މާލޭ ރަށްވެހިންގެ ބޯހިޔާވަހިކަން ކަށަވަރުކޮށްދިނުމަށް މިސަރުކާރުން ދޫކުރި ވިނަރެސް ފްލެޓްތަކުގެ ކުއްޔާއި ޑައުންޕޭމަންޓް ކުޑަކޮށްދެއްވާނެ ކަމަށް މާލެ ސިޓީގެ މޭޔަރު އަދި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕޭން ޖަލްސާއެއްގައި ވާހަކަ ދައްކަވަމުން ޑރ މުއިއްޒު ވިދާޅުވީ މިސަރުކާރުން ވިނަރެސް ފްލެޓްގެ ޑައުން ޕޭމަންޓަށް ބޮޑު އަގު ނަގާފައިވާ ކަމަށެވެ.
ނަމަވެސް އެފްލެޓްތައް އެއަށް ވުރެ ކުޑަ އަގުގައި އާއްމު ރައްޔިތުންނަށް ކުއްޔަށް ދެވޭނެ ކަމަށެވެ.
އަޅުގަނޑު ދެންނެވިން ރައީސް ޔާމީންގެ ވެރިކަމުގައި ހުރިހާ ހިސާބުތަކެއް ޖަހާފައޭ މަހަކު ވިނަރެސް ފްލެޓަށް ދައްކާނެ އަގުވެސް ކަނޑައެޅީ. އެހެންނަމަވެސް މިސަރުކާރުން އައިސް އަގު ބޮޑުކުރީ ހިޔާ މަޝްރޫއުގެ ފްލެޓްތައްވެސް. ދެންމިފެންނަނީ ހަމަ އެސަރުކާރުގައި އަޅަން ފެށި ފްލެޓްތަކެއް، ނަން ބަދަލުކޮށްލައިގެން ވިނަރެސް ކަންނޭންގެ ކިޔަނީ. އެއީ ކަންދިމާކުރިގޮތުން އަޅުގަނޑު އޭރުހުރީ މިނިސްޓްރީގެ މަގާމްގެ ހައިސިއްޔަތުން، އެއެގްރީމެންޓްގައި ފުރަތަމަ ސޮއި ކުރީވެސް އަޅުގަނޑު. އަޅުގަނޑުގެ ސޮއި އޮންނާނީ އެގްރިމެންޓްގައި. އެހެންވީމަ އަޅުގަނޑަށް އެނގޭނެ ނޫންތޯ ނަން ބަދަލުވެފަކަން މިއޮތީ! އޭރުގައި ދެން ކުންފުނި ބަދަލުވެ ފަހުން އެޗްޑިސީ އަށް އެގްރީމެންޓް ބަދަލުވެގެން އައިސް އޮތް އޮތުން އޮންނާނެ އޭގައި. އެހެންވިޔަސް އެސަރުކާރުން އެކަންކުރީ. މުއިއްޒު ވިދާޅުވިއެވެ.
ވިނަރެސް ފްލެޓްގެ މަޝްރޫއަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ސޮއިކުރެވުނު އެގްރީމެންޓެއްގެ ދަށުން އެޅި ފްލެޓްތަކެއް ކަން ޑރ މުއިއްޒުގެ ވާހަކަފުޅުގައި ފާހަގަކުރެެއްވިއެވެ.
އެ ފްލެޓްތަކުގެ އަގުތައް އަޅުގަނޑަށްވުރެ ބޮޑަށް އެނގޭނެ ނޫންތޯ މިސަރުކާރުގައި އުޅޭ ބޭފުޅުންނަށްވެސް. ގައިމުވެސް އެއް އަގެއް އޮންނާނީ. ރައީސް އޮފީހުގައި ހުރިހާ އަގުތަކެއް ހުންނާނީ. ފައިނޭންސް ކޯސްޓް، ކޮންސްޓްރަކްޝަން ކޯސްޓް. ލޭންޑް ކޯސްޓް. ހުރިހާ އަގުތަކެއް ހުންނާނެ. މުއިއްޒު ވިދާޅުވިއެވެ.
މިސަރުކާރުގެ ވިނަރެސް ފްލެޓްތައް އިންތިހާއަށް ބޮޑު ޑައުންޕޭމަންޓެއް ދައްކަންޖެހޭ ކަމަށް ޑރ މުއިއްޒު ވިދާޅުވިއެވެ. އެގޮތުން ވިނަރެސް ފްލެޓްގެ ޑައުންޕޭމަންޓްގެ ގޮތުގައި ދެލައްކަ އަށް ވުރެ ގިނަ ފައިސާ ދައްކަން ޖެހުނު ކަމަށް ޑރ މުއިއްޒުގެ ވާހަކައިގައި ފާހަގަކުރެއްވިއެވެ.
ވިނަރެސް ފްލެޓްތަކުގެ މަހުކުލީގެ ގޮތުގައި ހައިއެންޑް ފްލެޓްތަކަށް ދައްކަންޖެހޭ ވަރުގެ ބޮޑު އަދަދެއް ދައްކަންޖެހޭ ކަމަށް ވެސް ޑރ މުއިއްޒު ވިދާޅުވިއެވެ.
ޕީޕީއެމްގެ ސަރުކާރުން ވިނަރެސް ފްލެޓަށް ކަނޑައެޅި އަގަކީ މިސަރުކާރުން ކަނޑައަޅާފައިވާ ބޮޑު އަގު ނޫންކަން ފާހަގަކޮށް ޑރ މުއިއްޒު ވިދާޅުވީ ވިނަރެސް ފްލެޓްގެ ޑައުންޕޭމަންޓަށް ދައްކަން އޮތް ބޮޑު އަގާއި މަހުން މަަހަށް ދައްކަންޖެހޭ އަގު ކުޑަކޮށްދީ އެއަގުތައް ރައްޔިތުންގެ އަތްފޯރާ ފަށަށް ގެނެސްދެއްވާނެ ކަމަށެވެ.
ވިނަރެސް ފްލެޓްގެ އަގު ކުޑަކޮށްދެވެން އޮތުމުން އެކަން ކުރާނެ ކަމަށް ވިދާޅުވެ ޑރ މުއިއްޒު ވިދާޅުވީ ވިނަރެސް ޕްރޮޖެކްޓަށް ނެގި ލޯން ނެގީ ކޮންތާކުން ކަމާއި އެ ޕްރޮޖެކްޓުގެ ހުރިހާ ތަފްސީލެއް އެނގި ވަޑައިގަންނަވާ ކަމަށެވެ.
އެ ޕްރޮޖެކްޓަށް ނެގިލޯން. ޗައިނާގެ ޑިވޮލަޕްމަންޓް ބޭންކުން ނެގި ލޯނެއް. ހުރިހާ ތަފްސީލެއް އަޅުގަނޑަށް އެނގޭތީ މި ދަންނަވަނީ. ކުރުކޮށްލަންވެގެން އެ ޕްރޮޖެކްޓަށް ބަރާބަރަށް ޕްރޮޖެކްޓްގެ ފައިދާ ޕްރޮޖެކްޓުން އަރބަންކޯ އަށް ފައިދާވެ ފުރިހަމަ ފައިދާއެއް ލިބޭނެ އަގުތައް ކުޑަކުރީމަ. އެހެންވީމަ ޑައުންޕޭމަންޓް ކުޑަކޮށްދީ މަހުންމަހަށް ދައްކަންޖެހޭ ވަރު ކުޑަކޮށްދޭނަން އިރާދަކުރެއްވިއްޔާ. މުއިއްޒު ވިދާޅުވިއެވެ.
މީގެ އިތުރުން ސަރުކާރު ހިއްސާވާ ކުންފުނިތަކުން އަޅާފައިވާ ފްލެޓްތައް އަޅާފައިހުރި އަގުތައް ވެސް އެމަނިކުފާނަށް އެނގިވަޑައިގަންނަވާ ކަމަށް ޑރ މުއިއްޒު ވިދާޅުވިއެވެ.
އެސްއޯއީ ނުވަތަ ސަރުކާރު ހިއްސާވާ ކުންފުނިތަކުން ހުޅުމާލޭގައި އަޅާފައިވާ ފްލެޓްތަކުން ބޮޑު އަގު ނަގަމުންދާކަން ފާހަގަކޮށް ޑރ މުއިއްޒު ވިދާޅުވީ އެފްލެޓް ތަކުން ބޮޑުކުލި ނަގަން ކުރީގެ ރައީސް ޔާމީން ނިންމާފައިނުވާ ކަމަށެވެ.
ސޯޝަލް ހައުސިންގ އެހެންނަމަވެސް މެދު ފަންތީގެ ފްލެޓްތަކެއް މިއީ. މެދުފަންތީގެ ފިނިޝިންގ އެއް ހުންނާނީ ސޯޝަލް ކެޓެގަރީގަ ކުރިއަށްގެންދަން ނިންމާފައޮތް މަޝްރޫއެއް ކުންފުނި ތަކުގެ ފްލެޓް ތަކުގެ މަޝްރޫއަކީ. އެހެންވީމަ އެކުންފުނިތަކުން ނެގި ލޯނު އަނބުރާ ދެއްކުމަށްޓަކައި ހޯދަންޖެހޭ ހުރިހާ ކޯސްޓެއް ރިކަވަރ ކުރުމަށް ޕްރޮފިޓެއް ލާފަ މިހާރު އެނަގަމުންދާ އަގު ތަކަށްވުރެ ކުޑަކުރެވޭނެ. މުއިއްޒު ވިދާޅުވިއެވެ.
ކުރީ ސަރުކާރުތަކުން ހުޅުމާލޭގެ ދެވަނަ ފިޔަވަހީގައި އަޅާފައިވާ ފްލެޓްތަކުގެ ކުއްޔާއި އެހެނިހެން އަގުތައް ކުޑަކޮށްދެއްވާނެ ކަމަށްވެސް ޑރ މުއިއްޒު ވިދާޅުވިއެވެ.
ޑރ މުއިއްޒު އިތުރަށް ވިދާޅުވީ ބޮޑު އަގުގައި ހައިއެންޑް ފްލެޓް އަޅާނެ ކަމަށާއި، އަދި އެތަންތަން އެފޯޑު ކުރެވޭ މީހުން އެތަންތަން ނަގާނެ ކަމަށެވެ. ނަަމަވެސް ސޯސަލް ހައުސިންގ އަށް ކަނޑައަޅާފައި ހުރި ފްލެޓްތަކަކީ ރައްޔިތުންގެ އަތުގައި އޮތް މަދު ފައިސާކޮޅު އަތުލުމަށް ޖަހާ ދަންތުރައަކަށް ވެގެން ނުވާނެ ކަމަށް ވެސް ޑރ. މުއިއްޒު ވަނީ ފާހަގަ ކުރަށްވާފައެވެ.
އަދި އެފަދަ އަނިޔާވެރި ގޮތަކަށް ކަންކުރާ ސަރުކާރަކަށް ޕީއެންސީގެ ސަރުކާރު ނުވާނެ ކަމަށް ޑރ މުއިއްޒު ވިދާޅުވިއެވެ.
އެހެންވީމަ، އެހެންވީމަ، މުޅި ރާއްޖެއަށް ގެދޮރުގެ ޔަގީންކަން ހައުސިންގ ގެރެންޓީކޮށްދިނުމަކީ އިރާދަކުރެއްވިއްޔާ އަޅުގަނޑުމެންނަށް ފުއްދަދޭނެ ވައުދެއް. މުއިއްޒު ވިދާޅުވިއެވެ.
މާލެ ސަރަހައްދާއި ރާއްޖޭގެ އުތުރާއި ދެކުނާއި މެދުރާއްޖެތެރެ ހިމެނޭހެން މުޅި ރާއްޖޭގެ ރައްޔިތުންގެ ބޯހިޔާވަހިކަމަށް ރޯހައުސް އާއި ފްލެޓްއަޅައި ބޯހިޔާވަހިކަމުގެ ގެރެންޓީ ރައްޔިތުންނަށް ދޭނެ ކަމަށްވެސް ޑރ މުއިއްޒު ވަނީ ވިދާޅުވެފައެވެ.