އީގަލް ހީލްސް މަޝްރޫއު ކުރިއަށް ގެންދިއުމުގައި ދިވެހިރާއްޖޭގެ ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ބަންޑާރަ ނައިބް އަހްމަދު އުޝާމް ވިދާޅުވެއްޖެއެވެ.
ބަންޑާރަ ނައިބު އުޝާމް ވަނީ ރަސްމާލެއިން ބައެއް ބޭރުގެ ފަރާތަކަށް ވިއްކާލީކަމަށް ސަރުކާރަށް ތުހުމަތުކޮށް ދެކެވޭ ވާހަކަތަކަށް އެކްސްގައި ރައްދުދެއްވާފައެވެ. އެގޮތުން ރަސްމާލޭގައި 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" ގެ އެއްބަސްވުމާއި ގުޅޭ ގޮތުން ކުރީގެ ރައީސް ޔާމީން ވިދާޅި ވާހަކަތަކަށް ރައްދު ދެއްވަމުން ވިދާޅުވީ މިއަދު ރައީސް ޔާމީން ހަނދުމަފުޅުނެތީ ކަމަށް ވެދާނެ ކަމަށާއި، އެހެންނަމަވެސް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ރައީސް ޔާމީންގެ ވެރިކަމުގައި.ކަމަށެވެ
ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރު ކަމަށާއި، އޭރު ޤާނޫނުގެ ދަށުން ޓޫރިސްޓް ރިޒޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަށް ކަމަށެވެ. ޤާނޫނަށް ގެނެވުނު އިސްލާހަކުން އެމުއްދަތު 50 އަހަރަށް އިތުރުކޮށްފައިވަނީ 2010 ވަނަ އަހަރު ރައީސް ނަޝީދުގެ ވެރިކަމުގަ ކަމަށެވެ. އަދި އެއަށްފަހު މިމުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށެވެ.
މީގެ އިތުރުން ޓޫރިޒަމާބެހޭ ޤާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެރަށެއްގައި ކޮށްފައިވާ އިންވެސްޓްމަންޓެއްގެ އަގުން ބަލަށް ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭ ކަމަށެވެ.
މިއާ ހިލާފަށް ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަަމައެކަނި ލެޓަރ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި ކަމަށެވެ. މި މަޝްރޫއު ފެށުމުގެ ކުރިން މި އެގްރީމެންޓްގައިވާ ޓަރމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން މިކަމާ ގުޅުންހުރި ޤާނޫނުތައް މަޖިލީހުން ފާސްކުރާނެ ކަމަށެވެ.
މި މަޝްރޫއު ކުރިއަށް ގެންދިއުމުގެ ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔާގީން ކަން ވެސް އުޝާމް ދެއްވިއެވެ.
ރަސްމާލޭގައި 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް "އީގަލް ހިލްސް" އާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކުރީ މި މަހުގެ 21ވަނަ ދުވަހުއެވެ. މި އެއްބަސްވުމުގެ ދަށުން ރަސްމާލެއިން 500 ހެކްޓަރުގެ ބިމެއް 99 އަހަރަށް އެ ކުންފުންޏަށް ކުއްޔަށް ދިނުމަށް ނިންމާފައިވާއިރު އެއީ ބޭރުބަޔަކަށް ޤާނޫނާ ޚިލާފަށް ރާއްޖޭން ބިން ވިއްކާލުމުގެ އަމަލެއް ކަމަށް އިދިކޮޅު ބައެއް ފަރާތްތަކުން ތުހުމަތު ކުރެއެވެ.