ސިޔާސީ ވިސްނުމުގައި ސަރުކާރު ބަލިކުރަން އިންވެސްޓްމަންޓްތައް ބޭރުކުރީމާ ގެއްލުން ވަނީ ރައްޔިތުންނަށް ކަމަށް ބަންޑާރަ ނާއިބު އަލްއުސްތާޛާ ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.
އާޒިމާ ވިދާޅުވީ ދިވެހިންގެ ޤައުމީ ލަނޑުދަނޑިއަކީ 2040 ވަނަ އަހަރާ ހަމަޔަށް ތަރައްޤީވެފައިވާ ޤައުމަކަށް ދިވެހިރާއްޖެ ވެގެން ދިޔުން ކަމަށެވެ. މިކަން ޙާޞިލުކުރުމަށްޓަކައި ދިވެހިރާއްޖޭގެ ހުރިހާ ވިސްނުންތަކެއް މި މިޞްރާބަށް ބައްޓަންވާންޖެހޭ ކަަމަށް ވެސް ވިދާޅުވިއެވެ.
ސިޔާސީ ވިސްނުމުގައި ސަރުކާރު ބަލިކުރަން އިންވެސްޓްމަންޓްތައް ބޭރުކުރީމާ ގެއްލުން ވަނީ ރައްޔިތުންނަށް ކަމުގައި ފާހަގަ ކުރައްވާ ޢާޒިމާވަނީ މުހިންމު ހަތް ޕޮއިންޓެއް ފާހަގަ ކުރައްވާފައެވެ.
ތަރައްޤީގެ ރާސްތާގައި ދިވެހިންނަށް އެންމެ ކަމުދާ ޤައުމަކީ ސިންގަޕޫރު ކަމަށްވާއިރު ސިންގަޕޫރުގެ ތަރައްޤީއަކީ އިޖްތިމާޢީ އަޚްލާޤާއި، ލަނޑުދަނޑިއަށް ވާޞިލުވާން ތަރައްޤީކުރި ޤައުމީ ވިސްނުންތަކާއި އަދި ޤައުމުގެ ކާމިޔާބީއާ ދެކޮޅަށް ރައްޔިތުން މަސައްކަތްނުކުރުމުގެ ނަތީޖާކަމުގައި ދެންނެވުމަކީ ކުށަކަށްނުވާނެ ކަމުގައި އެކަމަނާ ވިދާޅުވި އެވެ.
ދިވެހިރާއްޖޭގެ ތަރައްޤީއަށް މިއަދު އޮންނާނޭ އެންމެ ބޮޑު ގޮންޖެހުމަކަށް ވާނީ ދިވެހިއާބާދީ މުސްކުޅިވުމާ ދިމާލަށް މިސްރާބުޖެހުމާއި ކަރުދާހުގައި ކުރެހިފައިވާ ދިވެހިންގެ އުންމީދުތައް ޙަޤީޤަތަކަށް ބަދަލުކުރުމަށް ބޭނުންވާނޭ ތަމްރީނުވެފައިވާ އިންސާނީ ވަޞީލަތްތަކާއި އެކަށީގެންވާ އިންވެސްޓްމަންޓްތައް ގެނައުމަށް ބޭނުންވާނޭ ފެކްޓަރސް ފުރިހަމަ ކުރުން ކަމުގައި އާޒިމާގެ ޕޯސްޓްގައި ވިދާޅުވި އެވެ.
އެކަށީގެންވާ މުއްދަތެއް ލިބިނުދީ އެކަށީގެންވާ އިންވެސްޓްމަންޓްތަކެއް ނުގެނެވޭނެ ކަމަށާ ކަންބޮޑުވާންޖެހެނީ 99 އަހަރަށް ކުއްޔަށް ދީގެނެއްނޫން ކަމަށެވެ. އޭގެ ބަދަލުގައި ކަންބޮޑުވާންޖެހޭނީ މުއްދަތުކުރުވިޔަސް ދިވެހި ދައުލަތުގެ ދުސްތޫރީ އަދި ޤާނޫނީ އޮނިގަނޑުގެ ދަށުގައި އިންވެސްޓްމަންޓްތައް ނުހުންނަމަ ވާންޖެހޭ ކަންބޮޑުވުން ކަމުގައި ވިދާޅުވި އެވެ.
ބިން އަދި އިންވެސްޓްމަންޓް ދިވެހިރާއްޖޭގެ ސިޔާދަތީ އަދި ޤާނޫނީ ބާރުވެރިކަމުގެ ދަށުން ނުނެއްޓެވޭނަމަ، ކުއްޔަށް ދިނުމުގެ މައްސަލައެއް އޮވެގެން ނުވާނެ ކަމަށާ ކުއްޔަށް ދިނުމުން ލިބޭ ޤާނޫނީ ބާރުވެރިކަމާއި ބިން މިލްކުވުމުން ލިބޭ ޤާނޫނީ ބާރުވެރިކަމުގައި ޤާނޫނީގޮތުން ވަރަށް ބޮޑެތި ތަފާތުތަކެއް ހުންނާނެ ކަމުގައި ވިދާޅުވި އެވެ.