ވައްކަމާއި ފޭރުމުގެ މައްސަލަތަކުގައި ހަފުތާއެއްގެ ތެރޭގައި ގެއްލުނު ފައިސާގެ ތެރެއިން 826،000 އަށްވުރެ ގިނަ ރުފިޔާ ދިވެހި ފުލުހުންގެ ޚިދުމަތުން އަނބުރާ ހޯދައިދީފިއެވެ.
ދިވެހި ފުލުހުންގެ ޚިދުމަތުން އާންމުކުރައްވާފައިވާ ހިސާބުތަކުން ދައްކާ ގޮތުގައި މި މަހުގެ 5 އިން 11 އަށް މާލެ ސަރަހައްދުގައި ހިނގި ވައްކަމާއި ފޭރުމުގެ މައްސަލަތަކުގައި ޖުމްލަ 838،434 ރުފިޔާ ވަނީ ގެއްލިފައެވެ. މީގެ ތެރޭގައި ހިމެނެނީ، އެއަރޕޯޓު އަދި ޓޫރިސްޓް ފުލުހަށް ހުށަހަޅާފައިވާ މައްސަލަތަކުގައި ހިމެނޭ 26،335 ރުފިޔާއާއި، ހެންވޭރު ފުލުހަށް ހުށަހަޅާފައިވާ މައްސަލަތުގައި ހިމެނޭ 200،578 ރުފިޔާއާއި، ގަލޮޅު ފުލުހަށް ހުށަހަޅާފައިވާ މައްސަލަތަކުގައި ހިމެނޭ 203،968 ރުފިޔާގެ އިތުރުން މާފަންނު ފުލުހަށް ހުށަހަޅާފައިވާ މައްސަލަތަކުގައި ހިމެނޭ 407،553 ރުފިޔާއެވެ.
މި މައްސަލަތައް ތަޙުޤީޤު ކުރުމަށްފަހު ގެއްލިފައިވާ ފައިސާގެ ތެރެއިން %98 އަށްވުރެ ގިނަ ރުފިޔާ ފުލުހުން ވަނީ އަނބުރާ ހޯދާފައެވެ. އެއީ، ޖުމްލަ 826،730 ރުފިޔާއެވެ.
ފުލުހުން ހޯދާފައިވާ ފައިސާގެ ތެރޭގައި ހިމެނެނީ، އެއަރޕޯޓު އަދި ޓޫރިސްޓް ފުލުހުން ހޯދާފައިވާ 26،335 ރުފިޔާއާއި، ހެންވޭރު ފުލުހުން ހޯދި 175،250 ރުފިޔާއާއި ގަލޮޅު ފުލުހުން ހޯދި 225،215 ރުފިޔާއާއި، މާފަންނު ފުލުހުން ހޯދި 396،888 ރުފިޔާގެ އިތުރުން ވިލިމާލެ ފުލުހުން ހޯދި 3،042 ރުފިޔާއެވެ.
ފުލުހުން ބުނީ، ވައްކަމާއި ފޭރުމުގެ މައްސަލަތަކުގައި ގެއްލޭ ފައިސާ ވީހާވެސް އަވަހަށް ހޯދައި އެފައިސާގެ ވެރިފަރާތްތަކާއި ހަވާލުކުރުމަށް އެ ޚިދުމަތުގެ އޮފިސަރުން ހަރުދަނާ މަސައްކަތްތަކެއް ކުރައްވަމުންދާ ކަމަށެވެ. އަދި ކުރިއަށް އޮތްތަނުގައިވެސް ޤައުމުގެ އަމާންކަން ދެމެހެއްޓުމަށް މިފަދަ ކުށްތައް ހުއްޓުވައި، ފުލުހުންނަށް ރައްޔިތުން ކުރާ އިތުބާރު ދެމެހެއްޓުމަށް މަސައްކަތް ކުރާނެ ކަމުގެ ޔަގީންކަންވެސް އެ ހިދުމަތުން އަރުވައެވެ.