ގައުމީ މަސްލަހަތު އިސްކޮށްގެން ޒިންމާދާރުކަމާއެކު ހަބަރާއި މައުލޫމާތު ފެތުރުމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) ބްރޯޑްކާސްޓަރުންނަށް އިލްތިމާސްކޮށްފިއެވެ.
ކޮމިޝަނުން މިކަމަށް އިލްތިމާސްކުރެއްވީ ގައުމީ ބްރޯޑްކާސްޓިންގ ދުވަހުގެ މުނާސަބަތުގައި ނެރުއްވި ބަޔާނެއްގައެވެ.
އެމްއެމްބީސީން ވަނީ ބްރޯޑްކާސްޓިންގ ދާއިރާގައި މަސައްކަތްކުރައްވާ ހުރިހާ މުވައްޒަފުންނަށާއި ހިދުމަތްތެރިންނަށް ދުވަހުގެ ހެޔޮއެދުމާއި ތަހުނިޔާ ފޮނުވާފައެވެ. އަދި ބްރޯޑްކާސްޓިންގ ދާއިރާ އިތުރަށް ހަރުދަނާކޮށް، ދާއިރާގައި މަސައްކަތްކުރާ ފަރާތްތަކުގެ ހައްގުތައް ރައްކާތެރިކޮށްދިނުމުގައި ދެމިތިބޭނެ ކަމުގެ ޔަގީންކަން ވެސް ދެއްވާފައެވެ.
ޓެކްނޮލޮޖީއަށް އަންނަމުންދާ ކުރިއެރުންތަކާއެކު ރައްޔިތުންނަށް ފެންވަރު ރަނގަޅު ހިދުމަތްތަކެއް ފޯރުކޮށްދިނުމަށް ކޮމިޝަނުން އަބަދުވެސް މަސައްކަތް ކުރާނެ ކަމަށް ބަޔާނުގައި ފާހަގަކޮށްފައިވެއެވެ. މީގެ އިތުރުން މަސައްކަތްތެރިންގެ ފަންނީ ގާބިލުކަން އިތުރުކޮށް، ގާނޫނީ އިމުގެ ތެރެއިން މިނިވަން އަދި ޒިންމާދާރު މީޑިއާ ވެއްޓެއް ގާއިމުކުރުމަކީ ކޮމިޝަނުގެ މައިގަނޑު އަމާޒެއް ކަމަށް ވިދާޅުވިއެވެ.
މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ގާނޫނުގެ ދަށުން މި ކޮމިޝަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވީ މިދިޔަ އަހަރުގެ ސެޕްޓެމްބަރު މަހުގެ 18 ވަނަ ދުވަހުއެވެ.
އައު ގާނޫނުގައި ބަޔާންކޮށްފައިވާ ގޮތުން، ކަނޑައެޅިފައިވާ ސުލޫކީ މިންގަނޑުތަކާ ހިލާފުވާ މީޑިއާތަކާއި ނޫސްވެރިންނާ މެދު ޝަކުވާ ހުށަހެޅޭނެ ނިޒާމެއް ގާއިމުކޮށް، އެފަދަ މައްސަލަތައް ބަލައި އަޅަންޖެހޭ ފިޔަވަޅުތައް އެޅުމަކީ އެމްއެމްބީސީގެ ގާނޫނީ ޒިންމާއެކެވެ.