ބެލަރުސްގެ ގައުމީ އެއާލައިން، ބެލާވިއާއިން ރާއްޖެއަށް ސީދާ ދަތުރުތައް ފެށުމަށް ތައްޔާރުވެއްޖެއެވެ.
މި ދަތުރުތައް ފެށުމަށް ހަމަޖެހިފައިވަނީ އަންނަ އޮގަސްޓް މަހުން ފެށިގެންނެވެ. މިއީ ބެލާރުސްއާއި ރާއްޖެއާ ދެމެދު ވައިގެ މަގުން ގުޅާލުމަށް އެޅޭ މުހިންމު ފިޔަވަޅެކެވެ.
ބެލާވިއާ އެއާލައިންގެ މެނޭޖްމަންޓުން ހާމަކުރި ގޮތުގައި، ދުރު ރާސްތާގެ މަންޒިލެއްގެ ގޮތުގައި ރާއްޖެއަކީ ވަރަށް އުންމީދީ މާކެޓެކެވެ. އަޖުމަބެލުމުގެ ގޮތުން ފެށުމަށް ހަމަޖެހިފައިވާ މި ދަތުރުތަކުގައި ފުރަތަމަ މަރުހަލާގައި ހަޔަކާއި އަށަކާ ދެމެދުގެ އަދަދަކަށް ފްލައިޓް ބޭއްވުމަށް ވަނީ ރާވާފަ އެވެ. މި ދަތުރުތަކުގެ ކާމިޔާބީއަށް ބަލައި، ކުރިއަށް އޮތް ތަނުގައި ދަތުރުތައް އިތުރުކުރުމާމެދު ގޮތްތަކެއް ނިންމާނެ ކަމަށް އެ އެއާލައިނުން ބުނެ އެވެ.
ބެލާވިއާ އެއާލައިންގެ މެނޭޖްމަންޓުން ހާމަކުރި ގޮތުގައި، ރާއްޖެއަކީ ދިގު ދަތުރުތަކަށް އުންމީދީ މަންޒިލެކެވެ. މި ދަތުރުތައް ފެށުމަށް ހަމަޖެހިފައިވަނީ ޓްރަޔަލް ފޭސްއެއްގެ ގޮތުގައެވެ. އެގޮތުން 6 އަކާއި 8 އަކާ ދެމެދުގެ އަދަދަކަށް ޓްރަޔަލް ފްލައިޓް ބޭއްވުމަށް ނިންމާފައިވާ ކަމަށް އެ އެއާލައިނުން މައުލޫމާތުދެއެވެ. މި މުއްދަތުގައި މާކެޓްގެ ޑިމާންޑާއި އޮޕަރޭޝަނަލް ކަންކަން ބެލުމަށްފަހު ދާއިމީ ދަތުރުތަކާ މެދު ގޮތެއް ނިންމާނެ ކަމަށް އެ އެއާލައިނުން ބުނެއެވެ.
ދުނިޔޭގެ މަސްރަހަށް، ހާއްސަކޮށް މެދުއިރުމައްޗަށް ދިމާވެފައިވާ ނުތަނަވަސްކަމާ ގުޅިގެން ވައިގެ ދަތުރުފަތުރަށް ބުރޫއަރަމުންދާ މި ދަނޑިވަޅުގައި، ގިނަ އެއާލައިންތަކަކުން ދަނީ ރާއްޖެއަށް ކުރާ ދަތުރުތައް އިތުރުކުރަމުން ނެވެ. އެގޮތުން ބްރިޓިޝް އެއާވޭޒްއިން ހަފްތާއަކު ކުރާ ދަތުރުތައް ތިނަކުން ހަތަރަކަށް މިހާރު ވަނީ އިތުރުކޮށްފަ އެވެ.
ސްވިޒަލޭންޑްގެ އެޑެލްވައިސް އެއާލައިނުންވެސް ވަނީ އޭޕްރީލް މަހުގެ ތެރޭގައި ރާއްޖެއަށް 20 ދަތުރު ކުރުމަށް ތާވަލުކޮށްފަ އެވެ. މީގެ އިތުރުން އެއާ އިންޑިއާއިން ވަނީ ދުނިޔޭގެ ވައިގެ މަގުތަކަށް އަންނަ ބަދަލުތަކާ ގުޅިގެން މާޗު 10 އިން 18 އަށް އިތުރު 78 ދަތުރު ބާއްވާފަ އެވެ. މީގެ ތެރޭގައި ދިއްލީ އާއި މުމްބާއީ އިން މާލެއަށް ކުރި ދަތުރުތައް ހިމެނެ އެވެ. މި ދަތުރުތަކުގައި ބޭނުންކޮށްފައިވަނީ އޭ320 ނިއޯ މަރުކާގެ ބޯޓުތަކެވެ.
މީގެ އިތުރުން، ޖަރުމަނުވިލާތުގެ އެއާލައިނެއް ކަމަށްވާ ކޮންޑޯއިން ހޫނު މޫސުމުގައި ރާއްޖެއަށް ދަތުރުތައް އަލުން ފެށުމަށްވެސް ވަނީ ނިންމާފައެވެ. އެގޮތުން، ޖަރުމަނުގެ ފްރެންކްފާާޓުން ވެލާނާ އިންޓަރނޭޝަނަލް އެއާޕޯޓަށް ހަފުތާއަކު ހަތަރު ދުވަހު ދަތުރު ކުރުމަށް ވަނީ ހަމަޖެހިފައެވެ. މި އޮޕަރޭޝަންތައް ކުރިއަށްދާނީ މެއި މަހުގެ ފުރަތަމަ ދުވަހުން ފެށިގެން އޮކްޓޫބަރު މަހުގެ ނިޔަލަށް ކޮންމެ ހަފުތާއަކު 4 ދުވަހު ކަމަށްވެސް އެ އެއާލައިނުން މައުލޫމާތުދެއެވެ.
ރާއްޖެއަށް ވައިގެ މަގުން އައުމަށް ހުރި ތަފާތު ގޮތްތަކާއި، ޕްރައިވެޓް އޭވިއޭޝަނަށް ހާއްސަކޮށްފައިވާ އިންފްރާސްޓްރަކްޗަރގެ ސަބަބުން، ދުނިޔޭގެ ދަތުރުފަތުރުގެ އޮއިވަރަށް ބަދަލު އައި ނަމަވެސް ރާއްޖެއަކީ ފަސޭހައިން އާދެވޭ މަންޒިލެއްގެ ގޮތުގައި ދެމިއޮވެއެވެ.