މިދުވަސްވަރަކީ ރާއްޖޭގެ އެކިހިސާބުތަކަށް ވިއްސާރަކުރަނދާ ދުވަސްވަރަކަށްވާތީ މަދިރީގެ ޒަރިއްޔާއިން ފެތުރޭ ނުރައްކާތެރި ބައްޔެއް ކަމަށްވާ ޑެންގީ ހުމުން ރައްކާތެރިވުމަށް ދުރާލައި ޚާއްސަ ފިޔަވަޅުތަކެއް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ކަމާބެހޭ އިދާރާތަކުން ގޮވާލައިފިއެވެ.
ވިއްސާރަވެ ފެން ހަރުލުމުގެ ސަބަބުން މަދިރި އާލާވާ މިންވަރު އިތުރުވާކަން ފާހަގަކޮށް، އެޗްޕީއޭއިން ވިދާޅުވީ އެންމެ ގިނައިން މަދިރި އާލާވާކަމަށް ފާހަގަކުރެވެނީ ފެން އަޅާފައި ހުންނަ ފީފާއާއި ތާނގީގެ އިތުރުން އިމާރާތް ކުރުމަށް ބޭނުންކުރާ ސާމާނާއި، ޓަޔަރާއި، ޕްލާސްޓިކް ހުސްފުޅި އަދި ދަޅު ފަދަ ތަކެތީގައިކަމަށެވެ.
މިކަމާ ގުޅިގެން މަދިރި ކޮންޓްރޯލް ކުރުމުގެ ގޮތުން މާލެ ސަރަހައްދު ހިމެނޭހެން ރާއްޖޭގެ އެކި ކަންކޮޅުތަކުގައި ސަރުކާރުގެ ކަމާގުޅުންހުރި މުއައްސަސާތައް ގުޅިގެން ވަނީ ހަރަކާތްތަކެއް ފަށާފައެވެ. އެގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)، ފަހި ދިރިއުޅުން ކޯޕަރޭޝަން (އެފްޑީސީ)، މޯލްޑިވްސް ޕޮލިސް ސަރވިސް، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަދި މޯލްޑިވްސް އޯޝަން ޕްލާސްޓިކްސް އެލަޔަންސް (މޯޕާ) ގުޅިގެން ތަންތަން ސާފުކޮށް ކުނި ނެގުމާއި، މަދިރި އުފެދޭ ތަންތަން ނައްތާލުމުގެ އިތުރުން ފޮގު ކުރުމުގެ މަސައްކަތްތައް ދަނީ ކުރަމުންނެވެ.
ޑެންގީ ހުމުން ރައްކާތެރިވުމަށްޓަކައި އަމިއްލަ ފަރުދީ ޒިންމާ އަދާކުރުމުގެ މުހިންމުކަން ފާހަގަކުރައްވައި، ސިއްހީ މާހިރުން ވަނީ ހަށިގަނޑު ރަނގަޅަށް ނިވާވާފަދަ ހެދުން އެޅުމަށާއި މަދިރި ލޯޝަން ނުވަތަ ރެޕެލެންޓް ބޭނުންކުރުމަށް އިރުޝާދު ދެއްވާފައެވެ. އަދި ހާއްސަކޮށް ޑެންގީ ފަތުރާ މަދިރިއަކީ ޚާއްސަކޮށް ހެނދުނާއި ހަވީރުގެ ވަގުތުތަކުގައި ހަފާ މަދިރިއަކަށްވާތީ، އެ ވަގުތުތަކުގައި ގޭގޭގެ ދޮރުތަކާއި ކުޑަދޮރުތައް ލައްޕާފައި ބެހެއްޓުމަށާއި، ގޯތިތެރޭގައި ފެން ހަރުލާ ގޮތަށް ހުންނަ ތަކެތި ގަވާއިދުން އުކާލައި ސާފުކުރުމަށް ވަނީ އިލްތިމާސްކޮށްފައެވެ.
އެޗްޕީއޭގެ ތަފާސްހިސާބުތައް ދައްކާގޮތުން، މި އަހަރުގެ ޖޫން މަހު ޑެންގީހުން ޖެހިގެން ރިޕޯޓުކުރި 673 މީހުންނާ އަލާބަލާއިރު، މިހާރު ބަލިޖެހިގެން ރިޕޯޓުކުރާ އަދަދު ނިސްބަތުން މަދުވިނަމަވެސް ބަލި ފެތުރުން ހުއްޓުވުމަށް އަދިވެސް އިތުރު މަސައްކަތްތަކެއް ކުރަންޖެހޭ ކަމަށް ކަމާބެހޭ ފަރާތްތަކުން ފާހަގަކުރައްވައެވެ.
ޑެންގީ ހުން ޖެހިއްޖެނަމަ ގޭގައި އަރާމުކުރުމަށާއި، ގިނަގިނައިން ދިޔާތަކެތި ބޭނުންކުރުމުގެ އިތުރުން ޑޮކްޓަރެއްގެ ލަފާގެ މަތިން ޕެރެސެޓަމޯލް ފިޔަވައި ތަދުކަނޑުވާ އެހެން ބޭހެއް ބޭނުން ނުކުރުމަށް ޞިއްޙީ މާހިރުން އިރުޝާދު ދެއްވައެވެ. އަދި ހާލަތު ގޯސްވާނަމަ ލަސްނުކޮށް ޞިއްޙީ ޚިދުމަތްތެރިއެއްގެ އެހީތެރިކަން ހޯދުމަށް ވަނީ އިލްތިމާސްކޮށްފައެވެ.