ރާއްޖެއަކީ ދުނިޔޭގެ ބޮޑެތި ގައުމުތަކާއި ދުރުގަ އޮތް ޖަޒީރާ ގައުމެކެވެ. ކުޑަ އަދި ވަސީލަތްތައް މަދު ގައުމެކެވެ. ދުނިޔޭގެ އެހީއާއި މަދަދަށް އަބަދުވެސް ބޭނުންވާ ގައުމެކެވެ. ކާބޯތަކެތި އުފެއްދުމުގެ ވަސީލަތެއް ނެތް ގައުމެކެވެ. ދުނިޔޭގެ ބޮޑެތި ގައުމެއްގެ ބަޔަކަށް ކިރިޔާވެސް ގުޑުމެއް އަރައިފިއްޔާ ރާއްޖެ އަށް އޭގެ އަސަރުނުކޮށް ނުދާނެ ގައުމެކެވެ. ކާބޯތަކެއްޗާއި ޒަރޫރީ ބޭނުމަށް ގައުމު ތަކުގެ އެހީއަށް އަބަދު އެދެންޖެހިފައިވާއިރު މިހާރު މެދުއިރުމަތީގައި ހިނގަމުންދާ ހަނގުރާމައިގައި ރާއްޖެ ބަނޑަށް ޖެހިދާނެ ކަމުގެ ބިރުވަނީ އުފެދިފައެވެ. ދާދި މިދާކަށްދުވަހު 2 ވަނަ ބޮޑު ހަނގުރާމައިގެ ދިލަހޫނާއި ވޭން ދިވެހިން ވަނީ ދެކެފައެވެ. އޭރު ކާނެ އެއްޗެއް ނެތި ދިވެހިން އުޅުނު ގޮތްވެސް އަދިވެސް އިއްޔެ މިއަދު ހިނގައިދިޔަ ކަމެއްހެން އޭރު އެ ދުވަސް ދުށް ދިވެހިންގެ ހިތުގައިވަނީ ބިންވަޅު ނެގިފައެވެ.
މަގޫފަތާއި ފަތްކެޔޮ ގަހުގެ ބުޑު ކެއި ޒަމާން ފަހަނައަޅާފައިވާއިރު މިއަދު ވެސް އެދުވަސް އިޔާދަވާން ދެން އޮތީ ކައިވަތެއްހާ ދުރުމިނެވެ. އީރާނާއި އިޒްރާއިލް އަދި އެމެރިކާ އިން ކުރަމުންދާ ހަނގުރާމައިގެ ސަބަބުން މި ހާލަތަށް ރާއްޖެ ނުގޮސްދާނެ ކަމަކަށް ބައެއް މީހުން ގަބޫލެއްނުކުރެވެއެވެ.
މިހާރު ކުރަމުންދާ ހަނގުރާމަ ފެށުނުތާވީ އަދި ހަފްތާއެކެވެ. ފެބްރުއަރީ މަހުގެ 28ވަނަ ދުވަހު މެދުއިރުމަތީގައި ފެށި މި ބޮޑު ހަނގުރާމައިގެ ސަބަބުން ތެލުގެ އަގުބޮޑުވެއްޖެއެވެ. އިޒްރާއިލް އެމެރިކާއާއި ގުޅިގެން އީރާނަށް ޙަމަލާ ދޭން ފެށުމާއެކު، ދުނިޔޭގެ އެކި ސަރަޙައްދުތަކަށް ތެޔޮ އުފުލުމަށް ބޭނުން ކުރާ މައި އެއް މަގު ކަމަށްވާ ހުރުމުޒް ކަނޑުއޮޅި ހުރަސް ކުރުމަށް ފުރުޞަތު މިވަނީ މިހާރު ބަންދުވެފައެވެ.
އޭގެ ސަބަބުން އެ ސަރަޙައްދުން ތެޔޮ ޓޭންކަރުތައް ދަތުރުކުރުން މި ވަނީ ހުއްޓުމަކަށް އައިސްފައެވެ. ތެޔޮ ޓޭންކަރުތަކާއި މުދާ އުފުލާ އާގު ބޯޓުތައް ހިމެނޭ ގޮތަށް ޢިރާޤާއި ސަޢުދީ ޢަރަބިއްޔާއާއި ޤަޠަރު ފަދަ ތެޔޮ އުފައްދާ ޤައުމުތަކުގެ ބޭރުގައި 200އަށް ވުރެ ގިނަ އުޅަނދު މި ވަގުތު ވެސް ނަގިލި އަޅާފައި އެބަތިބި ކަމަށް ރިޕޯޓްތައް ބުނެއެވެ.
އީރާނުން އިންޒާރު ދީފައި އޮއްވާ ހުރުމުޒް ކަނޑުއޮޅި ހުރަސްކުރަން މަސައްކަތް ކުރާ އާގު ބޯޓުތަކަށް އީރާނުގެ މިސައިލް ޙަމަލާތައް ދަނީ އަމާޒުވަމުންނެވެ. ޤަޠަރުގެ ތެޔޮ އުފައްދާ މަރުކަޒުތަކަށް އީރާނުގެ ޙަމަލާތައް އަމާޒުވަމުން ދާތީ އެ ޤައުމުން ވެސް ވަނީ އެ މަރުކަޒުތަކުގެ މަސައްކަތް ވަގުތީ ގޮތުން ހުއްޓާލާފައެވެ. ޢިރާޤުންވެސް ވަނީ އެ ޤައުމުގައި އުފައްދާ ތެޔޮ ބޭރު ކުރުމަށް ހުރަސް އެޅިފައިވާތީ ތެޔޮ އުފެއްދުން މަޑުޖައްސާލާފައެވެ. ސަޢުދީ ޢަރަބިއްޔާއާއި އެކުވެރި ޢަރަބި އިމާރާތާއި ކުވައިތުން ވެސް ދަނީ އެ ޤައުމުތަކުގައި އުފައްދާ ތެޔޮ، ޓޭންކަރު ތަކަށް ތެޔޮ ބަރާ ނުކުރެވޭތީ ގޮންޖެހުމާއި ކުރިމަތިލަމުންނެވެ.
ދުނިޔެއަށް މި އަންނަ ބަދަލުގެ އަސަރުތައް ރާއްޖެއާ ހަމައަށްވެސް ވަނީ ފޯރާފައެވެ. މުޅި ދުނިޔެއާއި ވަށައިގެންވާ ގައުމުތަކަށް ކުރާ އަސަރު ރާއްޖެ އަށް ވެސް ކުރާނެތާއެވެ. އެކަމަކު ސުވާލަކީ ރާއްޖެ އަކީ ވަކިން އޮތް ޖަޒީރާ ގައުމަކަށްވާއިރު، ތެޔޮ އަގުބޮޑުވެ ދަތުރުފަތުރު ހުއްޓުމަކަށް އައިސްފި ނަމަ ދެން ދިވެހިން ހަދާނީ ކިހިނެތްތޯއޭއެވެ؟
މިތާކު މިހާރު ކާށި ފަޅިއެއްވެސް ނެތެވެ. ބައެއް ރަށްރަށުގައި ރުކެއް ނެތްތަނުގައި ފަތްކެޔޮ އިންދާނެ ހުސްބިންކޮޅެއްވެސް ނެތެވެ. އަހަރެމެން ވިސްނާ ހޭއަރަން ވެއްޖެއެވެ. ދުނިޔޭގެ އޮއިވަރުގާއި އަހަރުމެން ތާށިވެ ފިތެނީ ކަމަށް ބުނެ އެ ދެކެވެނީ ޔޯލަ ވާހަކައެއް ނޫނެވެ. މިތާގަ ވެސް 500،000 އެއްހާ މީހުން އާބާދީގައި އެބަތިއްބެވެ. ދެވަނަ ބޮޑު ހަނގުރާމައިގެ ދަތި ދުވަސްވަރު ދިވެހީން އުފުލި ބަނޑުހައިހޫނާއި ވޭން މިއަދު އަހަރުމެން އުފުލަން ވެއްޖިއްޔާ ބަނޑަށް މަރުވާނެ ކަންޔަގީނެވެ. އޭރުކާބޯތަކެތޮ ލިބުނު ހާ ގަސްތަކެއް މިހާރަކު ރަށްރަށުގައި ނެތެވެ. އަހަރުމެންގެ ގައުމުގެ ފުޑް ސެކިއުރިޓީ އޮތީ ވަރަށްވެސް ދަށުގައިކަން ދަނަން ޖެހެއެވެ. އެއްވެސް ބައެއްގެ އެހީއަށް ނޭދި، ތަކެތި އިމްޕޯޓް ނުކޮށް ހަމައަށް ކާން ބޯން ލިބޭ ބައެއްނޫންކަން ވިސްނަން އެބަ ޖެހެއެވެ.
އެހެންވީމާ ކަމެއް ދަމެއް ބޮޑުވެ އިމްޕޯޓަށް ބުރުލެއް އަރައިފިނަމަ ދެން ހަދާނީ ކިހިނެއްތޯއެވެ؟ ދުނިޔެ ބޮޑު ހަނގުރާމައެއްގެ ހާލަތަށް ވެއްޓިއްޖެ ނަމަ ބަނޑަށް ޖެހި ހައިހޫނުކަމުގެ އަސަރު ކުރާނެ ފުރަތަމަ ގައުމަކަށް ރާއްޖެވާނެކަން ޔަގީނެވެ. އެހެންވީމާ އެކަން ދަނެގެން މިއަދުން ފެށިގެން ހީވާގި ކަމާއެކު ބިޔަ މޭވާ ގަސްތަކާއި ފަތްކޭލާއި ބަބުކެޔޮ ގޯތީގައި އިންދަމާ ހިނގާށެވެ. ކޮންމެހެން ކުރަން ނުޖެހޭ ބޭކާރު ޚަރަދުތައް އިހަށް މަޑުޖައްސާލައި އިގްތިސާދުކޮށް އަމިއްލައަށް ފުދޭ ބަޔަކަށް ވަމާ ހިނގާށެވެ.