ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނަސް އެކަންކުރާވަރަށް ސަރުކާރުގައި ފައިސާ އެބަހުރިކަމަށާ، 500 މިލިޔަން ޑޮލަރުގެ ސުކޫކު 8 އެޕްރީލް 2026ގައި ދައްކަން ސަރުކާރުން ވާނީ މިހާރު ނިންމާފައިކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ، މިއަހަރުގެ ރިޔާސީ ބަޔާނުގައި ވިދާޅުވެފައިވާ ގޮތުގެ މަތިން އެމަނިކުފާނު މިއަހަރު ކުރިއަށްގެންދެވި ފުރަތަމަ ޕްރެސް ކޮންފަރެންސްގައި ވާހަކަފުޅުދައްކަވަމުންނެވެ. މި ޕްރެސް ކޮންފަރެންސް އޮތީ މިއަދު ހެނދުނު، ރައީސުލްޖުމްހޫރިއްޔާގެ އޮފީހުގައެވެ.
ސުކޫކާ ގުޅޭ އަދާހަމަތައް ނޫސްވެރިންނާ ހިއްސާކުރައްވަމުން ރައީސުލްޖުމްހޫރިއްޔާ ވިދާޅުވީ، މި ފައިސާ ދެއްކެވުމަށްޓަކައި 650 މިލިއަން ޑޮލަރަށްވުރެ ބޮޑުއަދަދެއް މިހާރުވެސް ރައްކާކުރެވިފައި އެބަހުރިކަމުގައެވެ. 500 މިލިއަން ޑޮލަރުގެ ސުކޫކު ދެއްކެވުމުންވެސް، 150 މިލިއަން ޑޮލަރަށްވުރެ ބޮޑުއަދަދެއް ބާކީ ހުންނާނެ ކަމުގައި އެމަނިކުފާނު ފާހަގަކުރެއްވިއެވެ. މިގޮތުން ސޮވްރިން ޑިވަލޮޕްމަންޓް ފަންޑް (އެސް.ޑީ.އެފް) ގައި، 320 މިލިއަން ޑޮލަރަށްވުރެ ގިނައިން މިހާރުވެސް އެބަހުރިކަމަށާ، ޔޫޒަބަލް ރިޒާވްގެ ގޮތުގައި 330 މިލިއަން ޑޮލަރަށްވުރެ ބޮޑުއަދަދެއް އެބަހުރިކަމުގައި އެމަނިކުފާނު ވިދާޅުވިއެވެ.
ސުކޫކު ދެއްކެވުމަށް ހަމަޖެހިފައިވާ، 8 އޭޕްރިލް 2026 ވަނަ ދުވަހަށް ވަނީ ތައްޔާރުވެފައިކަމުގައި ވިދާޅުވެ ވާހަކަފުޅުކުރިއަށްގެންދަވަމުން ރައީސުލްޖުމްހޫރިއްޔާ ވިދާޅުވީ، ދިވެހިރާއްޖޭގެ ތާރީޚުގައިވެސް ގްރޮސް ރިޒާވް ގޮސްފައިނުވާހާ މަތީ މިންވަރަކަށް އެ ޢަދަދު ގެންދެވިފައިވާކަމުގައެވެ. ރިޔާސީ ބަޔާނުގައި ދެންނެވި ގްރޮސް ރިވާޒްގެ މިންވަރަކީވެސް ރެކޯޑެއްކަން ފާހަގަކުރައްވަމުން އެމަނިކުފާނު ވިދާޅުވީ، ދިވެހިރާއްޖޭގެ ގްރޮސް ރިޒާވް މިހާރު އެ ރެކޯޑަށްވުރެވެސް މައްޗަށް ގެންދެވިފައިވާކަމުގައެވެ. އެގޮތުން 1.27 ބިލިއަން ޑޮލަރަށް މި ޢަދަދު މިހާރު އަރާފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ. މިކަންމިހެން އޮތުމީ، މެދުއިރުމަތީގައި މިހާރު ހިނގަމުންދާ ކަންކަމާ ގުޅިގެން ކުރާ އަސަރުތައް މެނޭޖުކުރުމަށް ލިބޭ ލުޔެއްކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ކަންމިހެން އޮތްއިރު، އިތުރު ފައިސާ ހޯދުމުގެ ކާމިޔާބު މަސައްކަތްތަކެއް، ކަމާބަހާ ފަރާތްތަކާއެކު މަޝްވަރާކުރެވިގެން ކުރިއަށްގެންދެވޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ނިމުމަކާ ހިސާބަށް މި މަޝްވަރާތައް ގޮސްފައިވާކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ ބޭރުގެ ދަރަނި ދެއްކެވުމުގައި ދިވެހިރާއްޖެއަށް އެއްވެސް ވަރެއްގެ ކަންބޮޑުވުމެއް ނެތްކަމުގައެވެ.
އެމަނިކުފާނުގެ ސަރުކާރުން ދިވެހިރާއްޖޭގެ އިޤްތިޞާދީ ކަންކަން މެނޭޖުކުރައްވަނީ ރާއްޖެއިން ބޭރަށް ދައްކަންޖެހޭ ދަރަނި ދެއްކޭނެ ގޮތައް ކަންކަން ކުރައްވަމުން، ރާއްޖޭގެ އެތެރޭގެ ފަރާތްތަކަށްވެސް ދޭން ހުރި ފައިސާއެއް ދައްކަވަމުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން، ކުރިއަށް އޮތް ހަފުތާއަކީވެސް ރާއްޖޭގައި މަސައްކަތްކުރާ ކުދި ވިޔަފާރިތައް މެދުވެރިކޮށް ސަރުކާރުން ކުރުވާފައިވާ މަސައްކަތްތަކަށް، މަދުވެގެން 200 މިލިއަނެއްހާ ރުފިޔާ ދެވޭނެ ހަފުތާއެއްކަމުގައި ރައީސުލްޖުމްހޫރިއްޔާ ވިދާޅުވިއެވެ.
ބޭރު ފައިސާއާ ބެހޭ ޤާނޫނުގެ ދަށުން ފައިސާ މާރުކުރެވިފައިވާ ގޮތުގެ ތަފާސް ހިސާބުތައް ހިއްސާކުރައްވަމުން ރައީސުލްޖުމްހޫރިއްޔާ އިތުރަށް ވިދާޅުވީ، ދިވެހިރާއްޖޭގެ އިޤްތިޞާދީ ކަންކަން އޮތީ ވަރަށް ރަނގަޅަށް ކަމުގައެވެ. ހަމަމިއާއެކު، އެއްވެސް ވަރެއްގެ ކަންބޮޑުވުމެއް ނެތް ކަމަށާ، ދިވެހިރާއްޖޭގައި އޮތީ ވަރަށް ވަރުގަދަ، ބާރު ދުވެލީގައި ފުޅާވެ، ކުރިއަރަމުންދާ އިޤްތިޞާދެއް ކަމުގައިވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ ފާހަގަކުރައްވާފައެވެ.