ރަމަޟާން މަހު ފަހުދިހައިގެ ދުވަސްތަކުގައި ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ޚިދުމަތް 4 ދުވަހެއްގައި ދޭނެ ކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް) އިން ބުނެފިއެވެ.
ޑީއެންއާރުން ކުރި އިއުލާނުގައި ވަނީ ރަމަޟާން މަހުގެ ފަހު ދިހައެއްގައި، ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ޚިދުމަތް ދިނުމަށް ވަކި ގަޑިތަކަކާއި ދުވަސްތަކެއް ހަމަޖައްސާފައިވާ ކަމަށެވެ. ޑީއެންއާރް އިން ބުނީ މި ހިދުމަތް ދޭ ދުވަސްތަކަކީ، މާރިޗު މަހުގެ 11، 15، 17 އަދި 19 ވަނަ ދުވަހެވެ.
ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ހިދުމަތް 4 ދުވަހު ދޭން ހަމަޖެހިފައިވަނީ، ހެނދުނު 09:00 އިން މެންދުރުފަހު 13:00 އަށް ކަމަށް ޑީއެންއާރުން ބުނެއެވެ.
މީގެ އިތުރުން، މި ޚިދުމަތް ދިނުމަށް ވަކި އޮފީސްތަކެއް ހަމަޖެހިފައިވާ ކަމަށްވެސް އެ އިދާރާއިން ބުނެއެވެ.
އެގޮތުން މާލޭ ސަރަހައްދުން މި ހިދުމަތް ލިބޭނީ، ޑީއެންއާރު ހެޑް އޮފީހުން އަދި ހުޅުމާލެ ފިޔަވަހި 1ގައި ހުންނަ އުމަރު ޒާހިރު ބިލްޑިންގ އިން ހިދުމަތް ލިބޭނެ ކަމަށާއި، ހުޅުމާލެ ދެ ވަނަ ފިޔަވަހީގައި އުޅޭ މީހުންނަށް ވިނަރެސް ޓަވަރ 2 އިން މި ހިދުމަތް ލިބޭނެ ކަމަށް ޑީއެންއާރުން ބުނެއެވެ. ހަމައެއާއެކު، ވިލިމާލޭގައި ހުންނަ ޑީއެންއާރު ވިލިމާލެ އޮފީހުންވެސް މި ދުވަސްތަކުގައި ހިދުމަތް ލިބޭނެ ކަމަށްވެސް އެ އިދާރާއިން ބުނެއެވެ.
މީގެއިތުރުން އިމަރޖެންސީ ހާލަތްތަކުގައި ޑީއެންއާރ ޑީޕާޓްމަންޓުގެ ނަންބަރު، 7280368 އަށް ގުޅުމުން ޚިދުމަތް ލިބޭނެ ކަމަށްވެސް އެ ޑީއެންއާރުން ވަނީ ބުނެފައެވެ.