.jpg&w=256&q=75)
ވަތަނީ ޚިދުމަތަކީ ކޮންމެ ދިވެހި ދަރިއެއްގެ ހިތުގައި ބިންވަޅު ނެގިފައި އޮންނަންޖެހޭނެ މަތިވެރި ސިފައެކެވެ. އެއީ ހަމައެކަނި ޤައުމުގެ ސިފައިންނާއި ފުލުހުން އަދާކުރާ ވާޖިބެއް ނޫނެވެ. އޭގެ ބަދަލުގައި، އެއީ ޤައުމުގެ ކުރިއެރުމަށާއި، މިނިވަންކަމާއި އިސްތިޤްލާލު ދެމެހެއްޓުމަށްޓަކައި ކޮންމެ ފަރުދަކުވެސް އަމިއްލަ އިޚްތިޔާރުގައި އުފުލަންޖެހޭ ޒިންމާއެކެވެ.
ޒުވާނުންނަކީ ޤައުމުގެ މައިބަދައެވެ. ކިޔަވައި ނިމިގެން ނުކުންނަ ދަރިވަރުންގެ މުސްތަޤްބަލް ބައްޓަންކުރުމުގައި ވަތަނީ ޚިދުމަތުގެ ރޫޙު އަށަގެންނެވުން ނުހަނު މުހިންމެވެ. ކޮންމެ ދަރިވަރަކުވެސް އަމާޒު ހިފަންވީ ހަމައެކަނި އަމިއްލަ މަންފާއަކަށް ނޫނެވެ. އޭގެ ބަދަލުގައި، ތަޢުލީމީ މަރުޙަލާ ނިންމައި އާ ވަޒީފާއަކަށް ކުރިމަތިލާއިރު، ތިމާގެ ޢިލްމާއި ހުނަރުގެ ބޭނުން ޤައުމަށް އެންމެ ފައިދާހުރި ގޮތުގައި ހިފޭނެ ގޮތަކާ މެދު ވިސްނަންޖެހެއެވެ. އާ ވަޒީފާއެއްގެ މާޙައަލަށް ނުކުންނަ އިރު، އެ މަސައްކަތަކީ ޤައުމަށްޓަކައި ކުރެވޭ ޚިދުމަތެއް ކަމުގައި ދެކުމަކީ ޒިންމާދާރުކަން އިތުރުވެގެންދާނެ ކަމެކެވެ.
މުޖުތަމައުއަށް ހެޔޮބަދަލެއް ގެނެވޭނީ، ފަރުދުންގެ ކިބައިގައި ޤައުމީ ލޯބި އިތުރުވެގެންނެވެ. ވަތަނީ ޚިދުމަތުގެ ސަބަބުން މީހުންގެ މެދުގައި އެކުވެރިކަމާއި، އެއްބައިވަންތަކަން އާލާވެއެވެ. މީގެ ސަބަބުން މުޅި މުޖުތަމަޢު އަމާންވެ، އިޖުތިމާޢީ މައްސަލަތައް މަދުވެގެންދެއެވެ. ޒިންމާދާރުކަމާއެކު ކޮންމެ މީހަކުވެސް ތިމާގެ ދާއިރާއިން ޤައުމަށް ޚިދުމަތްކުރަން ފެށުމުން، އިޤްތިޞާދީ ގޮތުންނާއި އިޖުތިމާޢީ ގޮތުން ޤައުމަށް ބޮޑެތި ކުރިއެރުންތައް ލިބިގެންދާނެއެވެ.
މިއަދުގެ ދަރިވަރުންނާއި ޒުވާނުންނަށް ވަތަނީ ޚިދުމަތުގެ މުހިންމުކަން އުނގަންނައިދިނުމަކީ، މާދަމާއަށްޓަކައި ހެޔޮލަފާ ޖީލެއް ބިނާކުރުމަށް އެޅޭ އެންމެ ވަރުގަދަ ފިޔަވަޅެވެ. މިފަދަ ޖީލެއްގެ ސަބަބުން އިސްލާމީ އަޚްލާޤާއި ދިވެހި އާދަކާދަތައް ދެމެހެއްޓުމަށް މަގުފަހިވެއެވެ. އަދި ޤައުމުގެ ކުރިމަގު އުޖާލާވެ، ދުނިޔޭގެ ކުރިމަތީގައި ދިވެހިރާއްޖެއަކީ ފަޚުރުވެރި، މިނިވަން ޤައުމެއްގެ ގޮތުގައި ދެމިއޮންނާނެކަން ކަށަވަރުވެގެންދެއެވެ.
ވަތަނީ ޚިދުމަތަކީ ކޮންމެ މީހަކަށްވެސް ދެވޭނެ ޚިދުމަތެކެވެ. އެއީ ތިމާގެ ވަޒީފާ އިޚްލާޞްތެރިކަމާއެކު އަދާކުރުމާއި، މުޖުތަމަޢުގެ ލާބައަށް މަސައްކަތްކުރުމެވެ. ޒިންމާދާރުކަމާއެކު ޤައުމަށް ޚިދުމަތްކުރާ ހެޔޮލަފާ ޖީލެއް އުފެދިއްޖެނަމަ، ޤައުމުގެ ކުރިމަގު ފެންނާނީ ނުހަނު އުޖާލާކޮށެވެ.
މިހާރު ކުރިއަށްދާ ވަތަނި ހިދުމަތުގެ ޕޮރިގްރާމްއަކީވެސް މުޅި މުޖުތަމުގެހެވާ ލާބަޔަށް ސަރުކާރުން ކުރިއަށް ގެންދާ ވަރަށް ޙާއްސަ ޕްރޮގްރާމެކެވެ. އެގޮތުން އަމިއްލަ ނަފްސަށް އިތުބާރުކުރާ، ޢަޤީދާ ވަރުގަދަ، ރޫޙާނީ އަދި ޖިސްމާނީ ގޮތުން ދުޅަހެޔޮ، ދިވެހި ޤައުމިއްޔަތަށް ލޯބިކުރާ، ޒިންމާދާރު ޒުވާން ޖީލެއް ބިނާކުރުމަށް ސަރުކާރުން ފަށާފައިވާ ދިވެހި ވަޠަނީ ޚިދުމަތުގެ އިނީޝަލް ތަމްރީނު ގެ އެންމެ ފުރަތަމަ ބެޗު މިހާރު ވަނީ ނިންމާލާފއެެވެ. އެކިއެކި ދާއިރާތަކުން ި ފުރުޞަތުގައި ސިފައިންގެ ޚިދުމަތަށް ކުރިމަތިލި ޒުވާނުންނަށް ހިންގުނު 72 ވަނަ ސިފައިންގެ އަސާސީ ތަމްރީނު ކޯހުން ރާއްޖޭ 20 އަތޮޅެއްގެ 70 ރަށަކަށް ނިސްބަތްވާ 137 ދަރިވަރުން ވަނީ ދަސްވެނިވެފަވެއެވެ.
މިކޯހުން އެކި ވަނަތަށް ޙާޞިލް ކުރި އެންމެހާ ބައިވެރިންނަށް ދިވެހިރާއްޖޭގެ ރައީސުލްޖުމްހޫރިއްޔާ ވަނީ މަރުޙަބާ ދަންނަވާފައެވެ އަދި ސިފައިންގެ މަތިވެރި ޚިދުމަތަށް ކުރިމަތިލި އެންމެހާ ޒުވާނުންނަށް އައްސަރިބަހާއި ސާބަސް ރައްދުކުރައްވާފަވެއެވެ.
އުންމީދަކީ މިފަދަ ކޮންމެ ޕްރޮގްރާމެއްގެ ސަބަބުން ވެސް މުޖުތަމައުއަށް ހެޔޮލަފާ ދަރިންތަކެއް ތަރުބިއްޔަތުވެގެން ދިއުމެވެ. ގައުމަށް ހެވާ ލާބަ ހޯދުމަށް މަސައްކަތް ކުރާނެ ޖީލެއް ބިނާވުމެވެ.