ރިޕޯޓް: ރަށްފުށުން މާލެ ބަދަލުވަނީ ބަދަލުވާ ހިތުންތަ؟ ނޫނީ މަޖުބޫރުންތަ؟

ފަހަކަށް އައިސް ދިވެހިރާއްޖޭގައި އެންމެ ބޮޑު އެއް މައްސަލައަކަށް ވެފައިވަނީ ރަށްރަށުން މާލެއަށް ހިޖުރަކުރާ މީހުންގެ އަދަދު އަހަރަކަށްވުރެ އަހަރެއް އިތުރުވަމުން ދިއުމެވެ. މިކަމުގެ ސަބަބުން މާލޭގެ އާބާދީ ބޮޑުވެ، އެކި ބާވަތުގެ އިޖުތިމާޢީ މައްސަލަތައް ދަނީ ކުރިމަތިވަމުންނެވެ. އަދި މި މައްސަލައަށް ހައްލެއް ހޯދުމަކީ މިއަދު ވަރަށް މުހިންމު ކަމަކަށް ވަނީ ވެފައެވެ.

ރަށްރަށުން މާލެއަށް ހިޖުރަކުރާ ސަބަބުތައް

ގިނަ ބަޔަކު ރަށްރަށުން މާލެއަށް ހިޖުރަކުރަނީ ތަޢުލީމާއި ވަޒީފާގެ ފުރުސަތުތައް ހޯދުމަށެވެ. ރަށްރަށުގައި މަތީ ތަޢުލީމުގެ ފުރުސަތުތައް މަދުވުމާއި، ވަޒީފާގެ ފުރުސަތުތައް ހަނިވެފައި ވުމަކީ މިކަމަށް މެދުވެރިވާ މައިގަނޑު ސަބަބުތަކެވެ. މީގެ އިތުރުން، ޞިއްޙީ ޚިދުމަތްތަކާއި އެހެނިހެން އަސާސީ ޚިދުމަތްތައް އަތޮޅުތެރޭ ރަށްރަށުން ފުރިހަމައަށް ލިބެން ނެތުމަކީވެސް މީހުން މާލެއަށް ހިޖުރަކުރުމަށް މެދުވެރިވާ ސަބަބުތަކެވެ.

މާލޭގެ ތޮއްޖެހުމުގެ މައްސަލަ

މާލެއަށް ގިނަ އަދަދެއްގެ މީހުން ހިޖުރަކުރުމުގެ ސަބަބުން މާލޭގެ ބިމުގެ އަގު އުފުލި، ގޯތިގެދޮރާއި ބޯހިޔާވަހިކަމުގެ ދަތިކަން އިންތިހާއަށް ވަނީ ބޮޑުވެފައެވެ. މިކަމުގެ ސަބަބުން ގިނަ ޢާއިލާތަކެއް ކުދިކުދި ގޮޅިތަކެއްފަދަ ތަންތަނުގައި ދިރިއުޅެން ޖެހިފައިވުމުގެ ސަބަބުން ޞިއްޙީ، ނަފްސާނީ އަދި އިޖުތިމާޢީ އެތައް މައްސަލަތަކެއް ދަނީ ކުރިމަތިވަމުންނެވެ.

ރަށްފުށުގެ ހިތްގައިމުކަން

ރަށްފުށުގެ ހިތްގައިމު މާޙައުލަކީ އެތައް ބައެއްގެ ހިތުގައި ރީތި ހަނދާންތަކެއް އާކޮށްދޭ ތަނެކެވެ. ސާފު ވައި، ހިތްފަސޭހަ މާޙައުލު، އަދި ގުޅުންތެރި އިޖުތިމާޢީ ދިރިއުޅުމަކީ ރަށްފުށުގެ ޚާއްޞަ ސިފަތަކެވެ. ނަމަވެސް، ތަރައްޤީގެ ނަމުގައި ކޮންމެ އަހަރަކުވެސް ގިނަ ބަޔަކު އަންނަނީ މި ހިތްގައިމުކަން ދޫކޮށް މާލެއަށް ހިޖުރަކުރަމުންނެވެ.

މާލެ ހިތްފަސޭހަ ތަނަކަށް ހެދުމުގެ މުހިންމުކަން

މާލެ ހިތްފަސޭހަ ތަނަކަށް ހެދުމަށްޓަކައި ސަރުކާރުންނާއި އަމިއްލަ ފަރާތްތަކުން ގިނަގުނަ މަސައްކަތްތަކެއް ކުރަން ޖެހެއެވެ. މީގެ ތެރޭގައި މާލެ ސަރަހައްދުގައި ޕާކުތަކާއި މުނިފޫހިފިލުވުމުގެ ސަރަޙައްދުތައް އިތުރުކުރުމާއި، ދަތުރުފަތުރުގެ ނިޒާމު ހަރުދަނާކުރުން ހިމެނެއެވެ. އަދި މާލޭގެ މާޙައުލު ސާފުތާހިރުކޮށް ބެލެހެއްޓުމަކީވެސް މުހިންމު ކަމެކެވެ.

ހައްލު ހޯދުމުގެ މުހިންމުކަން

މި މައްސަލައަށް ދާއިމީ ހައްލެއް ހޯދުމަށްޓަކައި ސަރުކާރުން އަޅަންޖެހޭ އެންމެ މުހިންމު ފިޔަވަޅަކީ ރަށްރަށުގައި ތަރައްޤީގެ މަޝްރޫޢުތައް ހިންގުމެވެ. ރަށްރަށުގައި ތަޢުލީމީ އަދި ޞިއްޙީ ޚިދުމަތްތައް ފުޅާކޮށް، ވަޒީފާގެ ފުރުސަތުތައް އިތުރުކުރުމަކީ މުހިންމު ކަމެކެވެ. މީގެ އިތުރުން، ހުޅުމާލެ ފަދަ އައު އާބާދީތައް އަތޮޅުތެރޭގައިވެސް ތަރައްޤީކޮށް، ކުދި ރަށްރަށުން ބޮޑެތި ރަށްރަށަށް މީހުން ބަދަލުކޮށް އެއްފަސްކުރުންވެސް މުހިންމެވެ. ހަމައެއާއެކު ފުރަމާލޭގައި ތޮއްޖެހިފައި މިއޮތް އާބާދީ ފެތުރިގެން ދިއުމަށް ހުޅުމާލެ ފަދަ އިތުރު އޭރިއާތައް ތަރައްޤީކުރުމަކީވެސް ހަމަ ނުހަނު ބޭނުން ޖެހިފައި އޮތްކަމެކެވެ. މި ސަރުކާރުން ރަސްމާލެ ހިއްކަން ފަށާފައިވަނީ މިދެންނެވި މަޤްޞަދުގައެވެ. އެވަރުގެ މަޝްރޫޢުއެއް ހެޔޮ ގޮތުގައި ހިންގައި ނިންމާލައިފިނަމަ މާލެ ސަރަހައްދުގެ ބިމުގެ ދަތިކަމާއި ބޯހިޔާވަހި ކަމުގެ މައްސލައަށް ފުދޭވަރެއްގެ ހައްލެއް ލިބިގެން ދާނެކަމަށް ފެނެއެވެ. ނަމަވެސް ޤައުމުގެ އިގްތިޞާދީ ހާލަތު އޮތްގޮތުން މިވަގުތު އެ މަޝްރޫޢު ކުރިއަށްގެންދިޔުމަކީ ޤައުމަށް އެންމެ ފައިދާ ހުރި ގޮތްތޯ ވަނީ ސުވާލު އުފެދިފައެވެ.

ނިންމާލުމުގެ ގޮތުން ދަންނަވާނީ، ރަށްފުށުން މާލެއަށް ހިޖުރަކުރުމުގެ މައްސަލައަކީ ޤައުމީ ފެންވަރުގައި ސަމާލުކަން ދޭންޖެހޭ މުހިންމު މައްސަލައެކޭއެވެ. މިކަމަށް ހައްލެއް ހޯދުމަށް ސަރުކާރުންނާއި އަމިއްލަ ފަރާތްތަކުން އެކުގައި މަސައްކަތްކުރުމަކީ މުހިންމު ކަމެކެވެ. އަދި ރަށްރަށުގެ ތަރައްޤީއަށް އިސްކަންދީ، މާލެ ސަރަހައްދާއި އަތޮޅުތެރޭގައި ހަމަހަމަ ގޮތެއްގައި ޚިދުމަތްތައް ފޯރުކޮށްދިނުމަކީ މިކަމަށް ހޯދޭނެ އެންމެ ރަނގަޅު ހައްލުކަމަށް ދެކެމެވެ.