ށ. އަތޮޅު މަރޮށި، ޅައިމަގު އަދި ނަރުދޫގެ ޞިއްޙީ މަރުކަޒުގައި ލެބޯޓަރީގެ ޚިދުމަތް ފަށައިފިއެވެ. ނަރުދޫގައި މިއަދު އަދި ޅައިމަގާއި މަރޮށީގައި އިއްޔެ މި ޚިދުމަތް ފައްޓަވައިދެއްވީ، ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ޤީލާ ޢަލީއެވެ.
މި ތިން ރަށުގެ ޞިއްޙީ މަރުކަޒުގައި ލެބޯޓަރީގެ ޚިދުމަތް ފެށުމަށް އެ ތިން ރަށުގައިވަކިން ބޭއްވި، ޚާއްސަ ރަސްމިއްޔާތުތަކުގައި ޞިއްޙީ ވަޒީރު ޤީލާ ޢަލީގެ އިތުރުން ޞިއްޙީ ވުޒާރާގެ އިސްވެރިންނާއި، ނަރުދޫގެ ކައުންސިލްގެ އިސްވެރިންނާއި، ޞިއްޙީ މަރުކަޒުގެ އިސްވެރިން ބައިވެރިވެ ވަޑައިގެންނެވިއެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެކެވެ. އެގޮތުން މިހާތަނަށް ލެބޯޓަރީގެ ޚިދުމަތް ލިބެން ނެތް 76 ރަށެއްގައި މި ޚިދުމަތް ޤާއިމުކުރުމުގެ މަސައްކަތް ސަރުކާރުން މިހާރު އަންނަނީ ވަރަށް ބާރު ސްޕީޑެއްގައި ކުރިއަށް ގެންދަމުންނެވެ. ނަރުދޫގެ ލެބޯޓަރީއަކީ މިސަރުކާރުން އަތޮޅުތަކުގައި ހުޅުވި 21 ވަނަ ލެބޯޓަރީއެވެ.
އަބާދީގެ ގޮތުން ކުޑަ ނަމަވެސް ލެބޯޓަރީ ފަދަ ޚިދުމަތްތަކީ ކޮންމެ ރަށަކަށްވެސް ބޭނުންތެރި ޚިދުމަތެކެވެ. ލެބޯޓަރީގެ ޚިދުމަތް ނެތް ރަށްރަށުގެ ރައްޔިތުން އާންމު ޓެސްޓުތައް ހެދުމަށްޓަކައި އެހެން ރަށްރަށަށް ދަތުރުކުރަން ޖެހުމަކީ ބޮޑު ތަކުލީފެކެވެ. މީގެ ކުރިން ނަރުދޫ އަދި މިފަދަ އެހެން ރަށްރަށުގެ ރައްޔިތުންވެސް ކުޑަ ޓެސްޓެއް ހަދާލުމަށްޓަކައި ޖެހެނީ އަތޮޅުގެ ޚިދުމަތް ލިބޭ އެހެން ރަށަކަށް ދަތުރުކުރާށެވެ. ނަމަވެސް، މިއަދު ނަރުދޫ ޞިއްޙީ މަރުކަޒުގައި ލެބޯޓަރީ ޤާއިމުވެގެން ދިއުމާއެކު، އަމިއްލަ ރަށުގައި ތިބެގެން ލޭގެ ޓެސްޓުތަކާއި އެހެނިހެން ޓެސްޓުތައް ހެދުމުގެ ފުރުޞަތު މިވަނީ ތަނަވަސްވެފައެވެ.