ފްލޮރިޑާއަށް ކުޑަ މަތިނަދާ

އެމެރިކާގެ ފްލޮރިޑާގެ ޕާމް ބީޗް ކައުންޓީއަށް 'ލިއަރޖެޓް 60' މަރުކާގެ މަތިންދާބޯޓެއް ވެއްޓި، އޭގައި ދަތުރުކުރި ނުވަ މީހުން މަރުވެއްޖެއެވެ.

މިއީ މިއަހަރު އެމެރިކާގައި ހިނގި މިފަދަ ދެވަނަ ހާދިސާއެވެ.

ހާދިސާ ހިނގުމުގެ ކުޑަ ވަގުތުކޮޅެއް ކުރިން، ބޯޓުގެ ބޭރުގެ ފިނިހޫނުމިން މައިނަސް 47 ޑިގްރީ ސެލްސިއަސްގައި ހުރިއިރު، ފިޔަގަނޑުގައި ގަނޑުފެން ހެދެމުންދާ ކަމުގެ ރިޕޯޓު، ޕައިލެޓު ވަނީ ކަމާގުޅޭ ފަރާތްތަކާ ހިއްސާކޮށްފައެވެ. ނަމަވެސް، ކުއްލިއަކަށް ބޯޓު ކޮންޓުރޯލުން ނެއްޓި، ކުއްލި ނުރައްކަލުގެ ހާލަތު އިއުލާނުކުރަން ޖެހުނެވެ. ބޯޓު ބާރު ސްޕީޑުގައި މިނެޓަކު 20,000 ފޫޓަށް ތިރިވަމުންދާ ކަމަށާއި، "އަހަރެމެން މި ދަނީ ބިމަށް ވެއްޓެން" ކަމަށް ޕައިލެޓް ބުނި އަޑުގެ ރެކޯޑިންގ ވެސް ވަނީ އާންމުވެފައެވެ. ފްލައިޓް ޓްރެކިން ރެކޯޑުތަކުން ދައްކާ ގޮތުގައި، އެއް މިނެޓު ތެރޭގައި ބޯޓު 27،000 ފޫޓަށް ތިރިވިއެވެ.

މި ހާދިސާ ހިނގި ވަގުތު އެ ސަރަހައްދުގައި ގަދަވަޔާއެކު ވިއްސާރަކުރަމުންދިޔައިރު، ވައިގެ ދަތުރުފަތުރާ ބެހޭ އިދާރާއިން އޮތީ ތޫފާނުގެ އިންޒާރު ނެރެފައެވެ. ފިޔަގަނޑުގައި ގަނޑުފެން ހެދުމަކީ ކުދި މަތިންދާބޯޓުތައް ކޮންޓުރޯލު ކުރުމަށް އޮތް ބޮޑު ނުރައްކަލެއް ކަމުގައި ތަހުގީގުކުރާ ފަރާތްތަކުން ބުނެއެވެ. ލިއަރޖެޓް 60 މަރުކާގެ ބޯޓެއް ވެއްޓި މިހާ ގިނަ އަދަދެއްގެ ބަޔަކު މަރުވި މިއީ ފުރަތަމަ ފަހަރެވެ.

މި ހާދިސާގައި އެ ސަރަހައްދުގައި ދިރިއުޅޭ އެއްވެސް މީހަކު މަރުނުވި ނަމަވެސް، މަގު ހަލާކުވެ ބޮޑެތި ގެއްލުންތަކެއް ވަނީ ލިބިފައެވެ.އެމެރިކާގެ ވައިގެ އުދުހުންތަކާ ބެހޭ މައި އިދާރާއާއި (އެފްއޭއޭ) ދަތުރުފަތުރުގެ ސަލާމަތާ ބެހޭ ޤައުމީ އިދާރާއިން (އެންޓީއެސްބީ) މިހާރު ދަނީ މި ހާދިސާ ތަހުގީގު ކުރަމުންނެވެ.