ތައިލެންޑުގެ އިމިގްރޭޝަން އާ ގަވާއިދުގެ ދަށުން، ވިސާއާ ނުލައި އެ ގައުމުގައި މަޑުކުރެވޭ މުއްދަތުތައް ކުރުކޮށްފި

ބޭރުގެ ފަރާތްތަކުން ވިސާގެ ބޭނުން ނަހަމަގޮތުގައި ހިފުމާއި، ގަވާއިދާ ހިލާފު ކަންކަން ހުއްޓުވުމަށް ތައިލެންޑުން އެކުލަވާލި އާ ސިޔާސަތުގެ ދަށުން، ދިވެހި ޕާސްޕޯޓް އޮންނަ ފަރާތްތަކަށް ވިސާއާ ނުލައި އެ ގައުމުގައި މަޑުކުރެވޭ މުއްދަތު 60 ދުވަހުން 15 ދުވަހަށް ކުރުކޮށްފިއެވެ.

ތައިލެންޑުގެ ކެބިނެޓުން މި ހަފުތާގައި ފާސްކުރި މި ނިންމުމަކީ 90 އަށްވުރެ ގިނަ ގައުމުގެ ދަތުރުވެރިންނަށް އަސަރުކުރާނެ ގޮތަށް، އެ ގައުމުގެ ވިސާ އެގްޒެމްޕްޝަން އަދި ވިސާ-އޮން-އެރައިވަލް ނިޒާމަށް ގެނައި ބޮޑު ބަދަލެކެވެ. މިއީ ކޮވިޑް-19 އަށްފަހު ފަތުރުވެރިކަން ކުރިއެރުވުމަށް ޖުލައި 2024 ގައި ތައާރަފުކުރި 60 ދުވަހުގެ ލުއި ސިޔާސަތު އުވާލައި ނިންމި ނިންމުމެކެވެ.

އާ އޮނިގަނޑުގެ ދަށުން، ދިވެހިންނަށް ދެން ތައިލެންޑަށް އެތެރެވާއިރު ވިސާއާ ނުލައި މަޑުކުރެވޭނީ އެންމެ 15 ދުވަހަށެވެ. މޮރިޝަސް އަދި ސީޝެލްސްގެ ރައްޔިތުންނަށް ވެސް ދެން އަމަލުކުރާނީ މި އުސޫލުންނެވެ.

ތައިލެންޑުގެ ކަމާބެހޭ ފަރާތްތަކުން ބުނާ ގޮތުގައި، މި ގަވާއިދު ހަރުކަށިކުރީ ގިނަ ދުވަހު މަޑުކުރެވޭ ވިސާގެ ބޭނުން ނަހަމަގޮތުގައި ހިފައިގެން ގަވާއިދާ ހިލާފަށް ވަޒީފާ އަދާކުރުމާއި، ސްކޭމްތަކާއި، ކުށްކުރުމުގެ އަމަލުތަކުގެ އިތުރުން ރަޖިސްޓްރީނުކޮށް ވިޔަފާރި ހިންގުން ފަދަ ކަންކަން ހުއްޓުވުމަށެވެ. އެ ގައުމުގެ ޓޫރިޒަމް އެންޑް ސްޕޯޓްސް މިނިސްޓަރު ސުރަސަކް ފަންޗަރޮއެންވޮރަކުލް ވިދާޅުވީ، މި ބަދަލާއެކު ތައިލެންޑުގެ ރައްކާތެރިކަމާއި ފަތުރުވެރިކަމުގެ ދާއިރާއަށް އޮންނަ އިތުބާރު ބޮޑުވާނެ ކަމަށެވެ.

ކުރިން އޮތް 60 ދުވަހުގެ ވިސާ އެގްޒެމްޕްޝަން ސްކީމްގައި 93 ގައުމަކާއި ސަރަހައްދެއް ހިމެނުނު ނަމަވެސް، ދެން އެ ގައުމުން އަމަލުކުރާނީ ގައުމުތަކުގެ ގިންތިތަކަކަށް ބަހާލައިގެން، އެކި ގައުމުތަކަށް އެކި މުއްދަތު ލިބޭ ގޮތަށެވެ.

ވިސާގެ އާ ގިންތިތައް

އާ ގަވާއިދުތައް ބުނާގޮތުން:

* އެމެރިކާ، އިނގިރޭސިވިލާތް، އޮސްޓްރޭލިއާ، ޖަޕާން އަދި ގަލްފުގެ ބައެއް ގައުމުތައް ހިމެނޭހެން 54 ގައުމެއްގެ ދަތުރުވެރިންނަށް 60 ދުވަހުގެ ބަދަލުގައި ދެން ލިބޭނީ 30 ދުވަހުގެ ވިސާ އެގްޒެމްޕްޝަނެކެވެ.

* ދިވެހިރާއްޖެ، ސީޝެލްސް އަދި މޮރިޝަސްގެ ރައްޔިތުންނަށް ލިބޭނީ 15 ދުވަހުގެ ވިސާ އެގްޒެމްޕްޝަނެކެވެ.

* ކެމްބޯޑިއާ އަދި މިޔަންމާ އިން ވައިގެ މަގުން އަންނަ ފަރާތްތަކަށް، ދެ ގައުމުގެ ދެމެދުގައި އޮންނަ އެއްބަސްވުންތަކުގެ ދަށުން 14 ދުވަހުގެ މުއްދަތެއް ލިބޭނެއެވެ.

* ވިސާ-އޮން-އެރައިވަލް ލިބޭނީ ހަމައެކަނި ހަތަރު ގައުމަކަށެވެ. އެއީ އިންޑިއާ، ބެލަރޫސް، ސާބިއާ އަދި އަޒަރުބައިޖާނެވެ.

މީގެ އިތުރުން، ތަކުރާރުކޮށް ވިސާއާ ނުލައި އެތެރެވާ ފަރާތްތަކަށް ވެސް ތައިލެންޑުން ފިޔަވަޅު އަޅާނެއެވެ. ޑްރާފްޓް ކުރެވިފައިވާ ގަވާއިދުތައް ބުނާގޮތުން، އެއް އަހަރެއްގެ ތެރޭގައި ތިންވަނަ ފަހަރަށް ވިސާއާ ނުލައި އެތެރެވާން އުޅޭ ބޭރު މީހުންނަށް، ހާއްސަ އެއްބަސްވުމެއް ނެތް ނަމަ، އެތެރެވުމުގެ ހުއްދަ ނުދީ ހިފެހެއްޓިދާނެއެވެ.

މުއްދަތު އިތުރުކުރުމުގެ ފުރުސަތު

ދިވެހިންނަށް ވިސާއާ ނުލައި މަޑުކުރެވޭ މުއްދަތު 15 ދުވަހަށް ކުރުކުރި ނަމަވެސް، ތައިލެންޑުގެ އިމިގްރޭޝަން އޮފީސްތަކަށް 1,900 ތައި ބާތު ދައްކައިގެން އެއް ފަހަރު އިތުރު 15 ދުވަހަށް މުއްދަތު އިތުރުކުރެވިދާނެއެވެ.

ތައިލެންޑުން ވަނީ ޑިޖިޓަލްކޮށް އެތެރެވުމުގެ އުސޫލުތައް ވެސް ހަރުކަށިކޮށްފައެވެ. ކުރިން ބޭނުންކުރި TM6 ކަރުދާސް ފޯމުގެ ބަދަލުގައި މިހާރު ބޭނުންކުރާ 'ތައިލެންޑް ޑިޖިޓަލް އެރައިވަލް ކާޑު' (TDAC) ފުރުމަކީ އެ ގައުމަށް އެތެރެވާ ހުރިހާ ބޭރު ދަތުރުވެރިންނަށް މަޖުބޫރު ކަމެކެވެ.

ދިވެހި ދަތުރުވެރިންނަށް ކުރާނެ އަސަރު

މި ބަދަލަކީ 2024 ވަނަ އަހަރު ދިވެހިންނަށް ދިން ލުއިތަކާ އަޅާބަލާއިރު ބޮޑު އުނިކަމެކެވެ. ކުރިން ދިވެހިންނަށް ވިސާއާ ނުލައި 60 ދުވަހު މަޑުކުރެވޭއިރު، އެ މުއްދަތު އިތުރުކުރުމުގެ ފުރުސަތު ވެސް އޮވެއެވެ. ތައިލެންޑަކީ ދިވެހިންގެ މެދުގައި، ހާއްސަކޮށް ބޭސްފަރުވާއަށާއި، ވިޔަފާރިކުރުމަށާއި، ފަތުރުވެރިކަމުގެ އިތުރުން ތައުލީމު ހާސިލުކުރުމަށް އެންމެ މަގުބޫލު އެއް މަންޒިލެވެ. ވިސާއާ ނުލައި މަޑުކުރެވޭ މުއްދަތު ކުރުކުރުމުގެ ސަބަބުން، ހާއްސަކޮށް ބޭސްފަރުވާއަށް ގިނަ ދުވަހު މަޑުކުރަންޖެހޭ ފަރާތްތަކަށާއި ދިގު ޗުއްޓީ ހޭދަކުރާ ފަރާތްތަކަށް އޭގެ އަސަރު ކުރާނެ ކަމަށް ބެލެވެއެވެ.

ތައިލެންޑުގެ އޮފިޝަލުން ވިދާޅުވާ ގޮތުގައި، މި އުސޫލަށް ގެނައި ބަދަލަކީ ފަތުރުވެރިކަމަށް ހުރަސްއެޅުމުގެ މަގްސަދުގައި ގެނައި ބަދަލެއް ނޫނެވެ. އޭގެ ބަދަލުގައި މިއީ އިމިގްރޭޝަން ބެލެހެއްޓުން ހަރުދަނާކުރުމަށާއި، ނިޒާމުގެ ނާޖާއިޒު ފައިދާ ނަގާ ފަރާތްތަކަށް އަމާޒުކޮށް ގެނައި ބަދަލެކެވެ.

މި އާ ގަވާއިދުތަކަށް އަމަލުކުރަން ފަށާނީ ތައިލެންޑުގެ ރޯޔަލް ގެޒެޓުގައި ރަސްމީކޮށް ޝާއިއުކުރުމަށްފަހުގައެވެ.