ބ. ދަރަވަންދޫ އެއާޕޯޓުގެ ޓާމިނަލް ބޮޑުކުރުމުގެ މަސައްކަތް ކޮށްދޭނެ ބަޔަކު ހޯދުމަށް އައިލެންޑް އޭވިއޭޝަނުން އަލުން އިއުލާންކޮށްފިއެވެ.
އެ ޓާމިނަލް ތަރައްގީކޮށްދޭނެ ބަޔަކު ހޯދަން އައިލެންޑް އޭވިއޭޝަނުން އެންމެ ފުރަތަމަ އިއުލާންކުރީ މި އަހަރުގެ މެއި މަހުއެވެ.
އެ ކުންފުނިން ކުރި އިއުލާނުގައި ވާގޮތުން، ކޮންޓްރެކްޓާ ފައިނޭންސް އުސޫލުން ދަރަވަންދޫ އެއާޕޯޓުގެ ޓާމިނަލް ތަރައްގީކުރުމަށް ޝައުގުވެރިވާ ފަރާތްތަކަށް އެ ފުރުސަތު މިހާރު ވަނީ ހުޅުވާލެވިފައެވެ. މި މަސައްކަތަށް ޝައުގުވެރިކަން ފާޅުކުރުމުގެ ސުންގަޑިއަކީ އަންނަ އަންގާރަ ދުވަހުގެ ރޭގަނޑު 11:59 އެވެ. އަދި މަޝްރޫޢަށް ޕްރޮޕޯސަލް ހުށަހެޅުމުގެ ސުންގަޑިއަކީ ސެޕްޓެންބަރުމަހުގެ 10 ވަނަ ދުވަހެވެ.
ޓާމިނަލް ބޮޑުކުރުމުގެ މަސައްކަތް އެ ޕްރޮޖެކްޓް ފަށާ ދުވަހުން ފެށިގެން 18 މަސް ދުވަހުގެ ތެރޭގައި ނިންމަން ޖެހޭނެ ކަމަށް އެ ކުންފުނިން ބުނެއެވެ.
މީގެ އިތުރުން އައިލެންޑް އޭވިއޭޝަނުން ބުނީ ކޮންޓްރެކްޓަރު ހޮވުމުގައި ކުރިން އެފަދަ ޕްރޮޖެކްޓެއް ހިންގާފައިވާ ނުވަތަ 50 މިލިއަން ރުފިޔާއަށް ވުރެ މަތީ ޕްރޮޖެކްޓްތައް ހިންގާފައިވާ ޕާޓީތަކަށް އިސްކަން ދޭނެ ކަމަށެވެ.
ދަރަވަންދޫ އެއާޕޯޓުގެ ޓާމިނަލް ތަރައްގީކުރާނެ ބަޔަކު ހޯދަން އިއުލާންކުރި މިއީ ދެވަނަ ފަހަރެވެ. މި މަސައްކަތަށް އެންމެ ފުރަތަމަ އިއުލާންކޮށްފައިވަނީ މިދިޔަ މެއި މަހުގެ ތެރޭގައެވެ. ނަމަވެސް އެކި ސަބަބުތަކާ ހުރެ އެ ފަހަރު މަސައްކަތް ކުރިއަށް ގޮސްފައެއް ނުވެއެވެ.
އޮކްޓޫބަރު 17، 2012 ގައި ހުޅުވާ، މިހާތަނަށް ކޯސްޓްލައިން ހޮޓެލްސް އެންޑް ރިސޯޓްސް އިން ހިންގަމުން އައި ދަރަވަންދޫ ޑޮމެސްޓިކް އެއާޕޯޓު އިތުރަށް ތަރައްގީކުރުމަށްޓަކައި ސަރުކާރުން އައިލެންޑް އޭވިއޭޝަނާ ހަވާލުކުރީ މިއަހަރުގެ އެޕްރީލް މަހުގެ 1 ވަނަ ދުވަހުއެވެ. މި އެއާޕޯޓަކީ މިހާރުވެސް ދުވާލަކު އެވްރެޖްކޮށް 8 ފްލައިޓަށް ވުރެ ގިނަ ފްލައިޓް ޖައްސާ، ބާރުބޮޑު އެއާޕޯޓެކެވެ. އެއާއިއެކު، މި އެއާޕޯޓުގެ ޓާމިނަލް ބޮޑުކުރުމަކީ ޚިދުމަތުގެ ފެންވަރު ރަނގަޅުކުރުމަށް ސަރުކާރުން ނިންމި މުހިންމު ނިންމުމެކެވެ.
ދަރަވަންދޫ އެއަރޕޯޓަކީ ރާއްޖޭގެ އެންމެ ބާރުބޮޑު އެއް އެތެރޭގެ އުދުހުންތަކުގެ މަރުކަޒެވެ. މިގޮތުން ޔުނެސްކޯ ބަޔޯސްފިއަރ ރިޒަރވްއެއް ކަމުގައިވާ ބާ އަތޮޅުގައި 16 ރިސޯޓާއި 79 އަށްވުރެ ގިނަ ގެސްޓްހައުސް ހިންގަމުންދާއިރު، މިހާތަނަށް އެ އެއަރޕޯޓުން 42,000 އަށްވުރެ ގިނަ ފްލައިޓް ދަތުރުކޮށް، 1.8 މިލިއަން މީހުންނަށް ވަނީ ޚިދުމަތްދީފައެވެ.