މޯލްޑިވިއަންއިން ދަތުރުކުރާ ފަސިންޖަރުންނަށް، އިންޑިއާގެ ތުރިވަނަންތަޕޫރަމްގައި ހުންނަ އަނަންތަޕޫރީ ހޮސްޕިޓަލް އެންޑް ރިސާޗް އިންސްޓިޓިއުޓުން ޑިސްކައުންޓް ލިބޭނެ ގޮތަށް އެއްބަސްވުމެއްގައި ސޮއިކޮށްފިއެވެ.
މި އެމްއޯޔޫގައި މިހާރު ސޮއި ކޮށްފައިވާއިރު، މޯލްޑިވިއަނުން ވަނީ މިމަކާމާއި، ގުޅޭ ގޮތުން ބަޔާނެއްވެސް ނެރެފައެވެ. އެ ބަޔާނެއްގައި ވަނީ އެ އެމްއޯޔޫގެ ދަށުން، އަނަންތަޕޫރީ ހޮސްޕިޓަލަށް ފަރުވާއަށްދާ އައުޓްޕޭޝަންޓުންނާއި އިންޕޭޝަންޓުންނަށްވެސް ޑިސްކައުންޓުތަކެއް ލިބޭނެ ކަމަށާއި، ހެލްތު ޗެކްއަޕް ޕެކޭޖުތަކުން 15 ޕަސެންޓްގެ ޑިސްކައުންޓެއް ލިބޭނެ ކަމަށާއި އައުޓްޕޭޝަންޓް ލެބޯޓްރީ އާއި ރޭޑިއޮލޮޖީ ހިދުމަތުން 10 ޕަސެންޓްގެ ޑިސްކައުންޓް ލިބޭނެ ކަމަށްވެސް ބުނެފައެވެ.
އަދި ހަމައެއާއެކު، ޓްރިވަންޑްރަމް އިންޓަނޭޝަނަލް އެއާޕޯޓުން ހޮސްޕިޓަލަށް އެމްބިއުލާންސްގައި ހިލޭ ދަތުރުކޮށްދޭނެ ކަމަށްވެސް މޯލްޑިވިއަނުން ބުނެފައި ވެއެވެ.
އޭގެ އިތުރުން، ސިއްހީ ފަރުވާއަށްދާ މީހުންނަށް އިތުރު އެހީތެރިކަން ފޯރުކޮށްދިނުމުގެ ގޮތުން، ހޮސްޕިޓަލުގައި ކަސްޓަމާ ކެއާ ޑެސްކެއް ގާއިމުކޮށް އެޕޮއިންޓްމަންޓް ހެއްދުމާއި މެޑިކަލް ކޯޑިނޭޝަނާއި ޕޭޝަންޓް ސަޕޯޓާއި، ސްޕެޝަލް އެސިސްޓެންސް ސާވިސްގެ ތެރޭގައި، ހާލުބޮޑު ބަލި މީހުންނާއި ދުވަސްވީ މީހުންނަށް ބަސް ތަރުޖަމާކޮށްދިނުމުގެ ހިދުމަތް ވެސް ވެސް ދެވޭނެ ކަމަށް ބުނެފައި ވެއެވެ.
އަދި މޯލްޑިވިއަންގެ ފްލައިޓްތަކުން ޓްރިވަންޑްރަމަށް ދަތުރުކުރާ ހުރިހާ ފަސިންޖަރުންނަށްވެސް ލިބޭ މި ހިދުމަތްތަކާ ގުޅޭ އިތުރު މައުލޫމާތު މޯލްޑިވިއަން ނުވަތަ އަނަންތަޕޫރީ ހޮސްޕިޓަލު މެދުވެރިކޮށް ލިބޭނެ ކަމަށް ވެސް ބަޔާނުގައި ފާހަގަ ކޮށްފައި ވެއެވެ..