ސަރުކާރުގެ "ބޯހިޔާވަހިކަން އެންމެންނަށް" މި ސިޔާސަތުގެ ދަށުން، އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ކުރިމަތިލުމުގެ ފުރުސަތު ދޭން ބޯހިޔާވަހިކަމުގެ އައު ޕްރޮގްރާމެއް އިޢުލާންކޮށްފިއެވެ.
އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން މިހާރު ވަނީ މިކަމާގުޅޭ އުޞޫލު ގެޒެޓުގައި އާންމުކޮށްފައެވެ. މި އުޞޫލުގެ ދަށުން ގޯއްޗަށް އެދި ހުށަހެޅުމުގެ ފުރުޞަތު މިމަހުގެ 8 ވަނަ ދުވަހު ހުޅުވާލާނެއެވެ. މި އުސޫލުގެ ދަށުން އެޕްލިކޭޝަން ހުށަހެޅުމަށް ހުޅުވާލުމަށް ހަމަޖެހިފައިވަނީ، އަންނަ އާދީއްތަ ދުވަހުގެ ހެނދުނު 11:00 އިން ފެށިގެން 30 އެޕްރީލު ވާ ބުރާސްފަތި ދުވަހުގެ 23:59 ގެ ނިޔަލަށް ކަމަށް އެ ވުޒާރާއިން ބުނެއެވެ.
ސަރުކާރުގެ ބޯހިޔާވަހިކަމުގެ ސިޔާސަތު "ބޯހިޔާވަހިކަން އެންމެންނަށް" ސިޔާސަތުގެ ދަށުން ފްލެޓާއި ގޯއްޗަށް އެދި ހުށަހެޅުމުގެ ފުރުޞަތު ހުޅުވާލީ ޖަނަވަރީ މަހުގެ 18 ވަނަ ދުވަހުއެވެ. މި ފުރުސަތު ހުޅުވާލިއިރު، އުސޫލުގައި ހިމެނޭ ކަންކަމުގެ ތެރޭގައި އެންމެ ބޮޑު ކަންބޮޑުވުމަކަށްވީ މީގެ ކުރީގެ އުސޫލުތަކުގައިވެސް އޮންނަ ގޮތަށް ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތްނަމަ ޝަރުތުހަމަ ނުވާ ގޮތަށް އޮތުމެވެ.
ސަރުކާރުން ހުޅުވާލާފައިވާ އެންމެންނަށް ބޯހިޔާވަހިކަމުގެ ސްކީމަށް މިހާތަނަށް ގިނަ އަދަދެއްގެ ފަރާތްތަކުން ކުރިމަތިލާފައިވާއިރު ފްލެޓަށް އޮންނަ ޑިމާންޑަށް ވުރެ ގޯއްޗަށް އޮތް ޑިމާންޑު ދަށް ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއެވެ. ރައީސުލްޖުމްހޫރިއްޔާ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ވަޒީރު ވަނީ މިކަން ތަފްސީލްކޮށްދެއްވާ ސަރުކާރުގެ ބޯހިޔާވަހިކަމުގެ ސްކީމަށް މިހާތަނަށް ކުރިމަތިލާފައިވާ ފަރާތްތަކުގެ ބައެއް ތަފާސްހިސާބުތައް ހިއްސާކޮށްދެއްވާފައެވެ.
ވަޒީރު ޑރ. މުއްޠަލިބު ވިދާޅުވީ މި ސްކީމަށް މިހާތަނަށް ކުރިމަތިލާން ހުށަހަޅާފައިވާ އަދަދުތަކަށް ބަލާއިރު އެކި ހުށަހެޅުމުގެ އެކި މަރުހަލާތަކުގައިއާއި މިހާތަނަށް ހުށަހަޅާފައިވާ ފޯމުތައް ހިމެނޭޙެން ޖުމްލަ 18،399 އެޕްލިކޭޝަނެއް އޮތް ކަމަށެވެ.
މި ސްކީމަށް ގިނަ އަދަދެއް ފަރާތްތައް ކުރިމަތިލަމުންދާއިރު ވަޒީރު ވިދާޅުވީ ސްކީމަށް ހުޅުވާލިއިރުވެސް މިކަމަށް 20،000 އަށް ވުރެ ގިނަ ފަރާތްތައް ކުރިމަތިލާނެ ކަމަށް ބެލެވުނު ކަމަށެވެ. ނަމަވެސް ގޯއްޗަށް އޮތް ޑިމާންޑު ދަށްވުމާއެކު ގޯތި ހޯދުމަށް އިތުރު ފުރުސަތެއް ދިނުމަށް "ގޯތި-ގެދޮރު" ގެ ނަމުގައި އައު ޕްރޮގްރާމެއް ކުރިއަށް ގެންދަން ނިންމާފައިވާ ކަމަށެވެ.
އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން އިތުރަށް ބުނީ، މި އުސޫލުގެ ދަށުން ދޫކުރަން ހަމަޖެހިފައިވަނީ ރަސްމާލެއިން 1250 އަކަފޫޓުގެ ގޯތި ކަމަށެވެ. އުސޫލުގައި ހިމެނޭ މައި ކެޓަގަރީތަކަކީ، ކެޓަގަރީ-1، މާލޭ ރަށްވެހިންނާއި ކެޓަގަރީ–2، މާލޭގައި ދިރިއުޅޭ އެހެން ރަށްރަށުގެ ރަށްވެހިންނެވެ.
އެ އުސޫލުގެ ދަށުން، ގޯއްޗަށް އެދޭ ފަރާތްތަކުން އެޕްލިކޭޝަނާއެކު ހުށަހަޅަންޖެހޭ ލިޔެކިޔުންތައް މި އިޢުލާނުގައި ވަނީ ބަޔާންކޮށްފައެވެ.