ޑްރަގް ވިއްކައިގެން ރައްޔިތުން ހާލުގައި ޖައްސާފައިކުރާނެ ވިޔަފާރި އެއް ދެން ރާއްޖެއަކު ނޯންނާނެކަމަށް ވަޒީރު އިހުސާން ވިދާޅުވެއްޖެއެވެ.
ރޭ ބޭއްވި އަހާ ފޯރަމްގައި ވާހަކަ ދައްކަވަމުން ވަޒީރު ވިދާޅުވީ ޑްރަގްގެ ވިޔަފާރިކުރާ މައްސަލަތަކާއި ގުންހުރި 3.6 މިލިއަން ދިވެހި ރުފިޔާ އާއި 48000 ޑޮލަރު ކޭޝް ނެގިފައި ހުރި މައްސަލަތައް ހިމެނޭކަމަށާއި އެތައް ހާސް ޑޮލަރަކާއި ރުފިޔާއެއްގެ މުދާ ފުލުހުންގެ ބެލުމުގެ ދަށަށް ގެނެވުނުކަމަށެވެ. އަދި ރާއްޖޭގައި މަސްތުވާތަކެތީގެ ވިޔަފާރިކުރާ 24 ޑްރަގް ނެޓްވޯކެއްގެ މައްސަލަ ބަލަމުންދާކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ ސަރުކާރުގެ އަމާޒަކީ، މަސްތުވާތަކެތި ބޭނުންކުރާ ފަރާތްތަކަށް ފަރުވާދިނުމާއި، މަސްތުވާތަކެތީގެ ސަޕްލައި ހުއްޓުވުންކަމަށެވެ. އެގޮތުން ކުރި މަސައްކަތުން މިދިޔަ ދެ އަހަރާ ބައިގެ ތެރޭގައި 1.3 ޓަނުގެ މަސްތުވާތަކެތި އަތުލައިގަނެފައިވާކަމަށް ވަޒީރު ވިދާޅުވިއެވެ.
އެތަކެތީގެ އަގު 1.5 ބިލިއަން ދިވެހި ރުފިޔާއަށް އަރައެވެ. މިއި ކުރީ ސަރުކާތުތަކުގެ ފުރަތަމަ 3 އަހަރާއި އަޅާ ބަލާއިރު މަސްތުވާތަކެތި އަތުލައިގަތުމުގައި ރެކޯޑް އަދަދަދެއްކަމަށް ވަޒީރު ފާހަގަކުރެއްވިއެވެ.
މީގެ އިތުރުން މަސްތުވާތަކެތީގެ ވިޔަފާރިކުރާ ނެޓްވޯކްތައް ހުއްޓުވުމަށް އަމާޒުކޮށްގެން ހިންގާފައިވާ އޮޕަރޭޝަންތަކުގެ ނަތީޖާ ރަނގަޅުކަމަށް ވަޒީރުވަނީ ވިދާޅުވެފައެވެ. ޑްރަގް ކެފޭއެއްގެ ގޮތުގައި ތަންތަން ހިންގުމަކީ ދިމާވާ ވަރަށް ބޮޑު ގޮންޖެހުމެއްކަމަށް ވަޒީރު ވިދާޅުވިއެވެ. ޑްރަގްގެ ޚިދުމަތްދޭ ތަންތަން ބަންދުކުރުމުން، ޖެހިގެން އަންނަ ދުވަހު އެތަން ހުޅުވައިގެން ވިޔަފާރިކުރަމުންދާކަމަށާ، އެކަން ހައްލުކުރުމަށް އެއް ތަނަކަށް ތަކުރާރުކޮށް ރެއިޑްކޮށްފައިވާނެކަމަށް ވަޒީރު ވިދާޅުވިއެވެ.
އެގޮތުން ،ިދިޔަ ދެ އަހާރާއި ބައިގެ ތެރޭގައި އެއްތަނަކަށް 150 ފަހަރު ރެއިޑްކޮށްފައިވާ ކަމަށާއި މިކަންކަން ބަދަލުކުރުމަށް ޤާނޫނަށް ބަދަލުގެނެސް ޤާނޫނީ ގޮތުން އެތަންތަން ބަންދުކުރަމުން ގެންދާކަމަށް ވަޒީރުވަނީ ވިދާޅުވެފައެވެ.
އެގޮތުން މިދިޔަ 3-4 މަހުގެ ތެރޭގައި ޑްރަގްގެ ޚިދުމަތްދެމުންދިޔަ 17 ތަނެއް ބަންދުކޮށްފައިވާކަމަށް ވަޒީރު ވިދާޅުވިއެވެ. އޭގެތެރޭގައި ހިމެނެނީ އައްޑުއަތޮޅުގެ 4 ތަނާއި، ފުވައްމުލަކުގެ 1ތަނާއި، މާލޭގެ 12 ތަނެވެ. ކުރިއަށް މިއޮތް ނޮވެމްބަރު މަހާއި ހަމައަށް މާލޭގައި އެގޮތަށް ޑްރަގް ވިޔަފާރި ހިންގާ ކެފޭގެ ގޮތުގައި ހިންގާ ހުރިހާތަނެއް ބަންދުކުރުމަކީ އަމާޒެއްކަމަށް ވަޒީރު ވިދާޅުވިއެވެ.
މީގެއިތުރުން އެހެނިހެން ކުށްތައް ހުއްޓުވުމަށް ޚާއްސަ ފިޔަވަޅުތަކެއް ސަރުކާރުން އަޅާފައިވާކަމަށް ވަޒީރު ވިދާޅުވިއެވެ. އޭގެ ތެރޭގައި ގްރޫޕް ހަދައިގެން ކުށް ހިންގުން ނުވަތަ ގޭންގް ހަރަކާތްތައް ހިނގާކަމަށް ފާހަގަކުރެވޭ ތަންތަނުގައި ފުލުހުން އިތުކޮށް، އެފަދަ ފަރާތްތައް އަނބުރާ މުޖުތަމަޢުއަށް ނުކުތުމަށް އެހީވުމަށް މަސައްކަތްތަކެއް ކުރެވިފައިވާކަމަށް ވަޒީރު ވިދާޅުވިއެވެ.
ގޭންގްތަކަށް އަމާޒުކޮށް ސަރުކާރުން 52 އޮޕަރޭޝަން ހިންގާފައިވާކަމަށްވެސް ވަޒީރު ފާހަގަކުރެއްވިއެވެ. އޭގެ ތެރެއިން 10،450 މީހުން ޗެކްކޮށް 517 މީހުން ފުލުހުންގެ ބެލުމުގެ ދަށަށް ގެންގޮސްފައިވާކަމަށާ، އެ މީހުންނާއި ގުޅުންހުރި 770 ސައިކަލު ފުލުހުންގެ ބެލުމުގެ ދަށަށް ނަގާފައިވާކަމަށް ވަޒީރު ވިދާޅުވިއެވެ.