މެޖިސްޓްރޭޓް ކޯޓުތަކުގެ އާ ގަވާއިދުގެ ދަށުން ކައިވެނިކޮށް ދިނުމަށް އެދި ހުށަހަޅާ ފޯމާއެކު ދެ މީހުންގެ ތެލެސީމިއާ ކާޑު ހުށަހެޅުން މެޖިސްޓްރޭޓް ކޯޓުތަކުން ލާޒިމުކޮށްފިއެވެ.
މެޖިސްޓްރޭޓް ކޯޓުތަކުން ނެރެފައިވާ އިއުލާންތަކުގައި ބުނެފައިވަނީ މެޖިސްޓްރޭޓް ކޯޓުތަކުގެ ގަވާއިދުގެ 83 ވަނަ މާއްދާގައިވާ ގޮތުގެ މަތިން، ކައިވެނިކުރަން އެދޭ ދެ މީހުން ތެލެސީމިއާއަށް ޓެސްޓުކޮށް، އޭގެ ނަތީޖާ ކައިވެނި ކުރަން ހުށައަޅާ ފޯމާއެކު ހުށަހަޅަން ޖެހޭނެ ކަމަށެވެ.
އަދި ކައިވެނިކުރަން އެދޭ ދެ މީހުންގެ ތެރެއިން އެކަކީ ތެލެސީމިއާ ވާރުތަ ކުރާ ގޮތް ނެތް މީހެއްކަން ކަށަވަރުވާ ނަމަ، ދެވަނަ މީހާގެ ޓެސްޓުގެ ނަތީޖާ ހުށަހެޅުން ލާޒިމު ނުވާނެ ކަމަށެވެ. މި އުސޫލަށް އަމަލުކުރަން ފަށާފައިވަނީ މިއަދުން ފެށިގެންނެވެ. މީގެ ކުރިން ވެސް ފެމިލީ ކޯޓާއި ބައެއް މެޖިސްޓްރޭޓް ކޯޓުތަކުން ކައިވެނި ފޯމާއެކު ތެލެސީމިއާ ކާޑު ހުށަހަޅަން އަންގާފައިވެއެވެ. ނަމަވެސް، ބައެއް ރަށްރަށުގައި މިކަމަށް އެކަށީގެންވާ ސަމާލުކަމެއް ނުދީފައި ނުވެއެވެ.
ކައިވެނިކުރުމުގެ ކުރިން ތެލެސީމިއާއަށް ޓެސްޓުކުރުމަކީ އާންމު ސިއްހަތު ރައްކާތެރިކުރުމުގެ ގޮތުން ބާރުއަޅަމުން އަންނަ ވަރަށް މުހިންމު ކަމެކެވެ.