ގަތަރު އެއާވޭސްގެ ދަތުރުތައް އަލުން ރާއްޖެއަށް ފަށައިފި

ގަތަރު އެއާވޭސްގެ ދަތުރުތައް އަލުން ރާއްޖެއަށް ފަށައިފިއެވެ.

ގަތަރު އެއާވޭސްއިން ރާއްޖެއަށް ކުރަމުން އައި ދަތުރުތައް ވަގުތީގޮތުން މެދުކަނޑާލީ މެދުއިރުމަތީގެ ހަމަނުޖެހުމާ ގުޅިގެން އެސަރަހައްދުގެ ވައިގެ ސަރަހައްދު ބަންދުވުމާ ގުޅިގެންނެވެ.

ގަތަރު އެއާވޭސްއިން މިއަދު ދަތުރުތައް ފަށާފައިވާއިރު، އެއާލައިނުން ރާއްޖެއަށް ކޮންމެ ދުވަހަކުވެސް ދަތުރުކުރާނެ ކަން ފާހަގަކޮށް އެމްއޭސީއެލުން ބުނީ އެއީ ހަފުތާއަކު 7 ދަތުރު ކަމަށެވެ.

ގަތަރު އެއާވޭސް އަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން ގެންނަ އެއް އެއާލައިނެވެ. ގަތަރު އެއާވޭސްއިން ރާއްޖެއަށް ދަތުރުތައް ފެށުމާއެކު، މެދުއިރުމައްޗާއި ޔޫރަޕް އަދި އެމެރިކާ ފަދަ ގައުމުތަކަށް ދަތުރުކުރާ ފަރާތްތަކަށް ކަނެކްޓިވިޓީ އިތުރަށް ފުޅާވެގެންދާނެކަމަށް ގަތަރު އެއާވޭސްއިން ގަބޫލުކުރެއެވެ.

މިހާރު ހަމަޖެހިފައިވާ ތާވަލާ އެއްގޮތަށް، ގަތަރު އެއާވޭސްއިން ހަފްތާއަކު ފަސް ފްލައިޓް ރާއްޖެއަށް ބާއްވާނެއެވެ. މި ތާވަލަށް 15 އޭޕްރީލްގެ ނިޔަލަށް ދަތުރުތައް ކުރިއަށްދާނެ ކަމަށް އެ އެއާލައިނުން މަޢުލޫމާތުދެއެވެ. އަދި ސަރަޙައްދީ ހާލަތަށް ބަލައި، ދަތުރުތަކުގެ އަދަދު އިތުރުކުރުމަށް ކުރަންޖެހޭ ދިރާސާތައް ކުރަމުންދާނެ ކަމަށްވެސް ބުނެފައިވެއެވެ.

ދަތުރުތައް މެދުކަނޑާލުމުގެ ސަބަބުން ދަތުރަށް ބުރޫއެރި ފަރާތްތަކަށް ލުއިފަސޭހަ ގޮތްތަކެއް އެއާލައިނުން ވަނީ ހަމަޖައްސައިދީފައެވެ. އެގޮތުން، އެ ފަރާތްތަކަށް ދޫކޮށްފައިވާ ޓިކެޓްތައް 15 ޖޫންއާ ހަމައަށް ބޭނުންކުރެވޭނެ ގޮތް ވަނީ ހަމަޖައްސާފައެވެ.

އޭޕްރީލް މަހުގެ މެދުތެރެއިން ފެށިގެން ކުރިއަށް ހުރި ދަތުރުތަކުގެ ތާވަލަށް ބަދަލު އައުން އެކަށީގެންވާތީ، ދަތުރުވެރިން ފްލައިޓްގެ އެންމެ ފަހުގެ މަޢުލޫމާތު އެއާލައިންގެ ވެބްސައިޓް މެދުވެރިކޮށް ނުވަތަ ކަސްޓަމާ ސާވިސް މެދުވެރިކޮށް ޗެކްކުރުމަށް ވަނީ އިލްތިމާސްކޮށްފައެވެ.