ކުރިޔަށް އޮތް ތަނުގައި 65 އަހަރުން މަތީގެ މީހުންނަށް 7،000 ރުފިޔާ ދޭން ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސް މިހެން ވިދާޅުވީ މާވެޔޮ މަގުގައި ރޭ އެމްޑީޕީ ކޯލިޝަނުން ބޭއްވި ޖަލްސާގައި ވާހަކަފުޅު ދައްކަވަމުންނެވެ. ރިޔާސީ އިންތިޚާބުގެ ކެމްޕޭނުގެ ތެރެއިން އުމުރުން ދުވަސްވީ މީހުންނަށް ދޭ އިނާޔަތާ ގުޅިގެން ޝަކުވާ ލިބިފައިވާކަން ރައީސް ހާމަކުރެއްވިއެވެ.
"އިރާދަ ކުރެއްވިއްޔާ ކުރިޔަށް އޮތް ތަނުގައި 65 އަހަރުން މަތީގެ ކޮންމެ މީހަކަށް 7،000 ރުފިޔާގެ އެލޮވެންސެއް ދޭން އަޅުގަނޑުމެން ނިންމައިފިން"
65 އަހަރުން މަތީގެ މީހުންނަށް ސަރުކާރުން ދޭ އިނާޔަތެއްގެ ގޮތުގައި މަހަކު 2،000 ރުފިޔާ ލިބޭ ގޮތަށް އެންމެ ފުރަތަމަ ހަމަޖެއްސެވީ ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ. ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ވެރިކަމުގައި އެ އަދަދު 5،000 ރުފިޔާއަށް އިތުރުކޮށްދެއްވިއެވެ.
ރައީސް ވިދާޅުވާ ގޮތުން ރިޔާސީ ދެވަނަ ދައުރެއް ބޭނުންފުޅުވަނީ ރައްޔިތުންނަށް ޚިދުމަތް ކޮށްދެއްވުމަށެވެ. އެ މަނިކުފާނު ވަނީ މީގެ އިތުރުން ވެސް ބައެއް އާ ވަޢުދުތައް ރޭގެ ޖަލްސާގައި ވެވަޑައިގެންފައެވެ. އެ ގޮތުން ކޮވިޑް-19ގެ ދަތި ޙާލުން އަރައިގަތުމަށް، އެސްޑީއެފް މެދެވެރިކޮށް ބައެއް ރައްޔިތުންނަށް ދީފައިވާ ލޯނުތަކުގެ އިންޓަރަސްޓް މަޢާފްކޮށްދެއްވާނެކަން ވެސް ރައީސް ހާމަ ކުރެއްވިއެވެ. އަދި މީގެ ކުރިން އެ ފައިސާ ދައްކާފައިވާ ފަރާތްތަކަށް އަލުން އެ ފައިސާ ލިބިގެންދާނެ ކަމަށް ވެސް އެ މަނިކުފާނު ވަނީ ވިދާޅެފައެވެ. އަދި އެ ލޯނު އަނބުރާ ދެއްކުމަށްޓަކައި މިހާރު ކަނޑައަޅާފައިވާ 10 އަހަރުގެ ދުވަހުގެ މުއްދަތު ވެސް އިތުރަށް ދަންމަވައިލައްވާނެ ކަމުގައި ރައީސް ހާމަ ކުރެއްވިއެވެ.
މީގެ އިތުރުން އަމިއްލަ ރަށް ނޫން އެހެން ރަށެއްގައި މަސައްކަތްކުތާ ޕްރިންސިޕަލުންނަށް ލިވިންގ އެލޮވެންސެއްގެ ގޮތުގައި އިތުރު 7،000 ރުފިޔާ ދިނުމަށް ވެސް ރައީސް ވަނީ ނިންމަވާފައެވެ.
ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ވަނީ ޓީޗަރުންނާއި، ޞިއްޙީ މަސައްކަތްތެރިންގެ މުސާރަ އޮތީ ބޮޑުކޮށްދެއްވާފައެވެ.