފާހަގަ ކޮށްފައި ވެއެވެ.