މާލޭ ބަންޑާރަ މިސްކިތާއި، ޒިކުރާ މިސްކިތް ހުރި ބިމުގައި ޒަމާނީ ފެންވަރުގެ ބޮޑު މިސްކިތެއް އެޅުމަށް ނިންމާފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ރާއްޖޭގެ އެކި ކަންކޮޅުތަކުގައި ސަރުކާރުންނާއި އަމިއްލަ ފަރާތްތަކުގެ ޚަރަދުގައި މިސްކިތް އިމާރާތްކުރުމުގެ މުހިންމު މަސައްކަތްތަކެއް ދަނީ ކުރަމުންނެވެ. މީގެ އިތުރުން ގިނަ މިސްކިތްތަކެއް އާބާތުރަ ފިލުމުގެ މަސައްކަތްވެސް ދަނީ ކުރަމުންނެވެ.
މާލެ ސަރަހައްދުގެ މިސްކިތްތަކުގެ ޖާގަ އިތުރުކޮށް އައު މިސްކިތްތައް އެޅުމުގެ މަސައްކުރަމުންދާއިރު ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރަމަޟާންމަހަށްފަހު ފެށިގެންދާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ވިދާޅުވެފައެވެ. އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ، ޒިކުރާ މިސްކިތް ހުރި ބިމުގައި އަތު މިސްކިތެއް އެޅުމަށްޓަކާ ރަމަޟާންމަހުގެ 27 ވިލޭރޭ ބިންގާ އެޅުމަށް އެހީދެއްވާ ފަރާތުން އެދިފައިވާކަމަށެވެ. އަދި ރަމަޟާން މަސް ނިމުމުން ވަގުތީ މިސްކިތް ތަޅާލައި، އަމަލީ މަސައްކަތް ފެށިގެންދާނެކަމަށް ވަޒީރު ވިދާޅުވިއެވެ. މިއާއެކު މާލޭގައި ހުރި ބޮޑެތި ހުރިހާ މިސްކިތްތަކެއް އައުވެގެންދާނެކަން އިސްލާމީ ކަންތައްތަކާ ބެހޭ ވަޒީރު ފާހަގަކުރެއްވިއެވެ.
ބަންޑާރަ މިސްކިތުގެ އިތުރުން، މާލޭގެ އެހެން ބައެއް ސަރަހައްދުތަކުގައި ހުރި ބައު މިސްކިތްތަކުގެ ބަދަލުގައި އައު މިސްކިތްތައް ބިނާކުރުމަށް ވުޒާރާ އިން ވަނީ އަމާޒު ހިފާފައެވެ. އެގޮތުން ވިލިމާލޭގައި ހުންނަ މަސްޖިދުއްސަލާމް އާއި ޒިކުރާ މިސްކިތުގެ އަމަލީ މަސައްކަތްވެސް ރަމަޟާން މަހަށްފަހު ފެށުމަށް ވަނީ ތާވަލުކޮށްފައެވެ.
ސަރުކާރުގެ ޚަރަދުގައި ޢިމާރާތްކުރި ބައެއް މިސްކިތްތަކާއި، އަމިއްލަ ފަރާތްތަކާއި ގުޅިގެން ޢިމާރާތްކުރި މިސްކިތްތައް ހިމެނޭހެން މި ރަމަޟާން މަހަށް 15 މިސްކިތެއް މިހާތަނަށް ވަނީ ހުޅުވާފައެވެ. ރޯދަމަސް ނިމޭއިރު ހުޅުވޭ މިސްކިތްތަކުގެ އަދަދު 20އަށް އަރާނެކަަމަށް އިސްލާމީ ކަންތައްތަކާ ބެހޭ ވުޒާރާއިން ބުނެއެވެ.
ސަރުކާރުގެ އަމާޒަކީ ރާއްޖޭގެ މިސްކިތްތަކުގެ ހާލަތު ރަނގަޅުކޮށް، މުޖުތަމައަށް ބޭނުންވާ އެކަށީގެންވާ ޖާގަ މިސްކިތްތަކުގައި ގާއިމުކޮށްދިނުމެވެ.