ވެލާނާ އިންޓަރނޭޝަނަލް އެއަރޕޯޓަށް ޖެއްސީ އެމެރިކާގެ ހަނގުރާމަމަތީ އުޅަނދެއް ނޫކަމަށާއި، އެއީ ސިވިލިއަން އުޅަނދެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ސޯޝަލް މީޑިއާގައި ބައެއް ފަރާތްތަކުން އަންނަނީ ވީއައިއޭ އަށް ޖައްސާފައިވާ މަތިންދާ ބޯޓު ކަމަށް ބުނާ ބޯޓުގެ ފޮޓޯވެސް ދައުރު ކުރަމުންނެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން ރައީސް މުއިއްޒު ވިދާޅުވީ އެ ވާހަކަތައް ދެކެވެން ފެށުމުން އެކަމުގެ ހަގީގަތް އެމަނިކުފާނު ވެސް ބައްލަވާފައިވާ ކަމަށެވެ.
ރައީސް ވިިދާޅުވީ އެކަމާއި ގުޅޭ މައުލޫމާތު ވަގުތުން ހޯދާފައިވާނެ ކަމަށާއި އެއީ އެމެރިކާގެ ސިވިލިއަން ބޯޓެއް ކަމަށެވެ.
އެ ބޯޓު ވީއައިއޭގައި ޖެއްސުމުގެ ހުއްދަ މިދިޔަ ޖެނުއަރީ 17 ވަނަ ދުވަހު ނަގާފައިވާ ކަމަށާއި އެބޯޓު އެރޭ ފުރައިގެން ދިޔައީ ސީޝެލްގައި ޖައްސާފައި ތައިލެންޑަށް ކަމަށް ރައީސް ވަނީ ވިދާޅުވެފައެވެ. އަދި އެ ބޯޓަކީ ހަނގުރާމައިގައި އުޅޭ ބޯޓެއް ނޫން ކަމަށް އެމަނިކުފާނު ވިދާޅުވިއެވެ.
މެދުއިރުމަތީގައި ހިނގަމުންދާ ހަނގުރާމައިގައި އެންމެ އިސްކޮށް އެމެރިކާ ހަރަކާތްތެރިވާއިރު، އެމެރިކާގެ ބޯޓެއް ރާއްޖޭގެ މައި އެއާޕޯޓަށް ޖައްސާފައިވާތީ އެކަމާ ބައެއް ފަރާތްތަކުން ފާޑުކިޔަމުންދާއިރު، ރައީސް ވިދާޅުވިގޮތުގައި އެ ބޯޓަކީ އޮންނަ ގަވައިދާ އެއްގޮތަށް ހުއްދަވެސް ނަގައިގެން އެއާޕޯޓުގައި ޖެއްސި ފްލައިޓެކެވެ. އެ ފްލައިޓް އެއާޕޯޓުގައި ޖެއްސުމަކުން ރާއްޖެއަށް އެއްވެސް ގެއްލުމެއް ނެތް ކަމަށް ރައީސް ވިދާޅުވިއެވެ.