2025 ވަނަ އަހަރު ބޭންކް ފަންޑް ކާމިޔާބުކުރި އެއް ފަރާތްކަމަށްވާ ޔުނައިޓެޑް އިސްލާމިކް ސޮސައިޓީ (ޔޫއައިއެސް) އިން ދ. ކުޑަހުވަދޫގައި ހުންނަ ދ. އަތޮޅު އެޑިއުކޭޝަން ސެންޓަރގައި މަލްޓި-މީޑިއާ ސްޓޫޑިއޯއެއް ހުޅުވައިފިއެވެ.
ޔޫއައިއެސްއަކީ ކުޑަހުވަދޫގެ ޖަމިއްޔާއެކެވެ. ބުއެމްއެލް އިން ބުނީ މި ޕްރޮޖެކްޓްގެ ދަށުން 800 އަށްވުރެ ގިނަ ދަރިވަރުން ތައުލީމު ހާސިލުކުރާ ދ. އަތޮޅު އެޑިއުކޭޝަން ސެންޓަރުގައި ވަނީ މަލްޓި-މީޑިއާ ސްޓޫޑިއޯއެއް ގާއިމުކޮށްފައިވާ ކަމަށާއި، މީޑިއާ ކްލަބަށް އެހީތެރިވެދޭނެ ކަމަށެވެ. މި މަލްޓި-މީޑީއާ ސްޓޫޑިއޯ ގާއިމުކޮށްފައި ވަނީ ޕްރޮފެޝަނަލް ކެމެރާއާއި ލައިޓިންގ ކިޓް، އޯޑިއޯ ރެކޯޑު ކުރާނެ ވަސީލަތްތަކާއި އެޑިޓިންގ ކޮމްޕިއުޓަރ އަދި ސްޓްރީމިންގ ހާޑްވެއާވެސް ހިމަނައިގެން ކަމަށް ބުނެފައި ވެއެވެ.
ދ. އަތޮޅު އެޑިއުކޭޝަން ސެންޓަރުގެ ދަރިވަރުން މިހާރުވެސް މީޑިއާ ކްލަބެއް ހިންގާއިރު، މި ކްލަބްގައި އެކަށީގެންވާ ވަސީލަތްތައް ނެތުމުގެ ދަތިކަން ވަނީ ފާހަގަކުރެވި ކަމަށާއި، މި ޕްރޮޖެކްޓުގެ ދަށުން ޔޫއައިއެސް ގެ އަމާޒަކީ، އެ ސެންޓަރު މެދުވެރިކޮށް މީޑީއާ ދާއިރާގައި ދަރިވަރުންގެ ހުނަރާއި ތަޖުރިބާ އިތުރުކުރުން ކަމަށެވެ. އެގޮތުން ދަރިވަރުންނަށް ވީޑިއޯ އުފެއްދުމަށާއި، އިވެންޓް ބްރޯޑްކާސްޓްކުރުމަށާއި ވީޑިއޯ ރިޕޯޓް ހެދުމަށާއި އެ މަރުކަޒުގެ ރަސްމީ ޔޫޓިއުބް ޗެނަލަށް ތައުލީމީ ކޮންޓެންޓް އުފެއްދޭނެ ތަމްރީނުދޭ އަދި އުފެއްދުންތެރި މަރުކަޒެއްގެ ގޮތުގައި އެ ތަން ބޭނުންކުރެވޭނެއެވެ. އަދި މި މަރުކަޒުގެ ޚިދުމަތް ރަށުގެ އެހެން އޮފީސްތަކަށާއި ކައިރި ރަށްރަށަށް ވެސް ފޯރުކޮށްދީ ގުޅިގެން މަސައްކަތްކުރުމުގެ މަގު ތަނަވަސްވެގެންދާނެ ކަމަށްވެސް ބީއެމްެއެލް އިން ވަނީ ބުނެފައެވެ.
މި ސްޓޫޑިއޯ ބަލަހައްޓާނީ ސްކޫލާއި ޔޫއައިއެސް ޖަމިއްޔާގެ ހާއްސަ ޓީމަކުން ކަމަށާއި، އަދި މިތަނުގެ ބޭނުން އެންމެ ފުރިހަމަ ގޮތުގައި ހިފައި އާމްދަނީ ލިބޭނެ އަދި ދެމެހެއްޓެނިވި ގޮތެއްގައި ހިންގުމަށްޓަކައި ގަވާއިދުން ތަމްރީނު ދިނުމާއިއެކު އެކަށީގެންވާ ގޮތެއްގައި ތަން ބެލެހެއްޓޭނެ އިންތިޒާމް ވަނީ ހަމަޖައްސާފައެވެ.