މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތިންވަނަ ރިސާޗް ކޮންފަރެންސް އަންނަ ޑިސެމްބަރު މަހުގެ ފަސްވަނަ ދުވަހުން ހަތް ވަނަ ދުވަހަށް ކުރިއަށްގެންދިއުމަށް ނިންމާފައިވާ ކަމަށް އެ އޮތޯރިޓީއިން ބުނެފިއެވެ.
މި އަހަރު މި ކޮންފަރެންސް ޚާއްސަކުރަނީ ދުނިޔެއަށް އަންނަ ބަދަލުތަކުގެ ތެރޭގައި އިގްތިސާދީ އަދި މާލީ ހަމަޖެހުން ދެމެހެއްޓުމަށް ކަމަށް އެ އޮތޯރިޓީއިން ހާމަކުރެއެވެ.
މިއަހަރުގެ ތީމަކީ ދުނިޔޭގެ މަޝްރަހަށް އަންނަ ބަދަލުތަކާއި ނުތަނަވަސްކަމުގެ ތެރޭގައި ދެމެހެއްޓެނިވި ތަރައްގީއަށް އިގްތިސާދީ އަދި މާލީ ހަމަޖެހުން ގެނައުމެވެ.
އެގޮތުން ދިރާސާކުރާ ފަރާތްތަކާއި އިލްމީ މާހިރުންނާއި ސިޔާސަތު ކަނޑައަޅާ ފަރާތްތައް އެއްތަނަކުން ބައްދަލުވާ މި ޚާއްސަ ކޮންފަރެންސްގައި ދުނިޔޭގެ މަޝްރަހަށް އަންނަމުންދާ ބޮޑެތި ބަދަލުތަކުގެ ތެރޭގައި ރާއްޖެއިން އިގްތިސާދީ އަދި މާލީ ހަމަޖެހުން ދަމަހައްޓާނެގޮތުގެ މަޝްވަރާތައް ކުރާނެ ކަމަށް އެ އޮތޯރިޓީއިން ވަނީ ބުނެފައެވެ.
ތިން ދުވަހުގެ މުއްދަތަށް ކުރިއަށް ގެންދާ މި ކޮންފަރެންސްގެ ފުރަތަމަ ދުވަހު އޮންނާނީ ދިރާސާ ކަރުދާސްތައް ހުށަހެޅުމެވެ. މި ބައި ކުރިއަށް ގެންދިއުމަށް ހަމަޖެހިފައިވަނީ އެމްއެމްއޭގައެވެ. އަދި ކޮންފަރެންސްގެ އެޖެންޑާގައި ހިމެނޭ މައިގަނޑު ހަރަކާތްތައް ކުރިއަށްދާނީ ދުސިތުޑީ2 ފޭދޫ މޯލްޑިވްސްގައެވެ.
އެމްއެމްއޭއިން ވަނީ މި އަހަރުގެ ރިސާޗް ކޮންފަރެންސްގައި މަނިޓަރީ ސިޔާސަތާއި ބާޒާރުގެ އަގުތައް އެއްވަރެއްގައި ހިފެހެއްޓުމާއި މާލީ ހަމަޖެހުމާއި އިސްލާމީ މާލީ ނިޒާމާއި ޑިޖިޓަލް ފައިނޭންސާއި އިގްތިސާދު ސިންދަފާތުކުރުމާއި މޫސުމީ ރިސްކުތަކުގެ ތެރޭގައި ދެމެހެއްޓެނިވި ތަރައްގީ ފަދަ އެތައް މައުލޫތަކަށް ވާހަކަތައް އަމާޒުވެގެންދާނެ ކަމަށް ބުނެފައެވެ.
އެމްއެމްއޭއިން އެންމެ ފުރަތަމަ ރިސާޗް ކޮންފަރެންސެއް ބޭއްވީ 2024 ވަނަ އަހަރުއެވެ. މިއީ ޖެހިޖެހިގެން މި ކޮންފަރެންސް ކުރިއަށް ގެންދާ ތިންވަނަ އަހަރެވެ.

.jpg&w=3840&q=75)