ކުޑަކުދިންނަށް ކުރާ އެކި ބާވަތުގެ އަނިޔާތައް ހުއްޓުވުމަށާއި، ކުޑަކުދިންގެ ހައްގުތައް ރައްކާތެރިކުރުމުގެ ނިޒާމު ހަރުދަނާކޮށް، އަނިޔާގެ މައްސަލަތަކަށް އަވަސް އިޖާބައެއް ދިނުމަށް ބައިނަލްއަގްވާމީ އަދި ގައުމީ ފެންވަރުގައި ކުރެވޭ މަސައްކަތްތައް ފުޅާކުރުމުގެ މަގުސަދުގައި އެކުލަވައިލާފައިވާ "ބޮގޯޓާ ކޯލް ޓު އެކްޝަން" ގަރާރުގައި ރާއްޖެ އިން ސޮއިކޮށްފި އެވެ.
ރާއްޖޭގެ ފަރާތުން "ބޮގޯޓާ ކޯލް ޓު އެކްޝަން" ގައި ސޮއި ކުރައްވާފައިވަނީ ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީއެވެ.
"ބޮގޯޓާ ކޯލް ޓު އެކްޝަން" އަކީ 2024 ގެ ނޮވެންބަރު މަހު ކޮލަމްބިއާގެ ބޮގޯޓާގައި ބޭއްވުނު، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގްވާމީ މަހާސިންތާގައި ބައިވެރިވި ގައުމުތަކުން އިސްނަގައިގެން ފާސްކުރި މުހިންމު ގަރާރެކެވެ.
ވަޒީރު ގީލާ ވިދާޅުީ ކުުޑަކުދިން ރައްކާތެރިކުރުމުގެ ނިޒާމު ހަރުދަނާކުރުމަށާއި އަދި އެކުދިންނަށް ފާގަތި މުސްތަގްބަލެއް ހޯދައިދިނުމަށް މި ސަރުކާރުން އަހަންމިއްޔަތުކަމެއް ދެއްވާ ކަމަށެވެ. އެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ޝުކުރު އަދާކުރާ ކަމަށް ވެސް ވިދާޅުވިއެވެ. ކުޑަކުދިންގެ ހައްގުތަކާއި، ރައްކާތެރިކަމާއި އަދި ލާބައަށްޓަކައި ކުރެވޭ މަސައްކަތްތަކުގައި ޔުނިސެފާއި އެހެނިހެން ބައިވެރިން ދެއްވާ އެއްބާރުލުން ފާހަގަކޮށް އެ ހުރިހާ ފަރާތްތަކަށް ވެސް ޝުކުރު އަދާކުރާ ކަމަށް ގީލާ ވިދާޅުވިއެވެ.
މި ގަރާރުގެ ދަށުން ކުޑަކުދިންގެ ދިރިއުޅުމަށް ދެމެހެއްޓެނިވި ހެޔޮ ބަދަލުތަކެއް ގެނެވި ބައިނަލްއަގްވާމީ ފަރާތްތަކާ ގުޅިގެން އަމަލީ ގޮތުން މަސައްކަތް ކުރުމުގައި ރާއްޖެ އަބަދުވެސް ދެމިއޮންނާނެކަމުގެ ޔަގީންކަން ވަޒީރު ވަނީ ދެއްވާފައެވެ.