.JPG&w=3840&q=75)
ހަނގުރާމައާ ގުޅިގެން މެދުކަނޑާލާފައިވާ އިއްތިހާދު އެއާވޭސްގެ ދަތުރުތައް، މިއަދުން ފެށިގެން ވަކި މަންޒިލްތަކަކަށް އަލުން ފެށުމަށް އެ އެއަރލައިނުން ނިންމައިފިއެވެ.
އިއްތިހާދު އެއާވޭސްއިން ހާމަކުރި ގޮތުގައި، މި ދަތުރުތައް އަލުން ފަށަން ނިންމީ ކަމާބެހޭ އިދާރާތަކާ ގުޅިގެން ސަލާމަތީ ގޮތުން ބަލަންޖެހޭ ކަންކަން ފުރިހަމައަށް ކަށަވަރު ކުރުމަށްފަހުގައެވެ. މި ދަތުރުތައް ކުރުމަށް ނިންމާފައިވަނީ މިމަހުގެ 6އިން 19އަށެވެ.
އެ އެއާލައިނުން އަބޫދާބީއާއި ދުނިޔޭގެ މުހިންމު 25 މަންޒިލަކާ ދެމެދު ދަތުރުތައް ކުރުމަށް ހަމަޖެހިފައިވެއެވެ. އޭގެ ތެރޭގައި ރާއްޖޭގެ އިތުރުން ލަންޑަން، ނިއުޔޯކް، ފްރެންކްފަޓް، މިލާން، ޕެރިސް، ޓޮރޮންޓޯ، ކުއާލަލަމްޕޫރު، ކޮލަމްބޯ އަދި ބެންކޮކް ފަދަ ސިޓީތައް ހިމެނެއެވެ.
ނަމަވެސް، މި ދަތުރުތަކުގެ ބޭރުން އަބޫދާބީއަށް ކުރަން ހަމަޖެހިފައިވާ އެހެން ހުރިހާ ޝެޑިއުލް ފްލައިޓްތަކެއް އަދިވެސް އޮތީ މެދުކަނޑާލާފައެވެ. އެހެންކަމުން، އެއާލައިނުން ސީދާ ގުޅައިގެން ނުވަތަ ދަތުރު ކަށަވަރުވެފައިވާކަމުގެ މައުލޫމާތު ލިބިފައިވާ ފަރާތްތައް ފިޔަވައި އެހެން މީހުން އެއާޕޯޓަށް ނުދިއުމަށް އެ އެއާލައިނުން އިލްތިމާސްކުރެއެވެ.
އެމެރިކާ-އީރާން ހަނގުރާމައާ ގުޅިގެން ދަތުރުތައް މެދުކަނޑާލުމުގެ ސަބަބުން ދަތުރު ނުކުރެވިފައިވާ ފަރާތްތަކަށް އިސްކަންދީގެން ޖާގަ ހަމަޖައްސައިދިނުމުގެ މަސައްކަތް އެ އެއަރލައިނުން އަންނަނީ ކުރަމުނެނެވެ.
އެގޮތުން ފެބުރުވަރީ 28ގެ ކުރިން ޓިކެޓް ނަގާފައިވާ އަދި 21 މާޗުއާ ހަމައަށް ދަތުރުކުރަން އޮތް ފަރާތްތަކަށް، އެއްވެސް އިތުރު ފީއަކާ ނުލައި 15 މެއި 2026 ގެ ކުރިން ދަތުރުގެ ތާރީޚު ބަދަލުކުރެވޭނެއެވެ.
އަދި މިމަހުގެ 21 އާހަމައަށް ދަތުރުކުރަން އޮތް ފަރާތްތަކަށް، ދަތުރު ކެންސަލްކޮށް ރީފަންޑަށް އެދުމުގެ ފުރުސަތު އޮންލައިން ފޯމު މެދުވެރިކޮށް ނުވަތަ ޓްރެވަލް އެޖެންޓުން މެދުވެރިކޮށް ލިބޭނެކަމަށް އެ އެއާލައިނުން ބުނެއެވެ.
މީގެއިތުރުން، ކޯލް ސެންޓަރުތަކަށް ބާރުބޮޑުވެފައިވާތީ، ރީފަންޑަށް އެދޭ ފަރާތްތަކުން އޮންލައިން ފޯމު ބޭނުންކުރުމަށް އެ އެއަރލައިނުންވަނީ އެދިފައެވެ.
އިއްތިހާދުން ބުނެފައިވާ ގޮތުން، ދަތުރުތައް މެދުކަނޑާލުމުގެ ސަބަބުން ދަތުރު ނުކުރެވިފައިވާ ފަރާތްތަކަށް އިސްކަންދީގެން ޖާގަ ހަމަޖައްސައިދިނުމުގެ މަސައްކަތް އެ އެއާލައިނުން ދަނީ ކުރަމުންނެވެ.