އީގަލް ހިލްސްއާ އެކު އިތުރު އެއްބަސްވުންތަކެއްގައި ސޮއިކުރުމުގެ ކުރިން، ނުވަތަ މި މަޝްރޫޢު އިތުރަށް ކުރިއަށް ގެންދިއުމުގެ ކުރިން، މަޝްރޫޢުގެ އިޤްތިޞާދީ ފައިދާއާއި، ޚަރަދާ ކަން އެކަށޭނަ މިންވަރާއި، ނަތީޖާ ނެރެވޭނެ މިންވަރުގެ އިތުރުން ޤައުމުގެ ދާޚިލީ މަޞްލަޙަތަށް ކުރާނެ އަސަރުތަކާމެދު މިނިވަން ނަޒަރަކުން ދެކޭގޮތް ރައްޔިތުންނަށް ސާފުވެ ޙައްޤު ވާން ޖެހޭކަމަށާއި، އެހެނަކަމުން އީގަލް ހިލްސްގެ އެގްރިމަންޓް އާންމު ކޮށް މިހާރުން މިހާރަށް އޮޑިޓްކުރަންޖެހޭ ކަމަށް އިގުތިސާދީ އަދި މާލީ ތަޖުރިބާކާރު އިސްމާއީލު ޒަރިޔަންދު ގޮވާލައްވައިފިއެވެ.
ޒަރިޔަންދު އެކްސްގައި ކުރެއްވި ޕޯސްޓެއްގައި ވިދާޅުވީ ޤާނޫނުއަސާސީއާއި އޮޑިޓް ޤާނޫނުން އޮޑިޓަރ ޖެނެރަލަށް މަތިކޮށްފައިވާ ޒިންމާތަކުގެ ދަށުންނާއި، އޮޑިޓް ސްޓޭންޑަޑްސް މިންގަނޑުތަކަށް ރިޢާޔަތްކުރައްވައި، އޮޑިޓަރ ޖެނެރަލް މިހާރުން މިހާރަށް އީގަލް ހިލްސް އެއްބަސްވުން އޮޑިޓް ކުރައްވަން ޖެހޭ ކަމަށެވެ. އައި.އެސް.އެސް.އޭ.އައި 3000 (ޕަރފޯމަންސް އޮޑިޓް) އިން އޮޑިޓަރުންނަށް އިރުޝާދުދެނީ ނުރައްކާތަކާއި މައްސަލަތައް ދެނެގަތުމަށާއި، ފާހަގަކޮށްލެވޭ އަދި އޮޑިޓްކުރެވޭ ފަދަ މުހިންމު ކަންކަމަށް ސަމާލުކަން ދިނުން ކަމަށެވެ. އަދި އެކަށީގެންވާ ވަގުތަށް ރިޢާޔަތްކުރުމަށް ކަމަށް ވެސް ޒަރިޔަންދު ވިދާޅުވިއެވެ. އަދި މި ޙާލަތަށް މިއުޞޫލު ފައްތާއިރު ޚަރަދުކުރެވޭ ފައިސާއަށް އެކަށީގެންވާ އަގު ނުވަތަ ފައިދާ ލިބޭތޯއާއި، ނުރައްކާތައް ހިއްސާކުރެވޭ މިންވަރާއި، ޢާންމު މަޞްލަޙަތާއި، މާލީ ގޮތުން ދައުލަތަށް އޮތް ބުރައާއި، އަދި ރައްޔިތުންގެ ޙައްޤުތަކާއި މަޞްލަޙަތު ދައުލަތުން ފުރިހަމައަށް ޙިމާޔަތްކޮށްފައިވޭތޯ ބެލުން ކަމަށެވެ. އައި.އެސް.އެސް.އޭ.އައި 4000 (ކޮމްޕްލަޔަންސް އޮޑިޓް) އިން ބަލަނީ ސަރުކާރުގެ ޢަމަލުތަކާއި އެއްބަސްވުންތައް ޤާނޫނުއަސާސީއާއި، ޤާނޫނުތަކާއި، ގަވާއިދުތަކާއި، ބައިނަލްއަޤްވާމީ މުޢާހަދާތަކާއި، އަދި އެއްބަސްވެވިފައިވާ މާއްދާތަކާ އެއްގޮތްވޭތޯ ކަމަށެވެ.
އިންޓޮސައި ގައިޑް 5280 ގެ 56 ވަނަ މާއްދާގައި ފާހަގަކޮށްފައިވާ ގޮތުގައި، ބޮޑެތި ޢިމާރާތްކުރުމުގެ މަޝްރޫޢުތަކާއި، ޕަބްލިކް ޕްރައިވެޓް ޕާޓްނަރޝިޕްތަކާއި، އަދި ކޮންސެޝަން އެއްބަސްވުންތައް ހިމެނޭހެން، ދިގު މުއްދަތުގެ އޮޅުންބޮޅުން ބޮޑެތި މަޝްރޫޢުތައް އާންމުކޮށް އޮޑިޓްކުރަނީ ކުރީކޮޅުގަ ކަމަށާއި، މަޝްރޫޢު ފެށުމުގެ ކުރިން ނުވަތަ އެ މަސައްކަތް ހިނގަމުންދާ ދަނޑިވަޅުގަ ކަމަށެވެ. އަދިވެސް ވަގުތު އެބައޮތް ކަމަށާއި، އެއްބަސްވެވިފައިވަނީ ހަމައެކަނި ވިޔަފާރީގެ މައިގަނޑު އަސާސްތަކަށް ކަމަށްވެސް ޒަރިޔަންދު ވިދާޅުވިއެވެ. ތަފްޞީލީ މާއްދާތައް އަދިވެސް ދަނީ ޑްރާފްޓްކުރެވެމުން ކަމަށްވާތީ މިއީ ބައިނަލްއަޤްވާމީ އޮޑިޓް އިރުޝާދުގައި ބަޔާންކޮށްފައިވާ "މަޝްރޫޢުގެ ކުރީކޮޅުގެ މަރުޙަލާ" ކަމަށެވެ.