މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލުމާއެކު ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ވިއްކާ ތެލުގެ އަގު ބޮޑުކޮށްފި އެވެ.
މެދުރިއިރުމަތީގައި ހިނގަމުންދާ ހަނގުރާމައާއި ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިފައިވާ މި ދަނޑިވަޅުގައި، އެސްޓީއޯގެ ދަށުން ހިންގާ ފިއުލް ސަޕްލައި މޯލްޑިވްސް (އެފްއެސްއެމް) އިން ވިއްކާ ތެލުގެ އަގަށް ބަދަލު ގެނެސް، ޕެޓްރޯލް އަދި ޑީސަލް ވިއްކާނެ އައު އަގުތައް އެސްޓީއޯއިން މިހާރު ވަނީ އާންމުކޮށްފައެވެ.
އެގޮތުން، އަލަށް ކަނޑައެޅި އަގުތަކަށް ބަލާއިރު، ޕެޓްރޯލް ލީޓަރެއްގެ އަގު ވަނީ 13.50 ރުފިޔާއިން 16.01 ރުފިޔާއަށް ބޮޑުވެފައެވެ. މިއީ ލީޓަރަކުން 2.51 ރުފިޔާގެ އިތުރުވުމެކެވެ. އެއާއެކު، ޑީސަލް ލީޓަރެއްގެ އަގު ވަނީ 13.92 ރުފިޔާއިން 17.54 ރުފިޔާއަށް އުފުލިފައެވެ. އެހެންކަމުން، މި ގެނެވުނު ބަދަލާއެކު ޑީސަލް ލީޓަރަކުން 3.62 ރުފިޔާ މިވަނީ ބޮޑުވެފައެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިޤްތިޞާދީ ވަޒީރު މުޙައްމަދު ސަޢީދު ވިދާޅުވެފައިވަނީ، ދުނިޔޭގެ ބާޒާރުގައި ތެލުގެ އަގު 25 އިންސައްތައާއި 30 އިންސައްތައާ ދެމެދުގެ މިންވަރަކަށް އުފުލުނު ކަމަށާއި އެހެންނަމަވެސް، ސަރުކާރުން ފިޔަވަޅުތައް އަޅަމުންދާނީ ބާޒާރުގައި ތަކެތީގެ އަގަށް އަންނަ ބަދަލުތަކަށް ރިޢާޔަތްކޮށްގެން ކަމަށެވެ. ހަމައެއާއެކު، ދުނިޔޭ ބާޒާރުގައި ތެލުގެ އަގު އުފުލުނު ކަމުގައިވިޔަސް ދިވެހިންނަށް ދަތިކަމެއްނެތި ތެލާއި ގޭސް ލިބޭނެކަމުގެ ޔަޤީންކަން ސަޢީދު ވަނީ ދެއްވާފައެވެ.
އެސްޓީއޯއިން ވިއްކާ ތެލުގެ އަގަށް ގެންނަ ބަދަލުތަކަކީ، ދުނިޔޭގެ ބާޒާރުގައި ތެލަށް އަންނަ ބަދަލުތަކާއި ގުޅިގެން ގެންނަ ބަދަލުތަކެކެވެ. އެހެންކަމުން، ދުނިޔޭގެ ބާޒާރުގައި ތެޔޮ ގަންނަން ލިބޭ އަގު ހެޔޮވުމާއެކު، އެސްޓީއޯއިން ވިއްކާ ތެލުގެ އަގު އަނެއްކާވެސް ކުޑަކުރާނެކަމަށް ބެލެވެއެވެ.