ވޭތުވެދިޔަ ދޮޅު މަސް ދުވަހުގެ ތެރޭގައި 83 ކިލޯގެ މަސްތުވާތަކެތި އަތުލައިގަނެފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ ވޭތުވެ ދިޔަ ދޮޅު މަސް ދުވަހުގެ ތެރޭގައި ފުލުހުންނާއި ކަސްޓަމްސް ގުޅިގެން ހިންގުނު އެކި އޮޕަރޭޝަންތަކުގައި ޖުމްލަ 83.45 ކިލޯގެ މަސްތުވާތަކެތި ވަނީ އަތުލައިގަނެވިފައި ކަމަށެވެ.
މި ތަކެތީގެ މަގުމަތީ އަގު 72.2 މިލިޔަން ރުފިޔާއަށް އަރާ ކަމަށް ވަޒީރު އިޙްސާން ވިދާޅުވިއެވެ. މީގެ ތެރެއިން 72 ކިލޯގެ މަސްތުވާތަކެއްޗަކީ ރާއްޖޭގެ ބޯޑަރު ހުރަސްކޮށް އެތެރެކުރަން މަސައްކަތް ކުރަނިކޮށް ކަސްޓަމްސްއިން އަތުލައިގެންފައިވާ މަސްތުވާތަކެތި ކަމަށް ވަޒީރު ވިދާޅުވިއެވެ. މިއީ ތަފާތު 8 މައްސަލައެއްގެ ތެރެއިން އަތުލައިގެންފައިވާ މަސްތުވާތަކެތިކަން ދާޚީލީ ވަޒީރު ވަނީ ހާމަކުރައްވާފައެވެ. ވަޒީރު ވިދާޅުވީ ހަމައެކަނި އެ ތަކެތީގެ އަގަކީ 59 މިލިއަން ރުފިޔާ ކަމަށެވެ.
ކަސްޓަމްސްގެ މަސައްކަތް ހަރުދަނާކޮށް ވައިގެ މަގުންނާއި ކަނޑުމަގުން ރާއްޖެ އެތެރެކުރަން އުޅެނިކޮށް އަތުލައިގަނެފައިވާ މަސްތުވާތަކެތީގެ އަދަދު އިތުރުވެފައިވާއިރު، ބޭރުގައި ތިބެގެން ރާއްޖެއަށް މަސްތުވާތަކެތި އެތެރެކުރާ ފަރާތްތައް ހުއްޓުވުމުގެ މަސައްކަތް މެދުކެނޑުމެއް ނެތި ކުރަމުންދާ ކަމަށް ވަޒީރު ވިދާޅުވިއެވެ. ސަރުކާރުން ވަނީ މީގެ ކުރިން މިފަދަ 3 ފަރާތެއް ދެނެގަނެވިފައިވާކަން ހާމަކޮށްފައެވެ.
ރާއްޖެއަށް އެތެރެކުރެވޭ މަސްތުވާތަކެތީގެ އިތުރުން، ޤާނޫނާއި ޤަވާއިދާއި ޚިލާފަށް އެތެރެކުރެވޭ އެހެން ބާވައްތައްވެސް އަތުލައިގަންނަމުންދާކަން ވަޒީރު ވަނީ ހާމަކުރައްވާފައެވެ. އެގޮތުން ވޭތުވެ ދިޔަ ދޮޅު މަސްދުވަހުގެ ތެރޭގައި 7000 ވޭޕް ސްޓިކް އަދި ޤަވާއިދާ ޚިލާފަށް އެތެރެކޮށްފައިވާ 2 މިލިޔަން ސިނގިރޭޓު އަތުލައިގަނެފައިވާ ކަމަށް ވަޒީރު އިޙްސާން ވަނީ ހާމަކުރައްވާފައެވެ.
އިހްސާން ވިދާޅުވީ މަސްތުވާތަކެތި އެތެރެވުން ހުއްޓުވުމަށް މަސައްކަތް ކުރަމުންދާ ކަމަށާއި ރާއްޖެއިން ބޭރުގައި ތިބެގެން ރާއްޖެއަށް މަސްތުވާތަކެތި އެތެރެކުރުމަށް މަސައްކަތްކުރާ ތިން ދިވެހިން ދެނެގަނެފައިވާ ކަމަށެވެ. އަދި އެ މީހުން ގެނައުމުގެ މަސައްކަތް ކުރަމުންދާ ކަމަށް ވިދާޅުވި އެވެ