ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު ކަމަށްވާ "އައިޓީބީ ބާލިން 2027" ގެ ރަސްމީ ހޯސްޓް ކަންޓްރީގެ ގޮތުގައި ރާއްޖެ ހަމަޖައްސައިފިއެވެ.
މިކަމާ ގުޅޭ އެއްބަސްވުމުގައި ސޮއިކުރުން އޮތީ މިހާރު ޖަރުމަނުވިލާތުގައި ކުރިއަށްދާ އައިޓީބީ ބާލިން 2026 މައުރަޒުގެ ރާއްޖޭގެ އެގްޒިބިޝަން ސްޓޭންޑުގައި ބޭއްވި ހާއްސަ ރަސްމިއްޔާތެއްގައެވެ. މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ވިޒިޓް މޯލްޑިވްސް ކޮޕަރޭޝަން (ވީއެމްސީ) ގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީއެވެ. މެސޭ ބާލިންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޑރ. މާރިއޯ ޓޯބިއަސްއެވެ.
ހޯސްޓް ކަންޓްރީގެ ހައިސިއްޔަތުން، 15 މާރިޗު 2027 ގައި ބާއްވާ ރަސްމީ އިފްތިތާހީ ގާލާ އިވެންޓް ބާއްވާނީ ރާއްޖެއިންނެވެ. އަދި 16 އިން 18 މާރިޗަށް ކުރިއަށްދާ މައުރަޒުގެ ތެރޭގައި ތަފާތު ހަރަކާތްތަކާއި، ސަގާފީ ހުށަހެޅުންތަކާއި، ނެޓްވޯކިން އިވެންޓުތައް ރާއްޖެއިން ކުރިއަށް ގެންދާނެއެވެ.
މި ރަސްމިއްޔާތުގައި ވާހަކަދައްކަވަމުން ޑރ. ޓޯބިއަސް ވިދާޅުވީ، ރާއްޖޭގެ ހިތްގައިމު ރީތިކަމާއި ކުރިއަރަމުން އަންނަ ފަތުރުވެރިކަން ބައިނަލްއަގުވާމީ މައިދާނުގައި އިޝްތިހާރު ކުރުމަށް އައިޓީބީ ބާލިންއަކީ އެންމެ އެކަށީގެންވާ މަންސަ ކަމަށެވެ. އަދި މި މައުރަޒަކީ މުޅި ދުނިޔޭގެ ފަތުރުވެރިކަމުގެ ދާއިރާގެ ހިއްސާދާރުންނާއި މާހިރުން އެއްތަނަކުން ބައްދަލުވާ ތަނަކަށް ވުމުން، މިއީ ރާއްޖެއަށް ލިބޭ ވަރަށް މުހިންމު ފުރުސަތެއްކަން އޭނާ ފާހަގަކުރެއްވިއެވެ.
ވީއެމްސީން މައުލޫމާތު ދިން ގޮތުގައި، 2027 ވަނަ އަހަރުގެ ހޯސްޓް ކަންޓްރީގެ ހައިސިއްޔަތުން ރާއްޖޭގެ ފަތުރުވެރިކަމުގެ ހުރިހާ ދާއިރާއެއް ފުޅާ ދާއިރާއެއްގައި އިޝްތިހާރު ކުރެވޭނެއެވެ. އޭގެ ތެރޭގައި ލަގްޒަރީ ރިސޯޓުތަކާއި، ބުޓީކް ހޮޓާތަކާއި، ޑައިވިން، މޫދު ކުޅިވަރު، ވެލްނަސް އަދި ސަގާފީ ފަތުރުވެރިކަން ހިމެނެއެވެ.
މީގެ އިތުރުން، ތިމާވެށި ހިމާޔަތްކުރުމާއި ދެމެހެއްޓެނިވި ފަތުރުވެރިކަމަށް ރާއްޖެއިން ކުރާ މަސައްކަތްތައް ވެސް ދުނިޔެއަށް ދައްކާލާނެއެވެ.މިކަމާ ގުޅޭގޮތުން ޝިއުރީ ވިދާޅުވީ، މިއީ ރާއްޖޭގެ ރަށްތަކުން ލިބޭ ތަފާތު ތަޖުރިބާތައް ދުނިޔެއަށް ހާމަކޮށްދިނުމަށް ލިބޭ ރަނުގެ ފުރުސަތެއް ކަމަށެވެ.
އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދާދިފަހުން ޖަރުމަނުވިލާތަށް ކުރެއްވި ރަސްމީ ދަތުރުފުޅަކީ ވެސް ދެ ގައުމުގެ ގުޅުން ބަދަހިވެ، ފަތުރުވެރިކަމުގެ ދާއިރާގައި ރާއްޖޭގެ މުހިންމުކަން ހާމަވެގެންދިޔަ ދަތުރުފުޅެއްކަން އޭނާ ފާހަގަކުރެއްވިއެވެ. މިއީ 2016 ވަނަ އަހަރަށްފަހު، މި ޝަރަފުވެރި މަގާމު ރާއްޖެއަށް ލިބުނު ފުރަތަމަ ފަހަރެވެ. މީގެ 10 އަހަރު ކުރިން ލިބުނު އެ ފުރުސަތުގައި ވެސް ރާއްޖެއިން ވަނީ ފަތުރުވެރިކަން ކުރިއަރުވައި އިޝްތިހާރުކުރުމަށް މުހިންމު އަދި ކާމިޔާބު ހަރަކާތްތަކެއް ހިންގާފައެވެ.