ރާއްޖޭގައި ބާއްވާ އެންމެ ބޮޑު މައުރަޒު "ދިވެހީންގެ އުފެއްދުންތެރިކަމުގެ މައުރަޒު" ގައި ބައިވެރިވުމަށް ބޭނުންވާ ފަރާތްތަކަށް ނަންނޯޓްކުރުމަށް މި މަހު ހުޅުވާލާނެކަމަށް އިގްތިސާދީ ތަރައްގީއާއި ވިޔަފާރިއާއި ބެހޭ ވަޒީރު، މުޙައްމަދު ސައީދު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ސައީދު ވިދާޅުވީ މިދިޔަ އަހަރު ބޭއްވި އުފެއްދުންތެރިންގެ މައުރަޒަކީ މީގެ ކުރިއާ ހިލާފަށް ވަރަށް ކާމިޔާބު ކަމާއެކު ކުރިއަށް ގެންދެވުނު މައުރަޒެއް ކަމަށެވެ.
އެގޮތުން މިއަހަރުވެސް އުފެއްދުންތެރިކަމުގެ މައުރަޒު އަންނަ އޮކްޓޯބަރުގައި ބޭއްވުމަށް ނިންމާފަިއިވާއިރު، މައުރަޒުގައި ބައިވެރިވުމަށް ނަން ނޯޓު ކުރުމުގެ ފުރުސަތު މި މަހުގެ ތެރޭގައި ހުޅުވާލާނެ ކަމަށް ވަޒީރު ވިދާޅުވިއެވެ. ވަޒީރު ވިދާޅުވީ އެކިއެކި ޑިސްޓްރިކް ތަކަށް ބަހާލައިގެން ކުރިއަށް ގެންދިޔަ މައުރަޒް ޒުވާނުންގެ ވެސް ވަރަށް ބޮޑު ބަލައިގަތް ކަމަށެވެ. އަދި މުދާ އުފައްދާ ފަރާތްތަކުން ވެސް ވަރަށް ބޮޑަށް ބަލައިގަތް ކަމަށް ވަޒީރު ވިދާޅުވިއެވެ.
ވަޒީރު ސައީދު ވިދާޅުވީ މި އަހަރަކީ ރާއްޖޭގެެ އުފެއްދުންތެރިކަމުގެ އަހަރުގެ ގޮތުގައި ރައީސް ވަނީ ކަނޑައަޅުއްވާފައި ކަމަށެވެ. އަދި އެކަމާއި ގުޅޭ ގިނަ މަސައްކަތްތަކެއް ވެސް ކުރިއަށްދާނެ ކަމަށް ވިދާޅުވިއެވެ.
ކޮންމެ އަހަރަކުވެސް ބާއްވަމުން އަންނަ އުފެއްދުންތެރިކަމުގެ މައުރަޒު މިއަހަރު ބޭއްވުމަށް ހަމަޖެހިފައިވަނީ އޮކްޓޯބަރު 23 އިން 31 ގެ ނިޔަލަށެވެ.
މި އަހަރަކީ އުފެއްދުންތެރިކަމުގެ އަހަރުގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކަނޑައަޅުއްވައި އެކަން އިއުލާން ކުރައްވާފައިވުމާއެކު މިއަހަރު މައުރަޒު ކުރިއަށްދާނީ ދިވެހި އުފެއްދުންތެރިންގެ، އުފެއްދުންތައް ދައްކާލެވޭ މައުރަޒާއެކު، ދިވެހިންގެ މަސައްކަތްތެރިކަމަށް އައިސްފައިވާ ކުރިއެރުމާއި އުފެއްދުންތެރިކަމަށް އައިސްފައިވާ އަދި އަންނަމުންދާ ތަރައްގީ އާއި ކުރިއެރުން ފެންނާނެ ފަދަ ގޮތަކަށެވެ.
ބިޒްނަސް ސެންޓާ ކޯޕަރޭޝަން (ބީސީސީ)އާ ގުޅިގެން ކުރިއަށް ގެންދާ މި މައުރަޒުވެސް އިންތިޒާމް ކުރެވިގެންދަނީ ވީހާވެސް ގިނަ ފަރާތްތަކަކަށް ބައިވެރިވުމު ފުރުސަތު ފަހިވެގެންދާނެ ގޮތަކަށް ކަމަށް އިގްތިސާދީ ތަރައްގީ އާއި ވިޔަފާރިއާ ބެހޭ ވުޒާރާއިން ވަނީ ހާމަ ކޮށްފައެވެ.