ވޯލްޑް ޓްރެވެލް އެވޯޑްސް 2026ގައި އިންޑިއަން އޯޝަންސް ލީޑިން ޑެސްޓިނޭޝަން އެވޯޑާއެކު ރާއްޖެއަށް ޖުމުލަ 5 އެވޯޑު ލިބިއްޖެއެވެ.
މިއީ އިންޑިއަން އޯޝަންސް ލީޑިން ޑެސްޓިނޭޝަންގެ މަޤާމު ރާއްޖެއަށް ލިބުނު 7 ވަނަ ފަހަރެވެ.ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސް ރޯޑްސްގައި ބޭއްވި "ވޯލްޑް ޓްރެވެލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ 2026" ގައި ރާއްޖެއިން 5 އެވޯޑެއްވަނީ ހޯދާފައެވެ.އެގޮތުން ޖެހިޖެހިގެން 7 ވަނަ ފަހަރު ރާއްޖެއިން އިންޑިއަން އޯޝަންސް ލީޑިން ޑެސްޓިނޭޝަންގެ މަޤާމު ހޯދުމުގެ އިތުރުން އިންޑިއަން އޯޝަންސް ލީޑިންގ ޑައިވް ޑެސްޓިނޭޝަން 2026އާއި އިންޑިއަން އޯޝަންސް ލީޑިން ގްރީން ޑެސްޓިނޭޝަން 2026، އަދި އިންޑިއަން އޯޝަންސް ލީޑިންގ ހަނީމޫން ޑެސްޓިނޭޝަން 2026 ވަނީ ރާއްޖެއަށް ލިބިފައެވެ. މީގެއިތުރުން އިންޑިއަން އޯޝަންސް ލީޑިންގ ޓޫރިސްޓް ބޯޑުގެ ލަޤަބުވަނީ ވިޒިޓް މޯލްޑިވްސް ކޯޕަރޭޝަނަށް ލިބިފައެވެ.ވިޒިޓް މޯލްޑިވްސްއިން ބުނީ މިހަފްލާގެ ތެރެއިން ރާއްޖޭގެ 15އަށްވުރެ ގިނަ ފަތުރުވެރިކަމުގެ ބްރޭންޑްތަކުން އިންޑިއާ ކަނޑުގެ އެކި ދާއިރާތަކުން އެވޯޑު ހާސިލުކޮށްފައިކަމަށެވެ. އޭގެ ތެރޭގައި ރިސޯޓުތަކާއި، ލަގްޒަރީ ހޮސްޕިޓޭލިޓީއާއި އެވިއޭޝަންއާއި، ޑައިވިން، އާއިލީ އަދި ހަނީމޫން ދަތުރުތަކާއި، ޕްރައިވެޓް އައިލެންޑް ތަޖުރިބާތަކާއި، ސުޕަރ ޔޮޓް ފަތުރުވެރިކަމުގެ އިތުރުން ޒިންމާދާރު ފަތުރުވެރިކަމުގެ ދާއިރާތައް ހިމެނޭކަމަށް ވިޒިޓް މޯލްޑިވްސްއިން ވިދާޅުވެއެވެ.
ރާއްޖެއިންވަނީ 2020 ވަނަ އަހަރުން ފެށިގެން 2025 އާއި ހަމައަށް ޖެހިޖެހިގެން 6 އަހަރު ދުނިޔޭގެ އެންމެ ކުރިއަރާފައިވާ މަންޒިލްގެ މަޤާމު ހޯދާފައެވެ. މީގެއިތުރުންވެސް ވޯލްޑްސް ލީޑިންގ ޓޫރިސްޓް ބޯޑާއި ލީޑިންގ ގްރީން ޑެސްޓިނެޝަނާއި ލީޑިންގ ބީޗް ޑެސްޓިނޭޝަންގެ ފަދަ ދާއިރާތަކުންވެސް ރާއްޖެއިންވަނީ ކާމިޔާބުކޮށްފައިވެއެވެ.މިއަހަރުގެ ގާލާ ހަރަކާތުގައި ދުނިޔޭގެ 40 އަށްވުރެ ގިނަ ޤައުމުން ފަތުރުވެރިކަމުގެ ދާއިރާގެ އިސްފަރާތްތަކުން ވަނީ ބައިވެރިވެފައެވެ. އޭގެތެރޭގައި ޓޫރިސްޓު ބޯޑާއި، ހޮޓާތަކާއި، ރިސޯޓުތަކުގެ އިތުރުން އެއަރލައިންތަކާއި ފަތުރުވެރިކަމުގެ މީޑިއާތައް ހިމެނެއެވެ.
ވޯލްޑް ޓްރެވެލް އެވޯޑްސްއަކީ 1993 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ ދުނިޔޭގެ ފަތުރުވެރިކަމާއި ދަތުރުފަތުރުގެ ސިނާއާތުގައި ދެމުން އަންނަ އެންމެ ޝަރަފުވެރި އެވޯޑެވެ.
ރޭފެ ހަފްލާ ޝަރަފުވެރިކޮށްދެއްވީ ފަތުރުވެރިކަމާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ. ހަފްލާގައި ވާހަކަފުޅުދައްކަވަމުން ވަޒީރު ވަނީ ރާއްޖޭގައި ވޯލްޑް ޓްރެވެލް އެވޯޑްސް ފަދަ މުހިންމު އިވެންޓެއް ރާއްޖޭގައި ބޭއްވިގެންދިޔުމަކީ ޝަރަފެއްކަމަށާއި އޭގެ ސަބަބުން ރާއްޖެއަށް އިތުރު ސަމާލުކަމެއް ލިބިގެންދާނެކަމަށް ވިދާޅުވެފައެވެ. އަދި މިފަހަރު މިއެވޯޑު ހޯސްޓްކުރުމަށްޓަކައި ރާއްޖެ ޚިޔާރުކުރީތީ ވަޒީރުވަނީ ޓްރެވެލް އެވޯޑްސްއަށް ޝުކުރުއަދާކުރައްވާފައެވެ.
ފަތުރުވެރިކަމާ ބެހޭ ވަޒީރުގެ ވާހަކަފުޅުގައި ވިދާޅުވީ ރާއްޖޭގެ ފަތުރުވެރިކަން މީގެ 54 އަހަރުކުރިން ފެށިގެން އައިގޮތުގެ މައްޗަށް އަލިއަޅުއްވާލައްވާފައެވެ. އަދި ރާއްޖޭގެ ފަތުރުވެރިކަމުގެ ސިނާޢަތަކީ މިއަދު ދުނިޔޭގައި ފާހަގަކޮށްލެވޭ ކާމިޔާބު ސިނާޢަތެއްކަން ފާހަގަކުރައްވާ ވަޒީރު ވިދާޅުވީ މިއަދު ދެކޭ ކާމިޔާބީއަށް އައުމުގައި ސިނާޢަތުގެ ބާނީންނާއި މިދާއިރާގައި އެކި ގޮތްގޮތުން މަސައްކަތްކުރާ ހުރިހާ މަސައްކަތްތެރިންގެ ހިތްވަރުންކަމަށް ވަޒީރު ވިދާޅުވިއެވެ.
މިއަދު ރާއްޖޭގެ ފަތުރުވެރިކަމުގެ ސިނާޢަތް ސިންދަފާތުކުރުމަށް ކުރަމުންދާ މަސައްކަތްތަކާއެކު ގިނަ ޢަދަދެއްގެ ދިވެހީންނަށް ފަތުރުވެރިކަމުގެ ސިނާޢަތުގެ ފައިދާ މިހާރު ލިބެމުންދާކަން ވަޒީރު ފާހަގަކުރެއްވިއެވެ.