ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގެ ކޯރަމް ހަމަނުވުމުން ޖަލްސާ ނުބޭއްވި ނިންމާލައިފިއެވެ
ކޯރަމް ހަމަނުވާތީ ޖަލްސާ ނުބޭއްވި ނިންމާލިކަން އިއުލާނުކުރެއްވާ ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ ޖަލްސާގެ ވަގުތު ހަމަވި އިރު ވެސް ކޯރަމް ހަމަވާ ވަރަށް މެމްބަރުން ނެތް ކަމަށާއި އެހެންކަމުން ޖަލްސާ ކުރިއަށް ގެންދެވެން ނެތް ކަމަށެވެ.
މަޖިލީހުގެ ގަވާއިދުގައިވާ ގޮތުގެ މަތިން ޖަލްސާ ކުރިއަށް ގެންދެވެނީ ޖަލްސާ ފަށާއިރު 22 މެންބަރު ހާޒިރުވުމުންނެވެ.
މަޖިލީސް ޗުއްޓީއަށް ދިޔަ ފަހުން އަލުން ޖަލްސާތައް ފެށީ މިދިޔަ ހޯމަ ދުވަހު. ފާހަގަ ކޮށްލެވޭގޮތުގައި މަޖިލީސް ޗުއްޓީއަށް ދިޔައިރުވެސް މަޖިލިސްތެރޭގައި ހަމަނުޖެހުން ބޮޑުވެ، މުހިންމު ގިނަ ބިލުތަކެއްގެ މަސައްކަތް ވަނީ މަޖެހިފައެވެ.
ޗުއްޓީ ނިންމާ މިދިޔަ ހޯމަ ދުވަހު ބޭއްވި ޖަލްސާ ވެސް ވަނީ ކުރިޔަށް ނުގެންދެވި ނިންމާލާފައެވެ. އެދުވަހުގެ ޖަލްސާ ފެއްޓެވުމަށް ފަހު އެޖެންޑާގައި ހިމެނޭ ކަންކަން އިއުލާންކުރައްވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ދަ ޑިމޮކްރެޓްސްގެ މެމްބަރުން ސޮއިކުރި ކަމުގެ ސިޓީ މަޖިލީހަށް ލިބިފައިނުވާތީ ކޮމިޓީތައް ކަނޑައެޅުން އެ ޖަލްސާގައި ކުރިއަށް ގެންދިއުމަށް ނިންމާފައިނުވާ ކަމަށެވެ.
އެއާއެކު އެމްޑީޕީއަށް ނިސްބަތްވާ މެމްބަރުން ވަނީ އެކަމާ ނުރުހުން ފާޅުކުރަށްވާ އަޑުގަދަ ކުރަށްވާފައެވެ.
ރައްޔިތުންގެ މަޖިލީހުގައި 87 މެންބަރުން ތިއްބަވާއިރު، އާންމުކޮށް މަޖިލީހުގެ ޖަލްތާކަށް ވަޑައިގަންނަވަނީ 30 ނުވަތަ 40 ހަކަށް މެންބަރުން ކަން ފާހަގަ ކޮށްލެވެއެވެ. އަދި މަޖިލީހުގެ ޖަލްސާތަކަށް މެންބަރުން ވަޑައިނުގަންނަވާ ކަމުގެ ފާޑު ކިއުން މިފަހަކަށް އައިސް ވަނީ ވަރަށް ބޮޑަށް އަމާޒުވެފައެވެ.