އިސްލާމީ އުންމަތަށް ނަޞްރެއްލިބޭނީ އުންމަތް އެކަތިގަނޑަކަށްވެގެންކަމަށާއި، ބައިބައިވެއްޖެ ނަމަ އުންމަތް ބަލިކަށިވެގެން ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާގެ މައުޟޫއުއަކީ "ރަމަޟާންމަހުގެ ފަހު ދިހަ" މިއެވެ.
ރަމަޟާން މަހުގެ ފަހު ދިހައިގެ ދުވަސްތަކާ ގުޅޭގޮތުން ޚުތުބާގައި ވަނީ އިސްލާމީ އަޚުވަންތަކަމާއި، ޒަކާތުގެ މުހިންމުކަމާއި، ޒުވާނުންގެ ދައުރާ ގުޅޭގޮތުން އަގުހުރި ނަސޭހަތްތަކެއް ދީފައެވެ.
ޚުތުބާގައި ފާހަގަކުރިގޮތުގައި، އިސްލާމީ އުންމަތް މިއަދު ގުނަމުންދަނީ ތާރީޚީ ގޮތުން ނުރައްކާތެރި ދުވަސްތަކެކެވެ. ދުޝްމަނުން ދަނީ އުންމަތް ބައިބައިކޮށް، އިސްލާމީ ޤައުމުތަކުގައި ލޭއޮހޮރުވުންތައް އިތުރުކުރުމަށް ގިނަގުނަ މަސައްކަތްތަކެއް ކުރަމުންނެވެ. މިފަދަ ޙާލަތެއްގައި މުސްލިމުންގެ ސަފުތައް ބަދަހިކޮށް، މަތިވެރި އިސްލާމީ ޢަޤީދާގައި ސާބިތުވެ ތިބުމަކީ ކޮންމެހެން ކުރަންޖެހޭ ކަމެއް ކަމަށް ޚުތުބާގައި ބުނެފައިވެއެވެ.
ޒުވާނުންނަށް މުޚާޠަބުކޮށް ޚުތުބާގައި ބުނީ، ރަމަޟާން މަހަކީ ތަރުބަވީ މަދުރަސާއެއް ކަމަށާއި، މަސްތުވާތަކެއްޗާއި ދުންފަތުގެ އިސްތިޢުމާލުކުރުން ފަދަ ނޭއްގާނީ ޢަމަލުތަކުން އެއްކިބާވެ، ރިވެތި އަޚުލާޤުން ޒީނަތްތެރިވުމަށް ޒުވާނުން ޢަޒުމް ކަނޑައަޅަންޖެހޭ ކަމަށެވެ. އަދި ޢިލްމާއި ފިކުރީ ގޮތުން ކުރިއަރައި، އިސްލާމީ ޢަޤީދާގައި ސާބިތުވެ ތިބި ބަޔަކަށް ވުމަށްވެސް ނަޞޭޙަތްތެރިވެފައިވެއެވެ.
މީގެ އިތުރުން، ކީރިތި ރަސޫލާ ﷺ ފަހު ދިހައިގެ ރޭތަކުގައި އަޅުކަން ކުރެއްވުމުގައި ހީވާގިވެވަޑައިގެންނެވި މިންވަރާއި، އެކަލޭގެފާނުގެ އަހުލުވެރިން އަޅުކަމަށް ހޭލެއްވިކަން ޚުތުބާގައި ބަޔާންކުރިއެވެ. އަދި މި ދުވަސްވަރަކީ ދީލަތިކަމުގެ މައްސަރުކަމަށްވާތީ، ޞަދަޤާތްކުރުން ގިނަކުރުމަށާއި ފިޠުރު ޒަކާތް ދެއްކުމަށް އަވަސްވެގަތުމަށްވެސް ވަނީ އިރުޝާދު ދީފައެވެ.
ރަމަޟާން މަހަކީ ދީލަތިކަމާއި ހޭދަކުރުމުގެ މައްސަރުކަން ފާހަގަކޮށް، ފަހު ދިހައިގެ ދުވަސްތަކުގައި ޞަދަޤާތްކުރުން ގިނަކުރުމަށް ޚުތުބާގައި ބާރުއެޅިއެވެ. ވަކިން ޚާއްޞަކޮށް، ފިޠުރު ޒަކާތް ނެރުމަށް ސަމާލުކަންދީ އެކަމަށް އަވަސްވުމަށް ވަނީ ނަސޭހަތްތެރިވެފައެވެ. ފިޠުރު ޒަކާތަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެއްކަން ހަނދާންކޮށްދެމުން، އޭގެ މިންވަރަކީ ބޮލަކަށް ޞާޢެއް ނުވަތަ މިޒަމާނުގެ މިނުން ނަމަ 2 ކިލޯ 400 ގުރާމުކަން ޚުތުބާގައި ބަޔާންކުރިއެވެ.
ޚުޠުބާގައި އިތުރަށް ބުނީ، އިސްލާމީ ޙަޟާރަތު އަލުން އިޢާދަކުރުމަށްޓަކައި ޒުވާން ޖީލު އިޚުލާޞްތެރި ޢަޒުމަކާއެކު ތެދުވަންޖެހޭ ކަމަށެވެ. އަދި މަސްތުވާތަކެއްޗާއި، ދުންފަތުގެ އިސްތިޢުމާލުކުރުމާއި، ނޭއްގާނީ ޢަމަލުތަކުން އެއްކިބާވެ، ރިވެތި އަޚުލާޤުން ޒީނަތްތެރިވުމަށް ޒުވާނުންނަށް ވަނީ ގޮވާލާފައެވެ.
މީގެ އިތުރުން، ޢިލްމާއި ފަންނިއްޔާތުގެ ގޮތުން ކުރިއަރައިދިއުމަކީ މުސްލިމުންނަށް ޢިއްޒަތާއި ޝަރަފު ލިބޭނެ މަގުކަމުގައި ވެސް ޚުތުބާގައި ފާހަގަކޮށްފައިވެއެވެ.