ސަރުކާރުގެ އަމާޒަކީ މިހާރު ކުރިއަށްގެންދިޔުމަށް ނިންމާފައިވާ އައިސްޕްލާންޓްތަކުގެ މަސައްކަތް ނިންމާ މިއަހަރު އޮޕަރޭޝަނަށް ގެނައުންކަމަށް މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ޝިޔާމް ވިދާޅުވީ ސަޢުދީ ފަންޑުންނާއި ސަރުކާރުގެ ބަޖެޓުން ޚަރަދުކޮށްގެން އައިސްޕްލާންޓް ތަރައްޤީކުރުމަށް ނިންމާފައިވާކަމަށެވެ. އެގޮތުން، މަސްވެރިންނަށް ދިމާވާ މައްސަލަތައް ހައްލުކުރުމަށްޓަކައި ކުރާ މަސައްކަތްތުގެ ތެރެއިން، އައިސް ލިބުމުގެ ދަތިތައް ހައްލުކުރުމުގެ މަސައްކަތް ކުރަމުންދާކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ، ސަޢުދީ ފަންޑުންނާއި ސަރުކާރުގެ ބަޖެޓުން ޚަރަދުކޮށްގެން އައިސްޕްލާންޓް ތަރައްޤީކުރުމަށް ނިންމާފައިވާކަމަށެވެ. އެގޮތުން، 6 ރަށެއްގައި ޤާއިމްކުރި އައިސްޕްލާންޓްތައް އޮޕަރޭޝަނަށް ގެނެސްފައިވާކަމަށާއި އުތުރާއި ހުވަދުއަތޮޅުގައި އަލަށް ޤާއިމްކުރި އައިސްޕްލާންޓްތަކާއެކު، އެ ސަރަޙައްދުގައި މަސްވެރިކަން ކުރާ ފާރަތްތަކަށް ލުއިފަސޭހަތަކެއް ލިބޭނެކަމަށް ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވީ، މިހާރުވެސް 9 އައިސްޕްލާންޓެއް ޤާއިމްކުރުމުގެ ޢަމަލީ މަސައްކަތް ކުރިއަށްދާކަމަށާއި 5 އައިސްޕްލާންޓެއްގެ މަސައްކަތް ސަޢުދީ ފަންޑުން ކުރިއަށް ގެންދިޔުމަށް ހަމަޖެހިފައިވާކަމަށެވެ. އެގޮތުން، 23 އައިސްޕްލާންޓެއްގެ މަސައްކަތް ނިންމާ މިއަހަރު އޮޕަރޭޝަނަށް ގެނައުމަކީ އަމާޒެއްކަމަށާއި އެއާއެކު، ރާއްޖޭގެ މޫސުމީ މަސްވެރިކަމުގައި އައިސްއަށް ޖެހޭ ޖެހުން އެއްކޮށް ނިމުމަކަށް ގެނެވޭނެކަމަށް ޝިޔާމް ވިދާޅުވިއެވެ.
ޢަމަލީ މަސައްކަތް ކުރިއަށްދާ އައިސް ޕްލާންޓްތައް:
- ލ. މާބައިދޫ
- ލ. މާވަށް
- ލ. ހިތަދޫ
- މ.ވޭވަށް
- ޅ. ނައިފަރު
- ށ. ކޮމަންޑޫ
- މ. މުލައް
- ކުޅުދުއްފުށި ސިޓީ
- ދ. ހުޅުދެލި
ސަޢުދީ ފަންޑުން ކުރިއަށްގެންދާ މަޝްރޫޢުތައް:
- ގދ. ރަތަފަންދޫ
- އއ. ރަސްދޫ
- ހއ. ދިއްދޫ
- ގއ. ދާންދޫ
- ކ. ގާފަރު
ސަރުކާރު ބަޖެޓުން ކުރިއަށްގެންދާ އިތުރު މަޝްރޫޢުތައް:
- ގއ. ނިލަންދޫ
- ގއ. ވިލިނގިލި
- ގއ. މާމެންދޫ
މީގެއިތުރުން، ކޯލްޑް ސްޓޯރޭޖްތައް ޤާއިމްކުރުމުގެ މަސައްކަތްވެސް ސަރުކާރުން ކުރަމުންދާކަން ފާހަގަކުރައްވަމުން ޝިޔާމް ވިދާޅުވީ، ރާއްޖޭގައި މިހާރު ކޯލްޑް ސްޓޯރޭޖްގެ ކެޕޭސިޓީއަކީ 9500 މެޓްރިކް ޓަނު ކަމަށާއި އެ އަދަދު 25000 ޓަނަށް އިތުރުކުރުމަކީ ސަރުކާރުގެ އަމާޒެއް ކަމަށެވެ.
ޝިޔާމް ވިދާޅުވީ، ކޯލްޑް ސްޓޯރޭޖްގެ ކެޕޭސިޓީ އިތުރުކުރުމަށްޓަކައި މިހާރުވެސް 4 ރަށެއްގައި ކޯލްޑް ސްޓޯރޭޖް ޤާއިމްކުރުމުގެ މަސައްކަތް ކުރަމުންދާކަމަށެވެ. އެގޮތުން، ކޫއްޑޫއާއި ފެލިވަރުގައި 4000 ޓަނަށް ކެޕޭސިޓީ އިތުރުކުރުމުގެ މަސައްކަތް ކުރަމުން އަންނައިރު، ގދ. ތިނަދޫގައި 1000 ޓަނުގެ ކެޕޭސިޓީ އިތުރުކުރުމާއި މުލަކުގައި 500 ޓަނަށް ކެޕޭސިޓީ އިތުރުކުރުމުގެ މަސައްކަތް ކުރަމުން އަންނަކަމަށް ޝިޔާމް ވިދާޅުވިއެވެ.
މީގެއިތުރުން، ސ. ހުޅުމީދޫގައި ކެޕޭސިޓީ 500 ޓަނަށް އިތުރުކުރުމަށް ނިންމާފައިވާއިރު، ތ. ހިރިލަންދޫގައި 200 ޓަނުގެ ކޯލްޑް ސްޓޯރޭޖްއެއް ޤާއިމްކުރުމަށް ނިންމާފައިވާކަމަށް ވެސް ޝިޔާމް ވިދާޅުވިއެވެ. ހަމައެއާއެކު، ހއ. އިހަވަންދޫގައި ކޯލްޑް ސްޓޯރެޖް ޤާއިމްކުރުމަށް ކުރަންޖެހޭ މަސައްކަތްތަަކާއި ކަނޑުއޮއްގިރީގައިވެސް ކޯލްޑް ސްޓޯރޭޖް 200 ޓަނަށް އިތުރުކުރުމުގެ މަސައްކަތްވެސް ހިމެނޭކަމަށް ޝީޔާމް ވަނީ ވިދާޅުވެފައެވެ.
ވަޒިރު ވިދާޅުވީ މި އައިސް ޕްލާންޓްތަކުގެ މަސައްކަތް މިއަހަރު ފަށާ ނިންމުމަކީ އަމާޒެއްކަމަށެވެ. އެގޮތުން 23 އައިސްޕްލާންޓެއްގެ މަސައްކަތް ނިންމާ މިއަހަރު އޮޕަރޭޝަނަށް ގެނައުންކަމަށެވެ. އެއާއެކު ރާއްޖޭގެ މޫސުމީ މަސްވެރިކަމުގައި އައިސްއަށް ޖެހޭ ޖެހުން އެއްކޮށް ނިމުމަކަށް ގެނެވޭނެކަމަށެވެ.