މާލެ ސަރަހައްދުގައި މަގުމަތީގައި ދިރިއުޅޭ ބުޅާތަކުގެ މައްސަލައަށް ދާއިމީ ހައްލެއް ހޯދުމަށް ހުޅުމާލޭގައި ގާއިމްކޮށްފައިވާ "އޮޅުހިޔާ" ފެސިލިޓީއަށް މިހާތަނަށް 350 ބުޅާ ގެންގޮސްފައިވާ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ދަނޑުވެރިކަމާ ދިރޭތަކެއްޗާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރިޔަމް މާރިޔާ ވިދާޅުވީ، އޮޅުހިޔާގައި ވެޓް ކްލިނިކްގެ މަސައްކަތް ފަށައި އެތަނަށް ގެންދެވޭ ބުޅާ ނިޔުޓާ ކުރުމުގެ މަސައްކަތް ފެށިފައިވާ ކަމަށެވެ.
ވަޒީރު ހާމަކުރެއްވި ގޮތުގައި، މިހާތަނަށް އެ ފެސިލިޓީގައި 60 ފިރިހެން ބުޅާ ނިއުޓާ ކުރެވިފައިވާއިރު، 5 އަންހެން ބުޅާ ވަނީ ސްޕޭ ކުރެވިފައެވެ. އަދި މި މަސައްކަތުގެ ދަށުން އަންނަ ހަފްތާގައި އިތުރު ބުޅާތައް ފެސިލިޓީއަށް ގެންދިޔުމަށް ޕްލޭން ކުރެވިފައިވާ ކަމަށްވެސް ވަޒީރު ވިދާޅުވިއެވެ.
އޮޅު ހިޔާ ފެސިލިޓީ އަކީ މާލެ ސަރަހައްދަށް ދިމާވެފައިވާ ބުޅަލުގެ މައްސަލައަށް ހައްލެއް ގެނައުމަށް ސަރުކާރުން މާލެ ސިޓީ ކައުންސިލާ ހަވާލުކޮށްގެން ތައްޔާރުކުރި ފެސިލިޓީއެކެވެ.
ޒަމާނީ ވަސީލަތްތަކާއެކު ގާއިމްކޮށްފައިވާ މި ފެސިލިޓީގައި ބުޅާތައް ކަރަންޓީނު ކުރާނެ ސަރަހައްދަކާއި، ހާއްސަ ކްލިނިކަކާއި، ލެބޯޓްރީއެއްގެ އިތުރުން ފާމަސީއެއްގެ ހިދުމަތްވެސް ލިބެން ހުރެއެވެ. މި މަޝްރޫއަކީ ބުޅާތަކަށް ރައްކާތެރި މާހައުލެއް ގާއިމްކޮށްދީ، މާލޭގެ މަގުތަކަކީ އާންމުންނަށް ސަލާމަތްތެރި ތަނަކަށް ހެދުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.
އޮޅު ހިޔާ ހެދުމަށްފަހު އެތަނަށް ބުޅާތައް ގެންދަންފެށީ މިދިޔަ އަހަރުގެ ފެބްރުއަރީ މަހުގެ 28 ވަނަ ދުވަހުއެވެ.