ގަވާއިދާ ޚިލާފަށް ރާއްޖޭގެ ސަރަހައްދަށް ވަދެ އުޅުނު އިންޑިޔާގެ ދެ ބޯޓެއް ބޮޑު އަދަދަކުން ޖޫރިމަނާ ކޮށްފި

ރާއްޖޭގެ ޚާއްޞަ އިޤްތިޞާދީ ސަރަޙައްދަށް ހުއްދައެއް ނެތި ވަދެ، ޤަވާޢިދާ ޚިލާފަށް މަސްވެރިކަން ކުރަމުންދިޔަ އިންޑިއާގެ ޓުޓިކޮރިން (ތޫތުކުޑީ) ސަރަޙައްދުގެ ދެ މަސްބޯޓެއްގެ ވެރިފަރާތް، ޖުމްލަ 5.2 މިލިއަން ދިވެހި ރުފިޔާއިން ޖޫރިމަނާކޮށް، ކުރިއަށް އޮތް 30 ދުވަހުގެ ތެރޭގައި އެ ފައިސާ ދެއްކުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން އަންގައިފިއެވެ.
މި މައްސަލައިގައި ހިމެނެނީ އިންޑިއާގެ ތަރްވައިކުލަމް ސަރަޙައްދަށް ނިސްބަތްވާ 26 މަސްވެރިންނެވެ. އެ މީހުން ސުދަރްޝަން، ޝަންކަރް އަދި ސޫސައި ބާކްޔަމްގެ ތިން އިންޖީނު ބޯޓެއްގައި މަހަށް ފުރާފައިވަނީ މި ހިނގާ އޮކްޓޫބަރު މަހުގެ 1 ވަނަ ދުވަހުއެވެ. އޭގެ ދިހަ ދުވަސް ފަހުން، އޮކްޓޫބަރު 12 ވަނަ ދުވަހު ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) ގެ ކޯސްޓްގާޑުން ވަނީ ރާއްޖޭގެ ކަނޑުގެ ސަރަޙައްދުން މި ބޯޓުތައް ހިފަހައްޓާފައެވެ.

ހުއްދައެއް ނެތި ރާއްޖޭގެ ސަރަޙައްދަށް ވަދެ، ލައިސަންސް ނެތި ޤަވާޢިދާ ޚިލާފަށް މަސްވެރިކަން ކުރި ކަމުގެ ތުހުމަތުގައި މި ބޯޓުތައް ބަނދަރަކަށް ގެނެސް، އޮކްޓޫބަރު 14 ގައި ވަނީ މޯލްޑިވްސް ޕޮލިސް ސަރވިސްއާ ޙަވާލުކޮށްފައެވެ.

ފިޝަރީޒް މިނިސްޓްރީން މި މަހުގެ 27 ވަނަ ދުވަހު ނެރުނު ނޯޓިސްތަކުގައި ބަޔާންކޮށްފައިވާ ގޮތުގައި، ޖޫރިމަނާކޮށްފައިވަނީ "އެޑްވިން" އަދި "އެރޮން" ނަމަކަށް ކިޔާ ދެ ބޯޓުގެ ވެރިފަރާތެވެ. މީގެ ތެރެއިން ކޮންމެ ބޯޓެއް 2.6 މިލިއަން ރުފިޔާއިން (ގާތްގަނޑަކަށް 1.6 ކްރޯޑް އިންޑިއަން ރުޕީސް) ވަނީ ޖޫރިމަނާކޮށްފައެވެ.

އިންޑިއާގެ ޚަބަރުފަތުރާ ވަސީލަތްތަކުން މަޢުލޫމާތު ދޭ ގޮތުގައި، މި މައްސަލައިގައި ދެން ހިމެނޭ ތިންވަނަ ބޯޓުގެ ވެރިފަރާތަށް ވެސް މިފަދަ ޖޫރިމަނާގެ ނޯޓިސްއެއް ލިބުމަކީ އެކަށީގެންވާ ކަމެކެވެ. މިނިސްޓްރީން ފާހަގަކޮށްފައިވާ ކުށްތަކުގެ ތެރޭގައި ޤަވާޢިދާ ޚިލާފަށް ސަރަޙައްދަށް ވަނުމާއި، ލައިސަންސެއް ނެތި މަސްވެރިކަން ކުރުމުގެ އިތުރުން، ރާއްޖޭގައި ބޭނުންކުރުން މަނާ އާލާތްތައް (ގިއަރު) ބޭނުންކޮށްގެން މަސްވެރިކަން ކުރުން ހިމެނެއެވެ.

އިދާރީ ގޮތުން ބޭއްވި އަޑުއެހުންތަކުގައި ބޯޓުތަކުގެ ކެޕްޓަނުން ފާހަގަކޮށްފައިވަނީ، އެ މީހުން މަސްވެރިކަން ކުރަމުންދިޔައީ އިންޑިއާގެ ސަރަޙައްދުގައި ކަމަށާއި، ރާއްޖޭގެ ކަނޑުގެ ސަރަޙައްދަށް ވަދެވުނީ މޫސުން ގޯސްވެ އޮޔާ ދިއުމުގެ ސަބަބުން ކަމަށެވެ. އެހެންނަމަވެސް، އެ ބޯޓުތަކުގައި މަސްވެރިކަމުގެ ލޮގް ފޮތާއި ޖީޕީއެސް ރެކޯޑުތައް ބަލަހައްޓާފައި ނުވާތީ، އެ ދަޢުވާތައް ސާބިތުކޮށްދެވޭނެ އެކަށީގެންވާ ހެއްކެއް ނެތް ކަމަށް ފިޝަރީޒް މިނިސްޓްރީގެ ނޯޓިސްގައި ވަނީ ބަޔާންކޮށްފައެވެ.
މި މައްސަލައިގައި ދީފައިވާ 30 ދުވަހުގެ މުހުލަތުގެ ތެރޭގައި ޖޫރިމަނާ ފައިސާ ނުދައްކައިފިނަމަ، ޝަރުޢީ ކޯޓެއް މެދުވެރިކޮށް ފައިސާ ހޯދުމުގެ އިތުރުން، އެ ބޯޓުތަކާއި އޭގައިވާ ތަކެތި ދައުލަތަށް ނެގުމަށްޓަކައި އަޅަންޖެހޭ ޤާނޫނީ ފިޔަވަޅުތައް އަޅާނެ ކަމަށް ނޯޓިސްގައި ވަނީ އިންޒާރުދީފައެވެ.

މި ހާދިސާއާ ގުޅިގެން، ހައްޔަރުކޮށްފައިވާ މަސްވެރިންނާއި ބޯޓުތައް މިނިވަންކުރުމަށްޓަކައި، އިންޑިއާގެ މަރުކަޒީ ސަރުކާރާއި ޓެމިލްނާޑޫ ސްޓޭޓް ސަރުކާރުން މި މައްސަލައިގެ ތެރެއަށް ވަދެ ޙައްލެއް ހޯދައިދިނުމަށް ތަރްވައިކުލަމް ސަރަޙައްދުގެ މަސްވެރިންގެ ޖަމްޢިއްޔާތަކުންނާއި ޢާންމު ރައްޔިތުން ވަނީ އެދި ގޮވާލާފައެވެ.