މިއަހަރުގެ ފެބުރުވަރީ މަހު ސީ-ޓު-އެއާ ކާގޯ ޚިދުމަތް މެދުވެރިކޮށް 99 ޓަނުގެ މުދާ ރާއްޖެއިން ބޭރަށް ފޮނުވާފައިވާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ތަފާސްހިސާބުތަކުން ދައްކައިފިއެވެ.
ރާއްޖޭގައި ސީ ޓު އެއާ ކާގޯގެ ހިދުމަތް ފަށާފައިވަނީ 2024 ވަނަ އަހަރުގެ މެއި މަހުގެ 15 ވަނަ ދުވަހެވެ.
އެމްޕީއެލް ބުނީ، ސީ ޓު އެއާ ކާގޯ ހިދުމަތުން ފެބްރުއަރީ މަހު 99 ޓަނަށް ވުރެ ގިނަ މުދާ އުފުލާފައިވާ ކަމަށެވެ. މިއީ ކޮންޓެއިނަރުގެ އަދަދަށް ބަލާނަމަ 20 ޓީއީޔޫސްގެ މުދަލެވެ. އެމްޕީއެލް އިން އާންމުކޮށްފައިވާ ތަފާސްހިސާބުތައް ދައްކާގޮތުން، ނިމިދިޔަ ފެބުރުވަރީ މަހު ހަ އެއާލައިނެއް މެދުވެރިކޮށް ދުނިޔޭގެ ހަ ޤައުމަކަށް ވަނީ ރާއްޖެއިން މުދާ ފޮނުވާފައެވެ. ސީ-ޓު-އެއަރ ކާގޯގެ ޚިދުމަތަކީ ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ޤައުމުތަކަށް ފޮނުވުމަށް ފަށާފައިވާ ޚިދުމަތެކެވެ.
މިދިޔަ މަހު މި ޚިދުމަތް ބޭނުންކޮށްގެން މުދާ އުފުލާފައިވާ އެއާލައިންތަކުގެ ތެރޭގައި ވަރޖިން އެޓްލާންޓިކް، އިއްތިހާދު އެއާވޭސް، ލުފްތަންސާ، ސްވިސް އެއާލައިން، ޓާކިޝް އެއާލައިން އަދި ގަތަރު އެއާވޭސް ހިމެނެއެވެ. މިހާތަނަށް މި ޚިދުމަތާ 17 އަށްވުރެ ގިނަ އެއަރލައިން ވަނީ ގުޅިފައެވެ.
ސީ ޓު އެއާ ހިދުމަތުގެ ސަބަބުން ބައިނަލްއަގްވާމީ ވިޔަފާރީގައި ރާއްޖޭގެ ދައުރު އިތުރުވެ، އިގްތިސާދީ ގޮތުން ވެސް ފައިދާތަކެއް ދަނީ ކުރަމުންނެވެ. އެ ހިދުމަތް ހިންގަމުންދަނީ އެމްޕީއެލް މެދުވެރިކޮށެވެ.
ސީ ޓު އެއާ ކާގޯ ހިދުމަތަކީ ކަނޑު މަގުންނާއި ވައިގެ މަގުން މުދާ އުފުލުމުގެ ހިދުމަތް އެއްކޮށްލައިގެން ދެވޭ ހިދުމަތެކެވެ.
ސަރުކާރުން ބުނާގޮތުގައި، ރާއްޖެއަކީ ބައިނަލްއަޤްވާމީ ގިނަ އެއާލައިންތަކަކުން ދަތުރުކުރާ މަންޒިލަކަށް ވުމުން، ސީ-ޓު-އެއަރ ކާގޯގެ ޚިދުމަތް ފުޅާކުރުމުގެ ފުރުޞަތު ރާއްޖެއަށް ވަރަށް ބޮޑަށް އެބައޮތެވެ.