ދިވެހިރާއްޖެ އަދި މޮރިޝަސް އާއި ދެމެދު އޮތް ގުޅުން މޮރިޝަސް އިން ކަނޑާލިކަމުގައި ވިނަމަވެސް މޮރިޝަސްއަށް ހައްގު ނޫން ތަނެއް މޮރިޝަސްއަށް ހައްގެއް ނުވާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ.
މި ސަރުކާރުން ފޯޅަވަހީގެ ސިޔާދަތީ ބާރު ރާއްޖެއަށް ހޯދުމަށް ކުރަމުންދާ މަސައްކަތްތަކުގެ ތަފްސީލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 3 ވަނަ ރިޔާސީ ބަޔާނުގައި ވަނީ ހާމަކުރައްވާފައެވެ. އިނގިރޭސިވިލާތާއެކު މަޝްވަރާތައް ކުރެވި، ކުރީ ސަރުކާރުގެ ނިންމުން ގަބޫލު ނުކުރައްވާ ކަމަށާއި، ކުރީ ސަރުކާރުން މޮރިޝަސްއަށް ފޮނުވި ސިޓީ އަނބުރާ ގެންދިއުމަށް ނިންމެވި ކަމަށް އެމަނިކުފާނު އިއުލާން ކުރެއްވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ފޯޅަވައްސަކީ ރާއްޖޭގެ ތަނެއްގެ ގޮތުގައި ތާރީހީ ގޮތުންވެސް ވަރަށް ގިނަ ހެކިތައް ފެންނަން އޮތް ތަނެއް ކަމަށެވެ. 9 ވަނަ ޙަސަން ރަސްގެފާނުގެ ސިޓީއެއް ޗާޓަކާއެކު 16 ވަނަ ޤަރުނުގައި އޮތްކަމަށް ރައީސް ވިދާޅުވިއެވެ. އެތަނަކީ، ރާއްޖޭގެ ތަނެއް ކަމަށާއި އެތަނުގެ ހައްގުވެރި ފަރާތާ އެތަން ހަވާލުކުރާ ކަމަށްވަންޏާ، ރާއްޖެ އަށްވުރެ ހައްގުކަން ބޮޑު ބައެއް ނެތް ކަމަށް ރައީސް ފާހަގަކުރެއްވިއެވެ.
އެގޮތުން އެމަނިކުފާނު ވިދާޅުވީ، މޮރިޝަސް އިން ރާއްޖެއާ އެކު އޮތް ގުޅުން ކަނޑާލުމަކީ ކުރި ވަރަށް ތާކުން ތާކުން ނުޖެހޭ ކަމެއްކަމަށެވެ. ޗާގޯސް ނުވަތަ ފޯޅަވައްސަކީ ރާއްޖޭގެ ހައްގެއް ކަމުގައި ފާހަގަކުރައްވައި ރައީސް އިތުރަށް ވިދާޅުވީ، އެއްވެސް ގައުމަކަށް ޗާގޯސް ހަވާލުކުރަންޏާ ހަވާލުކުރަން ވާނީ ދިވެހިރާއްޖެއާ ކަމަށެވެ. އަދި މޮރިޝަސް އިން ގުޅުން ކަނޑާލިޔަސް ހަގީގަތް ބަދަލެއް ނުވާނެ ކަމަށް ވެސް ރައީސް ވިދާޅުވިއެވެ.
ކުރީ ސަރުކާރުން ކަނޑުގެ އިން ކަނޑައެޅުމުގެ މައްސަލާގައި އަމަލުކުރި ގޮތުން ގެއްލުނު ކަނޑުގެ ސަރަހައްދު ހޯދުމަށް މަސައްކަތްކުރެއްވުމަކީ ރައީސްގެ ވައުދުފުޅެކެވެ.
އެގޮތުން ސަރުކާރުން އަންނަނީ އެކަމުގައި އެޅޭނެ ފިޔަވަޅުތައް ބަލައި، ޑިޕްލޮމެސީ މެދުވެރިކޮށް ހައްލުތަކެއް ހޯދުމަށް މަސައްކަތްކުރަމުންނެވެ.