އެކި ސަބަބުތަކާހުރެ މި ރަމަޟާން މަހު، ޢުމްރާގެ އަޅުކަމަށް ނުފުރި ތިބި ފަރާތްތަކަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝަދުގެ ދަށުން ޚާއްޞަ އިންތިޒާމުތަކެއް ހަމަޖެއްސުމުގެ މަސައްކަތް މޯލްޑިވްސް ޙައްޖު ކޯޕަރޭޝަނުން ފަށައިފިއެވެ.
ޙައްޖު ކޯޕަރޭޝަނުން ރޭ ނެރުނު ނޫސްބަޔާނެއްގައި ވަނީ އެކި ގްރޫޕްތަކުގެ ޙަވާލުގައި ރަމަޟާން ޢުމްރާއަށް ދިއުމަށް ނިންމާފައިވަނިކޮށް، ފްލައިޓުތައް ކެންސަލްވުމާއި، އެނޫންވެސް ދަތިތަކާއިހުރެ ފުރޭގޮތް ނުވެފައިވާ ފަރާތްތަކަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ޙައްޖު ކޯޕަރޭޝަނުން ޚާއްޞަ އިންތިޒާމުތަކެއް ހަމަޖެއްސުމުގެ މަސައްކަތް ކުރަމުންދާކަމަށެވެ.
އަދި މިކަމަށްޓަކައި ފްލައިޓު ޗާޓަރު ކުރެވޭގޮތް ވެއްޖެނަމަ އެކަން ކުރުމާއި، އެ ކޮމޮޑޭޝަން ހަމަޖެއްސުމަށް މި ކޯޕަރޭޝަނުން މަސައްކަތްތަކެއް ކުރަމުންދާކަމަށް ނޫސްބަޔާނުގައި ވެއެވެ.
އެހެންކަމުން މި ރަމަޟާން މަހު ޢުމްރާގެ އަޅުކަން އަދާކުރުމަށް އެދި، ދިމާވި އެކި ސަބަބުތަކާހުރެ ނުފުރި ތިބި ފަރާތްތަކުގެތެރެއިން މި ފުރުޞަތުގެ ބޭނުން ހިފަން ބޭނުންވާ ފަރާތްތަކުން މާދަމާ މެންދުރު 12:00ގެ ކުރިން އީމެއިލް އެޑްރެސް [email protected] އަށް މަޢުލޫމާތު ފޮނުވުމަށްވެސް ޙައްޖު ކޯޕަރޭޝަނުން އެދެއެވެ
މިކަމާއި ގުޅޭ ގޮތުން އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ، މިވަގުތާއި ހަމައަށް ފުރަން ބޭނުންވެފައި ތިބި މީހުންގެ އަދަދު 150 އަށް އަރާކަމަށާއި، ފްލައިޓު ޗާޓަރު ކުރެވޭނެ އިންތިޒާމް ހަމަޖެހިއްޖެނަމަ އިތުރު ފަރާތްތަކަށްވެސް ޖާގަ ހުރި މިންވަރަކުން ޖާގަ ދެވޭނެކަމަށެވެ. އަދި ވަގުތު ކުޑަތަންވެފައިވުމުން މިކަމުގައި ހުރި ދަތިތައް ޙައްލުވޭތޯ މަސައްކަތްކުރަމުންދާކަމަށް ވަޒީރު ވިދާޅުވިއެވެ. މި ދަތުރު ހަމަޖެހިއްޖެނަމަ، ދަތުރަށް ޙަރަދު ކުރާނީ އާއްމު އުސޫލުން ޢުމްރާވެރިންކަން ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ރައްޔިތުންނާ ގުޅުން ހުރި މިފަދަ ކަންކަން ހައްލުކޮށްދެެއްވުމަށް ޢިއްޒަތްތެރި ރައީސް ޑރ މުޢިއްޒު ބަހައްޓަވަމުން ގެންދަވާ އަހައްމިއްޔަތަށްޓަކައި ވަރަށް އިޚްލާޞްތެރިކަމާއެކު ރައީސަށް ޝުކުރު އަރިސްކުރައްވާކަމަށާއި އަދި މޯލްޑިވިއަންއާއި، މޯލްޑިވްސް ޙައްޖު ކޯޕަރޭޝަނަށް ޝުކުރު ދަންނަވާކަމަށެވެ.
މީގެ އިތުރުން މިފަދަ ކޮންމެ ކަމެއްގައި ވެސް ދިވެހި ރައްޔިތުންނަށް ދެއްވާ އެހީތެރިކަން ވަޒީރު ވަނީ ފާހަގަކުރައްވާފައެވެ.